Read Northwest Gbaya JOSUE 9 Bible Online

JOSUE 9 - Northwest Gbaya bible

JOSUE 9

¹O wannu lɛŋ nɛ ɔ kur Jurdɛn sɛn zu kaya, sɛn hira-nù in ká̧ ŋgere Gba-tɔp hɔ nɛnɛ sɛn Libaŋ, o be Hit, o be Amɔr, o be Kanaŋ, o be Periz, o be Hiv in o be Jebus zia mɔ‘i.

²Wa ee nú wa kpɔk mɛ ba biro duk nɛ̀ Josue in o be Israɛl.

³Ɓɛɛ o be Gabaɔŋ nɛ zia so nyɛrɛ mɔ nɛ Josue dee sɛn Jeriko in Ai kaɗi,

⁴dee gɔn-ta mɛ ɔr o be Israɛl. Wa kaia o a̧ka̧ bufu in gba̧‘a̧ dak dɔ̧ɔ̧ nɛ wa fura fur a zu tuifuu kɔ-wa.

⁵Wa aa a̧ka̧ ndárà nɛ wa fura fur naŋ-wa. Wa aa o a̧ka̧ laa tɛ-wa, ɓɛɛ wa kai kora brɛt in o ɓusu-a.

⁶Nɛ mɔ'ɔ nɛ wa nɛɛ kpa Josue sɛn kɔ̧ gbagari Gilgal, ɓɛɛ wa tɔ̧ ha̧ a̧ in o be Israɛl: «Ɛɛ tɛ nɛ̀ nyɛi̧a fara; kinii, ɛ̀nɛ̀ nɔ́ tɔk in yɛɛ na nde?»

⁷O be Israɛl kifa nú ha̧ o be Hiv nɔ‘i: «Ŋmafara ɛnɛ ɔ mgbara yɛ hɛ̧ɛ̧, héé ge ɛɛ tɛ nɔ tɔk in'nɛ̀ɛ́ ge nde?»

⁸Wa kifa nú ha̧ Josue: «Ɛɛ nɛ o wi-de-tom k’ɛ́nɛ́.» Josue aka wa: «Ɛnɛ nɛ o, ɛnɛ tɛ nɛ déè?»

⁹Wa kifa nú ha̧ a̧: «O wi-de-tom k’ɛ́nɛ́ tɛ nɛ̀ nyɛi̧a fara wen nin GASA WAN Sɔ̧ k’ɛ́nɛ́. Ɛɛ zia nyɛrɛ hura nin-a in mɔ n'aa dee sɛn Egiptɛ lɛŋ,

¹⁰in mɔ lɛŋ n'aa dee in o wannu Amɔr yiitoo nɛ ɔɔ so nɛ kur Jurdɛn: Sihɔŋ wannu Hɛsbɔŋ in Og wannu Basaŋ nɛ ɔ so sɛn Astarot.

¹¹Mɛ nɛ wen hegɔ, o gasawi k’ɛɛ in o bíí nù k’ɛɛ tɔ̧a̧ h’ɛ́ɛ́‘e, ɛɛ mɔi̧ nyɔŋmɔ wen yuwar, ɓɛɛ ɛ̀ɛ̀ tɛ́ɛ̀ kpá‘nɛ́; ɛ̀ɛ̀ tɔ̧́ h’ɛ́nɛ́ ndé, ɛɛ nɛ o wi-de-tom k’ɛ́nɛ́, kinii, ɛ̀nɛ̀ nɔ́ tɔk in yɛɛ.

¹²Ɛ̀nɛ̀ zɔ́k brɛt k’ɛɛ, ɛɛ kaia nɛ mbe wee-aa ŋgimbi n’ɛɛ ɗafa nɛ mɔ sɛn kɔ̧ tua k’ɛɛ n’ɛɛ kura sɛnɛ mɛ tɛ pii tɛ‘nɛ́; zɔk kinii, kora kor kútú-kútú.

¹³O dak dɔ̧ɔ̧ nɔ'ɔ n’ɛɛ aa dɔ̧ɔ̧ kɔ̧ a̧ nɛ mbe-a, kinii wa gboo gboo; laa k’ɛɛ in o ndárà k’ɛɛ ɗaŋa wen nyɛi̧a naŋanɔ n’ɛɛ nɛa.»

