Read Northwest Gbaya JOSUE 8 Bible Online

JOSUE 8 - Northwest Gbaya bible

JOSUE 8

¹Nɛ mɔ'ɔ nɛ GASA WAN tɔ̧ɔ̧ ha̧ Josue: «Ká kíì de mɛ na, ká tɛ-mɛ gbin na. Mɛ̀ káí o wi-biro kɔ-mɛ lɛŋ, mɛ̀ kúr mɛ̀ nɛ́ɛ̀ bí Ai. Mi ee wannu Ai in o bíí kɔ̧-a̧ in gasa ye kɔ̧-a̧, in nù kɔ̧-a̧ kɔ̧ er-mɛ.

²Mɛ tɛ de mɔ in Ai in wannu kɔ‘i hee mɔ'ɔ nɛ mɛ dee so nɛnɛ in Jeriko in wannu kɔ‘i ga, ɓɛɛ ɛnɛ nyɛma mɛ kai o mɔ in mɔ-dai kɔ̧-a̧ nɛ mɔɔ-oi biro. Ɛ̀nɛ̀ tóm o ŋma wi-biro nɛ́ɛ̀ hu̧si ɗoŋ ye'i.»

³Nɛ mɔ'ɔ nɛ Josue in o wi-biro lɛŋ kura mɛ nɛ̀ɛ́ bi Ai. A̧ hoka o ŋgaŋa wi-biro booro-ɓu-taar, ɓɛɛ a̧ tom wa yak mɛ zɛ.

⁴A̧ tɔ̧ɔ̧ ha̧ wa hee mɔ'ɔ ga: «Ɛ̀nɛ̀ zɔk; ɛ̀nɛ̀ nɛ́ɛ̀ hú̧sì ɗoŋ ye, bo nɛ́ nɛ̀ nyɛi̧a-a gan na, ɓɛɛ ɛ̀nɛ̀ dúk tɛ pɛma mɔ.

⁵K’ɛɛ in o bíí nɛ a̧a̧ in am, ɛɛ tɛ ɗɔŋ siti si saaye Ai, ɓɛɛ ŋgimbi nɛ wa tɛ gbo mɛ bi yɛ hee kuti-a ga, ɛɛ tɛ yu mɔ ti wa.

⁶Wa tɛ ndak ɗoŋ yɛ, ɓɛɛ ɛɛ ɔra wa nyɛi̧ nɛ saaye, wen wa tɛ ta kɔ-wa ndé, ɛɛ yuu mɔ ti wi hee kuti-a ga;

⁷ɓɛɛ nɛ́ ŋgimbi'i ɛ̀nɛ̀ tɛ gbo nɛnɛ nɛ fara hu̧sa̧-a̧, ɓɛɛ ɛnɛ baa ye nɛ GASA WAN Sɔ̧ k’ɛ́nɛ́ tɛ e kɔ̧ er'nɛ‘i.

⁸Ŋgimbi n’ɛnɛ baa ye kaɗi, ɛnɛ tɛ pi̧ wee sɛnɛ; ɛnɛ tɛ de mɔ nyɛm nɛ ɗoŋ wen ko GASA WAN. Tɔ̧ɔ̧-wen kɔ‘m h’ɛ́nɛ́ nɛ mɔ‘i.»

⁹Josue foo wa yaknɛ, ɓɛɛ wa yak si fara-hu̧sa̧-a̧; wa nɛɛ hu̧si mgbara Bɛtɛl in Ai, nɛ ká̧ Ai nɛ war yee-wese. Josue ɔɔ kɔ‘i wese'i mgbara o dukbíí.

¹⁰Josue kura mɛ tutuyɛ sut, ɓɛɛ a̧ tɔr o bíí lɛŋ. A̧ duka ti ha̧ gíí wi-biro, a̧ in o gasawi Israɛl, ɓɛɛ a̧ ba biro duk nɛ̀ Ai.

