Read Northwest Gbaya JOSUE 6 Bible Online

JOSUE 6 - Northwest Gbaya bible

JOSUE 6

¹Wa kpee so nú garo Jeriko nɛ ŋgaya-a wen zu o be Israɛl. Ŋma bíí kpɔk nyɛm so mɛ ye, kóó gboa-a na mbɛt.

²GASA WAN tɔ̧ɔ̧ ha̧ Josue: «Mɛ̀ zɔk, mi ee Jeriko in wan kɔ̧-a̧ in o haya wi-biro kɔ̧-a̧ lɛŋ kɔ̧ er-mɛ.

³Ɛ́nɛ́ o wi-biro, ɛ̀nɛ̀ nɛ́ɛ̀ zík Jeriko war kpɔk. Ɛ̀nɛ̀ dé hegɔ tɛ zɛ mɔɔrɔ-ɗoŋ-kpɔk.

⁴O wi-ɗafi-sɔ̧ mɔɔrɔ-ɗoŋ-yiitoo tɛ tui zak vala sami mɔɔrɔ-ɗoŋ-yiitoo yak nɛti ha̧ Kuɓa nɔɔ-tɔk. Tɛ mɔɔrɔ-ɗoŋ-yiitoo ɔɔ-zɛ, ɛnɛ tɛ zik ye war mɔɔrɔ-ɗoŋ-yiitoo, ɓɛɛ o wi-ɗafi-sɔ̧ dɔma zak.

⁵Kà wa nɛ́ dɔma zak vala sami, k’ɛ̀nɛ̀ zii wora zak'i, o bíí a̧ gai mɔ nɛ ŋgaya-a, ɓɛɛ garo saaye'i tɛ gbin; ŋgimbi'i o bíí a̧ tik biro, kóó o ndé tan ti.»

⁶Josue bem ko Nun saa o wi-ɗafi-sɔ̧, ɓɛɛ tɔ̧ ha̧ wa: «Ɛ̀nɛ̀ gɔ́ Kuɓa nɔɔ-tɔk, ɓɛɛ o ŋma mɔɔrɔ-ɗoŋ-yiitoo a̧ kai zak vala sami mɔɔrɔ-ɗoŋ-yiitoo duk ti Kuɓa nɔɔ-tɔk ko GASA WAN.»

⁷A̧ tɔ̧ɔ̧ ha̧ dukbíí: «Ɛ̀nɛ̀ yák ɛ̀nɛ̀ zík ye, ɓɛɛ o wí-nɛ̀-gɔ̀n-zù tɛ yak ti ha̧ Kuɓa nɔɔ-tɔk ko GASA WAN.»

⁸Mɔ dee nyɛm nɛ ɗoŋ wen nɛ Josue tɔ̧ɔ̧ ha̧ dukbíí; o wi-ɗafi-sɔ̧ mɔɔrɔ-ɗoŋ-yiitoo nɛ kai zak vala sami mɔɔrɔ-ɗoŋ-yiitoo ku̧u̧ naŋ nɛɛ nɔ̀ ti GASA WAN dɔm nɛ zak, ɓɛɛ Kuɓa nɔɔ-tɔk ko GASA WAN duk ɗoŋ-wa.

⁹O wí-nɛ̀-gɔ̀n-zù yaka ti ha̧ o wi-ɗafi-sɔ̧ nɛ dɔm zak, ɓɛɛ o wi-kpe-ndaa-gɔtɔ ya ɗoŋ ndak nɛ pata Kuɓa nɔɔ-tɔk. Nɔ̀ a̧ nɛ‘i, zak a̧ dɔm'i.

¹⁰Josue tɔ̧ɔ̧ so ha̧ dukbíí, ká wa hiɗi mɔ na, ká‘i zii ger-wa na, ká ŋma wen gbo nɛ nú-wa na mbɛt hɔ wese nɛ‘i tɛ tɔ̧ ha̧ wa, wa a̧ gai mɔ sɛka wa gaia mɔ.

¹¹Wa baa Kuɓa nɔɔ-tɔk ko GASA WAN zik nɛ ye war kpɔk, ɓɛɛ wa si ɗoŋ kɔ̧ gbagari wen ɔɔ nù.

¹²Josue kura mɛ tutuyɛ sut, ɓɛɛ o wi-ɗafi-sɔ̧ gɔ Kuɓa nɔɔ-tɔk ko GASA WAN.

¹³O wi-ɗafi-sɔ̧ mɔɔrɔ-ɗoŋ-yiitoo nɛ tui zak vala sami mɔɔrɔ-ɗoŋ-yiitoo'i yaka ti Kuɓa nɔɔ-tɔk ko GASA WAN dɔm nɛ̀ zak woyo. O wí-nɛ̀-gɔ̀n-zù yaka ti, ɓɛɛ o wi-kpe-ndaa-gɔtɔ ndak pata Kuɓa nɔɔ-tɔk ko GASA WAN; nɔ̀ a̧ nɛ‘i, zak a̧ dɔm'i.

¹⁴Wa zika ye war kpɔk woyo tɛ yiitoo ɔɔ-zɛ, ɓɛɛ wa si ɗoŋ si kɔ̧ gbagari. Wa dee kpɔk mɔ‘i hegɔɔ tɛ zɛ mɔɔrɔ-ɗoŋ-kpɔk.