¹⁴O be Israɛl kpɛka nyɔŋmɔ kɔ-wa, ɓɛɛ wa ak mɔ in GASA WAN zu mɔ‘i na.

¹⁵Josue kpɛka wa tɛ ga̧a̧mɔ, ɓɛɛ nɔ tɔk in wa ndé, wi beka gbɛ wa na. O gasawi Israɛl kana mɔ zu nɔɔ-tɔk'i mbɛt.

¹⁶Zɛ taar ɗoŋ nɔɔ-tɔk‘i, o be Israɛl zia'e ndé, o wi nɔ‘i ɔ katɛ wa in mgbara wa mbɛt.

¹⁷O be Israɛl kura ɓɛɛ wa ye tɛ o ye nɔ‘i tɛ taar zɛ; o ye nɔ‘i kɔ-wa'i nɛ Gabaɔŋ, Kɛfira, Bɛrot in Kiriat-Yearim.

¹⁸O be Israɛl gbɛ wa na, wen o gasawi Israɛl kana so mɔ ha̧ wa nɛ nin GASA WAN Sɔ̧ ko Israɛl, ɓɛɛ o bíí ku̧i̧ mɔ zu o gasawi kɔ‘i.

¹⁹O gasawi tɔ̧ɔ̧ ha̧ wa: «Ɛɛ kana mɔ ha̧ wa nɛ nin GASA WAN Sɔ̧ ko Israɛl. Nɛ́ mɔ‘i s’ɛɛ beka nyɛm mɛ de ŋma ɗaŋmɔ in wa na.

²⁰Mɔ n’ɛɛ tɛ de in wa nɛ mɔ'ɔ: ɛɛ beka gbɛ wa na, wen k’ɛɛ tɛɛ fo nyimsea ko Sɔ̧ pii zu yɛ, wen zu kanamɔ n’ɛɛ kana so ha̧ wa.»

²¹Hee mɔ'ɔ nɛ o gasawi tɔ̧ɔ̧ ha̧ o bíí‘e wi nɔ‘i tɛ ya kpasa ga, o wi nɔ‘i kifa nɛ o wi-gɔm-gua in o wi-ɗu-yì ha̧ o dɔka be Israɛl, nyɛm nɛ ɗoŋ mɔ nɛ o gasawi tɔ̧a̧ ha̧ wa.

²²Josue saa o be Gabaɔŋ, ɓɛɛ tɔ̧ ha̧ wa: «Wen ge ɛnɛ ɔra yɛ tɔ̧ nɛnɛ ndé, ɛnɛ tɛ nɛ̀ nyɛi̧a fara ge? Bo nɛ ɛnɛ ɔ mgbara yɛ hɛ̧ɛ̧ na nde?

²³Kinii, fom baa'nɛ. O bíí k’ɛ́nɛ́ lɛŋ tɛ ya nɛ o wi-de-tom: o wi-gɔm-gua in o wi-ɗu-yì wen tua ko Sɔ̧ kɔ‘m.»

²⁴Wa kifa nú ha̧ Josue: «Ɛɛ zia so nyɛrɛ mɔ nɛ GASA WAN Sɔ̧ k’ɛ́nɛ́ tɔ̧ɔ̧ so ha̧ Moisɛ wi-de-tom kɔ̧-a̧ ndé, wi tɛ ha̧ nù'ɛ h’ɛ́nɛ́, ɓɛɛ ɛnɛ tɛ gbɛ o bíí nú'ɛ yinɛ lɛŋ. Kíí tɛ‘nɛ́ dee yɛ nyɛmna, ɓɛɛ s’ɛɛ de gɔn-ta in'nɛ̀ɛ́.

²⁵Kinii, ɛɛ a̧a̧ ɗɔɔ ŋgai k’ɛ́nɛ́; ɛ̀nɛ̀ dé mɔ in yɛɛ hee mɔ'ɔ nɛ see'nɛ́ kɔ̧a̧ ga.»

²⁶Josue dee mɔ in wa hee mɔ‘i ga, ɓɛɛ a̧ gbo wa ɗɔɔ ŋgai ko o be Israɛl; wa gbɛ wa na.

²⁷Wese'i Josue ee wa nɛ̀ o wi-gɔm-gua in o wi-ɗu-yì ha̧ o bíí lɛŋ in si fara-ɗafi-sɔ̧ sɛn fara nɛ GASA WAN tɛ hok. Wa de kana nɛ tom'i hɔ sɔsɔɔ.