¹¹O wi-biro nɛ yaa in a̧ daŋa ɓɛɛ nɛ si mgbák ká̧ ye. Wa ɔɔ ká̧ Ai nɛ war ká̧-zan-mɛ́-ŋgɔn, ɓɛɛ nɛ́ gboŋgo a̧ gɔna mgbara wa in Ai.

¹²Josue hoka so o ŋma bíí hee booro-mɔɔrɔ ga, ɓɛɛ a̧ hu̧si wa mgbara Bɛtɛl in Ai nɛ ká̧ Ai si war yee-wese.

¹³Ɗoŋ nɛ o dɔka wi-biro baa gbagari nɛ war ká̧-zan-mɛ́-ŋgɔn ká̧ ye, in nɛ̀ o ŋma hu̧sa̧ kɔ‘i nɛ war yee-wese kaɗi, Josue zira si bɔkɔ-nù mɛ zɛ‘i.

¹⁴Ŋgimbi nɛ wannu Ai zɔka mɔ‘i, a̧ kura in o wi-biro kɔ̧-a̧ mɛ tutuyɛ nɛ haya-a mɛ nɛ̀ɛ́ bi Israɛl sɛn fara nɛ wa bíí so kuti biro sɛnɛ nɛ duka so si war kɔ̧ ɗɔŋgɔ Jurdɛn. Wa iŋ so kɔ-wa ndé, o ŋma bíí hu̧sa̧ so nɛ ɗoŋ ye na.

¹⁵Josue in o be Israɛl lɛŋ dee hee wa de nɛ̀ kíì ga, ɓɛɛ wa yu mɔ si ŋga-gbárà.

¹⁶O bíí nɛ yaa saaye lɛŋ ndaka ɗoŋ wa nɛ̀ zɔm gayamɔ; ɓɛɛ ndáká ɗoŋ Josue nɛ wa ndak'i, ɗoŋ wa a̧ nyɛi̧ nɛ̀ ye'i.

¹⁷Sɛn Ai in Bɛtɛl, ŋma wiwii nɛ gbo mɛ ndak o be Israɛl na bo na. Wa ee so nú garo ye bóóŋ ŋgimbi nɛ wa ndak nɛ ɗoŋ o be Israɛl‘i.

¹⁸GASA WAN tɔ̧ɔ̧ ha̧ Josue: «Mɛ̀ nyɛ́í̧ sɛ́ɛ̀ er-mɛ‘i si saaye Ai, wen mi tɛ e a̧ kɔ̧ er-mɛ.» Josue nyɛi̧a sɛ́ɛ̀ nɛ a̧a̧ er si war saaye.

¹⁹Ŋgimbi n'aa nyɛi̧a er-a, o wi nɛ hu̧sa̧ so gboo nɛ haya-a nɛ fara kɔ-wa, ɓɛɛ wa ma yì ye saaye; wa baa ye, ɓɛɛ wa pi̧ wee sɛnɛ.

²⁰O bíí Ai zika tɛ, ɓɛɛ wa zɔk zi-wee nɛ tur nɛ saaye kɔ-wa si yiwese. Wa iŋ fara nɛ wa tɛ yu mɔ si sɛnɛ na. O be Israɛl nɛ yuu so mɔ si ŋga-gbárà zika tɛ sitɛ o wi-ndak-pata wa.

²¹Ŋgimbi nɛ Josue in o be Israɛl zɔka o wi nɛ hu̧sa̧ so baa ye, ɓɛɛ nɛ̀ zi-wee ku̧u̧ naŋ tura-a, wa zika tɛ-wa mɛ bi o be Ai.

²²O wan nɛ yee so saaye Ai mbɛt gboo mɛ bi wa. O wisɛn duka see-a, ɓɛɛ o be Israɛl gbɛ wa lɛŋ. Wa e ŋma bíí kpasa na.

²³War ko wannu Ai, wa baa a̧ nɛ̀ kpasa, ɓɛɛ wa mgbɔ a̧ nɛnɛ ha̧ Josue.