¹⁵Ɓɛɛ tɛ mɔɔrɔ-ɗoŋ-yiitoo ɔɔ-zɛ, wa gboo mɛ tutuyɛ sut, mɛ gɔna mɔ, wa zika ye war mɔɔrɔ-ɗoŋ-yiitoo nyɛm nɛ ɗoŋ yuwar deemɔ‘i. Ɓɛɛ wese nɛ wa zika nɛ̀ ye war mɔɔrɔ-ɗoŋ-yiitoo nɛ́ mɔ‘i ɓɛɛ.

¹⁶Tɛ mɔɔrɔ-ɗoŋ-yiitoo zika ye, o wi-ɗafi-sɔ̧ dɔma zak, ɓɛɛ Josue tɔ̧ ha̧ o dukbíí: «Ɛ̀nɛ̀ gáí mɔ, wen GASA WAN ee ye kɔ̧ er'nɛ́ kaɗi.

¹⁷Jeriko in o mɔɔ-saaye lɛŋ tɛ duk nɛ́ ko GASA WAN; ɓɛɛ nɛ́ Rahab kó-de-mɔ nɛ mbɔɗɔnu kpɔk in o bíí kɔ̧ tua kɔ̧-a̧ a̧ tɛ ya kpasa ɓɛɛ, wen nɛ́ a̧ a̧ baa hu̧si so o wi-kpe-naŋ-mɔ n’ɛɛ toma so.

¹⁸Ɓɛɛ k’ɛ́nɛ́, ɛ̀nɛ̀ kpé see'nɛ́ wen ká aa-see-mɔ tɛɛ ir'nɛ́ mɛ zu̧ ŋma mɔ nɛ duk nɛ́ ko GASA WAN; k’ɛ̀nɛ̀ zú̧ ŋma mɔ nɛ‘i ee ha̧ GASA WAN, ɛ́nɛ́ tɛ de ha̧ fom'i mɛ tik mgbara o be Israɛl, ɓɛɛ ɛ́nɛ́ tuia bɔnɛ pi̧ zu wa.

¹⁹O bu-mbɔi, lɔr, o mɔ nɛ‘i dee nɛ ndɛrɛ in boi, o mɔɔ nɔ‘i lɛŋ tɛ duk nɛ́ ko GASA WAN; wa tɛ ye mgbara mbɔi ko GASA WAN.»

²⁰Wa dɔma zak, ɓɛɛ ŋgimbi nɛ o bíí zia wora-a, wa gaia mɔ nɛ ŋgaya-a, ɓɛɛ garo gbin a nù. Dukbíí gɔma a saaye, kóó o ndé bìí biro tan ti, ɓɛɛ wa ba ye.

²¹Wa kuma o bíí saaye lɛŋ: o wiwii, o okoo, o ŋgaiwi gu nɛ o sɔkawi, o ndai, o sami in o tuifuu, wa gbɛɛ wa lɛŋ nɛ gba-paa.

²²Josue tɔ̧ɔ̧ ha̧ o wi-kpe-naŋ-mɔ yiitoo nɛ̀ nɛɛ so mɛ kpe naŋ nù‘i: «Ɛ̀nɛ̀ yé tua ko kó-de-mɔ nɛ mbɔɗɔnu so’ɛ, ɛ̀nɛ̀ mgbɔ́ a̧ gbonɛ in o bíí kɔ̧-a̧ lɛŋ hee mɔ'ɔ n’ɛnɛ kana so nɛ mɔ ha̧ a̧ ga.»

²³O be-ŋgaiwi nɔ‘i nɛɛ ye tua, ɓɛɛ wa mgbɔ Rahab in dáà kɔ̧-a̧, nàà kɔ̧-a̧, o nya-a̧ in o mɔ kɔ̧-a̧ lɛŋ gbonɛ. Wa mgbɔɔ o bíí nú-gara kɔ̧-a̧ lɛŋ si ɗoŋ gbagari ko o be Israɛl.

²⁴Wa dɔɔ ye in o mɔɔ-saaye lɛŋ; mɔ nɛ wa fo na nɛ́ bu-mbɔi in lɔr in o mɔ nɛ‘i dee nɛ ndɛrɛ in boi nɛ wa aa mgbara mbɔi kɔ̧ tua ko GASA WAN.

²⁵Ɓɛɛ Josue e Rahab kó-de-mɔ nɛ mbɔɗɔnu in o bíí kɔ̧ tua kɔ̧-a̧ ká bá nɛ̀ o mɔ kɔ̧-a̧ lɛŋ kpasa. O bezaŋ Rahab ɓɔna mgbara o be Israɛl hɔ sɔsɔɔ wen mɛ̀ nɛ́ a̧ a̧ hu̧sa̧ so o betom nɛ Josue toma so mɛ nɛ̀ɛ́ kpe naŋ Jeriko.

²⁶Ŋgimbi'i, Josue kana mɔ hegɔ: «Fom ko GASA WAN a̧ ba wi nɛ tɛ mbo Jeriko e ŋgɔn woyo. Kaya-bem kɔ̧-a̧ tɛ fe ŋgimbi éé naŋ garo, ɓɛɛ hɔ-ɗoŋ kaya-a tɛ fe ŋgimbi éé kpar-nú-a.»

²⁷GASA WAN duka in Josue, ɓɛɛ nin-a hur dam fara lɛŋ.