Read Northwest Gbaya JOSUE 2 Bible Online

JOSUE 2 - Northwest Gbaya bible

JOSUE 2

¹Josue bem ko Nun toma wi-kpe-naŋ-mɔ yiitoo nɛ Sitim si Jeriko nɛ hu̧sa̧-a̧; a̧ tɔ̧ɔ̧ ha̧ wa: «Ɛ̀nɛ̀ nɛ́ɛ̀ zɔ́k mɔ tɛ nù‘i, ɛ̀nɛ̀ zɔ́k Jeriko mbɛt.» O wi nɔ‘i yaka, ɓɛɛ wa nɛ́ɛ̀ zir kɔ̧ tua ko ŋma okoo-de-mɔ nɛ mbɔɗɔnu, nin-a nɛ Rahab.

²O ŋma bíí nɛɛ tɔ̧ nyɛrɛ mɔ‘i ha̧ wannu Jeriko'e: «O ŋma be Israɛl hɔɔ saaye mɛ zɛ'ɛ; wa tɛɛ mɛ kpe naŋ nù k’ɛɛ.»

³Wannu toma tɔ̧ ha̧ Rahab hee mɔ'ɔ ga: «Mɛ̀ fó o wi nɛ hɔɔ tɛ kɔ-mɛ‘i gbonɛ, wen wa tɛɛ mɛ kpe nɛ́ naŋ nù k’ɛɛ lɛŋ.»

⁴Rahab hu̧sa̧ o wi nɔ‘i yiitoo'i, ɓɛɛ a̧ kifi nú ha̧ o betom: «Nɛ mbetɛ, wa hɔɔ kɔ̧ tua kɔ‘m, ɓɛɛ mi iŋ so fara nɛ wa tɛɛ nɛnɛ na.

⁵Ɓɛɛ mɛ ga̧a̧mɔ, ŋgimbi kpee nú garo-ye, wa gboo yak, mi iŋ fara nɛ wa nɛɛ si sɛnɛ na. Ɛ̀nɛ̀ ndák ɗoŋ wa nɛ haya-a, ɓɛɛ ɛnɛ tɛ kpa wa.»

⁶(Rahab foo so kɔ‘i wa si zu tua, ɓɛɛ hu̧si wa ɗɔɔ o kan-fon[1] n'aa aa so hi̧i̧.)

⁷O bíí ko wannu ndaka ɗoŋ wa si war nú-horo Jurdɛn, ɓɛɛ wa kpe nú garo-ye ɗoŋ wa.

⁸Nɛti ha̧ o wi-kpe-naŋ-mɔ mɛ ɔ nù, Rahab daŋa si zu tua nɛ́ɛ̀ kpa wa;

⁹a̧ tɔ̧ɔ̧ ha̧ wa: «Mi iŋa ndé, GASA WAN ha̧a̧ nù'ɛ h’ɛ́nɛ́, ɛnɛ dee kíì pi̧ tɛ o bíí nù'ɛ, ɓɛɛ tɛ-wa nak nak sɛn ti'nɛ́,

¹⁰wen ɛɛ zia ndé, GASA WAN dee ha̧ Gbɛ̧ gba-tɔp mɛ ɔ̧si̧ ti'nɛ́ ŋgimbi n’ɛnɛ gboo nɛnɛ nɛ̀ Egiptɛ, ɓɛɛ ɛnɛ gbɛ Og in Sihɔŋ, o wannu ko o be Amɔr kur Jurdɛn ɓi mɛ.

¹¹Ɛɛ zia mɔɔ nɔ‘i ɓɛɛ gba̧a̧ tɛ-ɛɛ gbin lɛŋ: kóó hiɗi o ndé gɔna ti'nɛ́ wen Sɔ̧ k’ɛ́nɛ́ nɛ́ Sɔ̧ mɛ yiwese in see zu nù mbɛt.

¹²Ɓɛɛ kinii, ɛ̀nɛ̀ kán mɔ ha̧‘m nɛ nin GASA WAN ndé, ɛnɛ tɛ de mɔ nɛ de-a in o bíí kɔ‘m hee mɔ'ɔ n'am dea in'nɛ̀ɛ́ ga. Ɛ̀nɛ̀ dé ŋma mɔ ha̧‘m nɛ tɛ usi nɛ mbetɛ‘e,

¹³ɛnɛ tɛ e dáà kɔ‘m in nàà kɔ‘m, o nya'm in o boko-nya'm kpasa in o bíí kɔ-wa lɛŋ, ɛnɛ beka e ha̧ wa mɛ gbɛ yɛ na.»

