Read Northwest Gbaya JOSUE 17 Bible Online

JOSUE 17 - Northwest Gbaya bible

JOSUE 17

¹Nù nɛ tani baa ha̧ zuduk ko Manase nɛ duka nɛ kaya-bem ko Jozɛf nɛ́ mɔ'ɔ. Makir duka nɛ́ kaya-bem ko Manase, a̧ duka nɛ́ dáà ko Galad mbɛt, nɛ mɔ'ɔ nɛ wa ha̧a̧ nú Galad ha̧ a̧, wen a̧ duka so nɛ ŋgaŋa wi-biro.

²Nù ko o ŋma bem ko Manase nɛ tani baa ha̧ wa nyɛm nɛ ɗoŋ o nú-gara kɔ-wa nɛ́ mɔ'ɔ. O bem nɔ‘i nɛ o bem ko Abiezɛr, o bem ko Helɛk, o bem ko Azriɛl, o bem ko Sɛkɛm, o bem ko Hefɛr, in o bem ko Semida, wen nɛ tɔ̧ o be wiwii ko Manase, bem ko Jozɛf lɛŋ.

³Sɛlɔfɛhad, bem ko Hɛfɛr, be-koo Galad nɛ duka nɛ́ bem ko Makir, be-koo Manase, bo so kɔ‘i nɛ̀ be-wiwii na. Kɔ̧-a̧ so nɛ o be-okoo ɓɛɛ; nin be-okoo nɔ‘i nɛ́ mɔɔ nɔ'ɔ: Mala, Nɔa, Ogla, Milka in Tirsa.

⁴Wa nɛɛ tɛ wi-ɗafi-sɔ̧ Eleazar, ti Josue bem ko Nun in o gasawi, ɓɛɛ wa tɔ̧: «GASA WAN tɔ̧ɔ̧ so ha̧ Moisɛ mɛ ha̧ ŋma mɔɔ-oi h’ɛ́ɛ́ mgbara o nya yɛ.» Nɛ mɔ'ɔ nɛ wa ha̧a̧ mɔɔ-oi nyɛm nɛ ɗoŋ tɔ̧ɔ̧-wen ko GASA WAN ha̧ wa mgbara o nya ko dáà kɔ-wa.

⁵Wa ha̧a̧ zika-nù ɓu ha̧ Manase e zu Galad in Basaŋ nɛ̀ duk nɛ̀ kur Jurdɛn.

⁶O be-okoo ko Manase kpaa mɔɔ-oi mgbara o bu̧i̧-nya-wa, ɓɛɛ nú Galad duk nɛ́ ko o ŋma bem kɔ̧-a̧.

⁷Gbìsí-nù ko Manase ku̧ naŋ Asɛr hɔ nɛnɛ Mikmɛtat mgbák ti Sikɛm, ɓɛɛ ɓir hi̧i̧ si war Yamim tɛ o bíí Ɛin-Tapua.

⁸Nú Tapua duka so nɛ́ ko Manase, ɓɛɛ hee mɔ'ɔ nɛ ye Tapua duk nɛ zu gbìsì ga, wa ha̧a̧ a̧ ha̧ o bem ko Efraim.

⁹Gbìsì zira tik zu be-zer Kana nɛ ká̧ zaŋ-aa nɛ war ɗɔɔ. Mɔ kpɔk, ye nɛ ya nɛ war ká̧-zan-mɛ́-ɗɔɔ ha̧ be-zer'i tɛ nù ko Manase duka nɛ́ ko o be Efraim. Gbìsì duka ká̧ zaŋ be-zer'i ɓir nɛnɛ nɛ war ŋgɔn, ɓɛɛ nɛ́ɛ̀ kaɗi nú Gba-tɔp.

¹⁰Efraim a̧a̧ nɛ̀ war ká̧-zan-mɛ́-ɗɔɔ, ɓɛɛ Manase a̧a̧ nɛ̀ war ká̧-zan-mɛ́-ŋgɔn. Gba-tɔp duka nɛ́ gbìsì kɔ-wa nɛ̀ war yee-wese. Asɛr duka nɛ̀ ká̧-zan-mɛ́-ŋgɔn, ɓɛɛ Isakar a̧a̧ nɛ̀ daŋa-wese.

¹¹Manase a̧a̧ so nɛ̀ o ye tɛ zika-nù ko Isakar in ko Asɛr mbɛt: mɛ̀ nɛ́ Bɛt-Seaŋ, Yiblɛam, Dɔr, wan mɛ ká̧ zaŋ yì, Ɛn-Dɔr, Tanak in Mɛgido, in o ye lɛŋ nɛ zii nɛ̀ wa, in o zu-kaya taar.[4]

¹²Ɓɛɛ hee mɔ'ɔ nɛ o bezaŋ Manase ba so ye nɔ‘i ga na, o be Kanaŋ nɔɔ ŋgiɗi, ɓɛɛ wa ɓɔn tɛ nù‘i.

¹³Ŋgimbi nɛ o be Israɛl kpaa ŋgai kaɗi, wa dee ha̧ o be Kanaŋ mɛ de tom ha̧ wa géè, ɓɛɛ wa nyɛm so ndaka wa yinɛ na.

¹⁴O bezaŋ Jozɛf tɔ̧ɔ̧ ha̧ Josue hee mɔ'ɔ ga: «Wen ge ɛ́nɛ́ ha̧a̧ mɔɔ-oi h’ɛ́ɛ́ nɛ̀ nù kpɔk ɓɛɛ ge? Bo nɛ bíí k’ɛɛ ɔ dɔka hee mɔ'ɔ nɛ Sɔ̧ toka so nɛ de yoŋgo h’ɛ́ɛ́ ga na nde?»

¹⁵Josue kifa nú: «Hee mɔ'ɔ nɛ zuduk k’ɛ́nɛ́ ɔ dɔka ga, ɛ̀nɛ̀ dáŋ si zika-nù nɛ te ɔ dɔka sɛnɛ, ɛ̀nɛ̀ pɔ́í kombo sɛn nù ko o be Periz in ko o be Refaim, wen nɛ kaya Efraim gasi wen'nɛ́ na.»

¹⁶O bezaŋ Jozɛf kifa nú woyo: «Kaya beka nyɛm yɛ na, in mbɛt, o be Kanaŋ lɛŋ nɛ ɔ sɛn bɔkɔ-nù a̧a̧ nɛ̀ o keekee-nyaŋa-boi, o wan nɛ ɔ Bɛt-Seaŋ ká bá nɛ̀ o ye nɛ zii nɛ a̧, in o wan nɛ ɔ bɔkɔ-nú Yizreɛl mbɛt.»

¹⁷Josue tɔ̧ɔ̧ ha̧ o be nutua ko Jozɛf, ha̧ Efraim in Manase: «Zuduk k’ɛ́nɛ́ ɔ dɔka in ɛnɛ ɔ ŋgaya mbɛt, ɛnɛ beka kpa nù kpɔk ɓɛɛ na.

¹⁸Kaya nɛ duk nɛ kombo tɛ duk nɛ mɔɔ-oi k’ɛ́nɛ́; ɛ̀nɛ̀ gɔ́m te a nù, ɓɛɛ bɛɛ-aa lɛŋ duka nɛ́ k’ɛ́nɛ́; ɛ́nɛ́ tɛ ndak o be Kanaŋ nɛ oi keekee-biro kɔ-wa in ŋgai kɔ-wa lɛŋ yinɛ.»