²⁴Ŋgimbi nɛ o be Israɛl kaɗa gbɛɛ o be Ai nɛ gba-paa sɛn zaŋbɛɛ in sɛn ŋga-gbárà fara nɛ wa ndaka so wa si sɛnɛ‘i kaɗi, wa pia ɗoŋ pii Ai, ɓɛɛ wa gbɛ oi bíí lɛŋ nɛ gba-paa.

²⁵O bíí lɛŋ nɛ wa gbɛa sɛn saaye wese'i nɛ́ bíí booro-ɓu-zua-yiitoo; mɛ̀ nɛ́ o wiwii in o okoo saaye Ai lɛŋ.

²⁶Josue nyɛi̧a kànà nɛ́ er nɛ oi sɛ́ɛ̀ hegɔɔ hɔ ŋgimbi nɛ wa kuma o be Ai lɛŋ.

²⁷Mɔɔ-oi biro nɛ Israɛl kaia nɛ́ o mɔ-dai in ŋma demɔ saaye'i nyɛm nɛ ɗoŋ wen nɛ GASA WAN tɔ̧ɔ̧ so ha̧ Josue.

²⁸Josue dɔɔ ye Ai lɛŋ, ɓɛɛ ye'i kifi nɛ bɛɛ-oi, fara nɛ̀ bíí bo sɛnɛ na hɔ sɔsɔɔ.

²⁹War ko wannu Ai, a̧ ga̧i̧a a̧ tɛ ŋma te hɔ ga̧a̧mɔ, ɓɛɛ tɛ yee-wese, a̧ tɔ̧ɔ̧ ha̧ wa mɛ zir wɔr-aa tɛ te. Wa baa a̧ pi̧ nú ye, ɓɛɛ wa yumbi ta zu a̧. Ta nɔ‘i a̧ ya hɔ sɔsɔɔ‘i.

³⁰Josue mboo fara-ɗafi-sɔ̧ ha̧ GASA WAN Sɔ̧ ko Israɛl sɛn zu kaya Ebal,

³¹nyɛm nɛ ɗoŋ mɔ nɛ Moisɛ wi-de-tom ko GASA WAN tɔ̧ɔ̧ so ha̧ o be Israɛl. Mɔ‘i yɔra sɛn zaŋ kalata Heembea ko Moisɛ. Wa dee fara-ɗafi-sɔ̧‘i nɛ̀ o ta nɛ boi fo na. Wa dɔɔ kpoo-sɔ̧ zu a̧, ɓɛɛ wa ɗafi sɔ̧-gaŋmɔ sɛnɛ mbɛt.

³²Josue yɔra Heembea nɛ Moisɛ yɔra so ha̧ o be Israɛl sɛn zu o ta nɔ‘i.

³³O be Israɛl lɛŋ in o gasawi kɔ-wa in o wi-duk-zu wa in o wi-gɔn-kita kɔ-wa ká bá nɛ̀ o gɛnɛ nɛ ɔ mgbara wa yaa ká̧ Kuɓa nɔɔ-tɔk ko GASA WAN nɛ ká̧ a̧ yiitoo nyɛm nɛ̀ ti o wi-ɗafi-sɔ̧, o be Levii nɛ tui Kuɓa nɔɔ-tɔk ko GASA WAN. Reeta dukbíí yaa nɛ war ká̧ kaya Garizim, reeta nɛ war ká̧ kaya Ebal, wa dee hegɔ nyɛm nɛ ɗoŋ mɔ nɛ Moisɛ wi-de-tom ko GASA WAN tɔ̧ɔ̧ so ha̧ wa mɛ de, wen toka de yoŋgo zu o be Israɛl.

³⁴Ɗoŋ mɔ‘i, Josue tɔra o gba̧a̧ wen lɛŋ nɛ yɔra zaŋ kalata Heembea, a̧ tɔra de yoŋgo in fom mbɛt.

³⁵Josue tɔra mɔ nɛ Moisɛ yɔra so lɛŋ ti gíí be Israɛl; a̧ e ŋma gba̧a̧ wen kpɔk duk na. A̧ tɔra mɔ‘i ti o okoo, o obem in o gɛnɛ nɛ a̧a̧ mgbara wa mbɛt.