¹⁴Ɓɛɛ wi nɔ‘i kifi nú ha̧ Rahab: «K’ɛ̀nɛ̀ nɛ́ tɔ̧ɔ̧ ndaa nɔ̀ k’ɛɛ ha̧ ŋma bíí na, ŋgimbi nɛ GASA WAN tɛ ha̧ nù'ɛ h’ɛ́ɛ́, ɛɛ tɛ de mɔ in mɛɛ nɛ de-a in nɛ yuwar-a; ɓɛɛ k’ɛɛ nɛ́ dee hegɔ na, Sɔ̧ a̧ gbɛ yɛ.»

¹⁵Ɓɛɛ Rahab zir wa nɛ nyak a nù nɛ woi-tua kɔ̧-a̧, wen tua kɔ̧-a̧ ndaɗa so ŋmaa in garo-ye.

¹⁶Rahab tɔ̧ɔ̧ ha̧ wa: «Ɛ̀nɛ̀ bá nɛ yuwar si mgbara kaya, wen ká o bíí nɛ kii'nɛ́ tɛɛ kpa'nɛ́. Ɛ̀nɛ̀ hú̧sí hi̧i̧ zɛ taar hɔ ŋgimbi nɛ wa tɛ pii sɛk’ɛnɛ baa yuwar mɛ si.»

¹⁷O wi nɔ‘i tɔ̧ɔ̧ ha̧ Rahab: «Mɔ nɛ tɛ de ha̧ kanamɔ nɛ mɛ dee h’ɛ́ɛ́ mɛ kan’ɛ mɛ hɔ gba̧a̧ nɛ́ mɔ'ɔ:

¹⁸ŋgimbi n’ɛɛ tɛ ye nɛnɛ tɛ nù'ɛ, mɔ nɛ mɛ tɛ de nɛ́ mɔ'ɔ. Mɛ tɛ ba be gbɛ̧ gba̧a̧-pɛr’ɛ e sɛn woi-tua kɔ-mɛ fara nɛ mɛ zira nɛ̀ ɛɛ, ɓɛɛ mɛ̀ mɔ́í̧ dáà kɔ-mɛ in nàà kɔ-mɛ in o nya-mɛ lɛŋ pii kɔ̧ tua'i.

¹⁹Ɓɛɛ kà ŋma bíí mgbara'nɛ́ gbó nɛ̀ kɔ̧ tua'i si zan, tɔk tɛ-a tɛ tik zu-a woyo, ɓɛɛ i̧i̧ bo nɛ wen k’ɛɛ ɓɔna. Ɓɛɛ kà er yɛ nɛ́ tama tɛ ŋma bíí nɛ duk in mɛɛ sɛn kɔ̧ tua'i, tɔk tɛ-a tɛ tik zu yɛ.

²⁰Ɓɛɛ kà mɛ nɛ́ tɔ̧ɔ̧ ndaa nɔ̀ k’ɛɛ ha̧ ŋma bíí, ɓɛɛ kanamɔ nɛ mɛ dee h’ɛ́ɛ́ mɛ kan'i tɛ tik nù géè.»

²¹A̧ tɔ̧a̧: «Mɔ a̧ de nyɛm nɛ ɗoŋ wen k’ɛ́nɛ́‘i.» A̧ ee ha̧ wa mɛ yak, ɓɛɛ a̧ kun be gbɛ̧ gba̧a̧-pɛr tɛ woi-tua'i.

²²O wi-kpe-naŋ-mɔ yaka si mgbara kaya; wa yaa hi̧i̧ zɛ taar hɔ wese nɛ o wi-ndak-ɗoŋ-wa sia. O wi nɛ ndaka so ɗoŋ wa kia so wa nɛ̀ yuwar takaɗi; wa kpa wa na.

²³Ɓɛɛ o wi-kpe-naŋ-mɔ nɔ‘i yiitoo'i zir nɛ̀ zu kaya; wa kuu Jurdɛn, ɓɛɛ wa nɛɛ kpa Josue bem ko Nun; wa wee ɗoŋ mɔ lɛŋ ha̧ a̧.

²⁴Wa tɔ̧ɔ̧ ha̧ a̧: «Nɛ mbetɛ GASA WAN ha̧a̧ nù'ɛ lɛŋ h’ɛ́ɛ́; o bíí nù‘i lɛŋ ya nɛ naka-tɛ ti yɛ.»