Read Northwest Gbaya JOSUE 23 Bible Online

JOSUE 23 - Northwest Gbaya bible

JOSUE 23

¹Ɗoŋ-aa nyɛi̧a nɛ̀ GASA WAN ha̧a̧ nɛ̀ ɔma-tɛ ha̧ o be Israɛl yí o wisɛn kɔ-wa nɛ ɔ zik wa lɛŋ. Josue sɔka kaɗi, pɛ-a dɔka,

²ɓɛɛ a̧ sa o be Israɛl lɛŋ, o gasawi kɔ-wa, o wan kɔ-wa, o wi-gɔn-kita kɔ-wa in o mɔ-geŋa kɔ-wa lɛŋ, ɓɛɛ a̧ tɔ̧ ha̧ wa: «Kɔ‘m, mi sɔka kaɗi, pɛ‘m dɔka.

³K’ɛ́nɛ́, ɛnɛ duka sedaako mɔ lɛŋ nɛ GASA WAN Sɔ̧ k’ɛ́nɛ́ dea in o dukbíí nɔ'ɔ wen zu'nɛ́; mɛ̀ nɛ́ GASA WAN Sɔ̧ k’ɛ́nɛ́ a̧ dee biro wen'nɛ́.

⁴Ɛnɛ zɔk! Mi kɛ̧ɛ̧ nu ko o dukbíí n'am kuma so ku̧u̧naŋ-a nɛ Jurdɛn kaɗi tɛ Gba-tɔp nɛ war yee-wese nɛ tani h’ɛ́nɛ́, ɓɛɛ mi kɛ̧ nù ko oi o dukbíí nɔ'ɔ nɛ ɓɔna ha̧ o zuduk k’ɛ́nɛ́ nɛ̀ mɔɔ-oi mbɛt.

⁵GASA WAN Sɔ̧ k’ɛ́nɛ́ tɛ ndak o wi nɔ‘i yinɛ ti'nɛ́. A̧ tɛ ir wa ti'nɛ́ yinɛ, ɓɛɛ ɛnɛ baa nù kɔ-wa hee mɔ'ɔ nɛ GASA WAN Sɔ̧ k’ɛ́nɛ́ tɔ̧ɔ̧ so h’ɛ́nɛ́ ga.

⁶Ɛ̀nɛ̀ kpá ŋgai, ɛ̀nɛ̀ dé mɔ lɛŋ nyɛm nɛ ɗoŋ mɔ nɛ Kalata Heembea ko Moisɛ yɔra; ɛnɛ beka a̧r kóó si wiiko, kóó si gale na mbɛt.

⁷K’ɛ́nɛ́ ye tɛ ko o dukbíí nɔ'ɔ nɛ ɓɔna katɛ‘nɛ́'ɛ na, k’ɛ́nɛ́ ta mɔ wen o géé-sɔ̧ kɔ-wa na, k’ɛ́nɛ́ kan mɔ nɛ nin-wa na, k’ɛ́nɛ́ de tom ha̧ wa gbɛ nɛ zugur'nɛ́ nù ti wa na mbɛt.

⁸Ɓɛɛ k’ɛ̀nɛ̀ ndaɗi in GASA WAN Sɔ̧ k’ɛ́nɛ́ hee mɔ'ɔ n’ɛnɛ dee hɔ sɔsɔɔ‘i ga,

⁹GASA WAN tɛ ndak o gasa ŋgaya tugun bíí ti'nɛ́ yinɛ; ŋma bíí nɛ yora ti'nɛ́ hɔ sɔsɔɔ bo na.

¹⁰Bíí kpɔk mgbara'nɛ́ tɛ ndak bíí booro, wen nɛ́ GASA WAN Sɔ̧ k’ɛ́nɛ́ a̧ dé biro oi nú‘nɛ́ hee mɔ'ɔ n'aa tɔ̧ɔ̧ so h’ɛ́nɛ́ ga.

¹¹Ɛ̀nɛ̀ zɔ́k tɛ‘nɛ́, ɛ̀nɛ̀ kɔ̧́ GASA WAN Sɔ̧ k’ɛ́nɛ́.

¹²Ɓɛɛ k’ɛ̀nɛ̀ zík tɛ‘nɛ́ ndaɗi nɛnɛ in o dukbíí nɔ'ɔ nɛ ɓɔn katɛ‘nɛ́'ɛ, k’ɛ̀nɛ̀ nɛ́ baa ŋmaa in wa, k’ɛ̀nɛ̀ nɛ́ tɛ kɔ-wa, ɓɛɛ kà wa tɛ́ tɛ k’ɛ́nɛ́,

¹³ɛ̀nɛ̀ íŋ nɛ̀ mbetɛ‘e GASA WAN Sɔ̧ k’ɛ́nɛ́ tɛ kaɗi ndaka o dukbíí nɔ'ɔ ti'nɛ́ yinɛ; hegɔ wa tɛ duk nɛ́ yɔk in pɛ́r wen'nɛ́, wa tɛ duk nɛ́ nyasi katɛ‘nɛ́ in o tɛn yí‘nɛ́, hɔ ŋgimbi n’ɛnɛ tɛ pɛsi e de nù'ɛ nɛ GASA WAN Sɔ̧ k’ɛ́nɛ́ ha̧a̧ so h’ɛ́nɛ́'ɛ duk.

¹⁴«Ɓɛɛ zɔk sɔsɔɔ mi yaka nɛ̀ yuwar nɛ̀ bíí lɛŋ ba. Ɛ̀nɛ̀ íŋ nɛ kɔ̧ see'nɛ́ in nɛ kiitɛ‘nɛ́ lɛŋ ndé, demɔ lɛŋ nɛ GASA WAN Sɔ̧ k’ɛ́nɛ́ tɔ̧ɔ̧ so zu'nɛ́ hɔɔ gba̧a̧. Mɔ lɛŋ hɔɔ gba̧a̧ h’ɛ́nɛ́. Ŋma wen kɔ̧-a̧ kpɔk nɛ hɔ gba̧a̧ na, bo na.

¹⁵Hee mɔ'ɔ nɛ de wen ko GASA WAN Sɔ̧ k’ɛ́nɛ́ hɔɔ gba̧a̧ ga, kale mɔ mbɛt, ŋga wen ko GASA WAN lɛŋ tɛ hɔ gba̧a̧ zu'nɛ́ hɔ ŋgimbi n'aa tɛ kum'nɛ́ yinɛ tɛ de nù n'aa ha̧a̧ h’ɛ́nɛ́.

¹⁶K’ɛ̀nɛ̀ yak zu nɔɔ-tɔk nɛ GASA WAN Sɔ̧ k’ɛ́nɛ́ nɔɔ in'nɛ̀ɛ́, k’ɛ̀nɛ̀ nɛ́ dee tom ha̧ o ŋma sɔ̧ gu nɛ nù ti wa, nyimsea ko GASA WAN tɛ kur zu'nɛ́, ɓɛɛ ɛnɛ tɛ kum nɛ haya-a tɛ de nù n'aa ha̧a̧ h’ɛ́nɛ́.»