Read Northwest Gbaya 2 TESALONIK 1 Bible Online

2 TESALONIK 1 - Northwest Gbaya bible

2 TESALONIK 1

¹Nɛ́ mi Paul in Silas ká bá nɛ̀ Timotee a̧ tom kalata’ɛ ha̧ zuduk bíí ko Krist sɛn Tesalonik nɛ̀ ya nɛ́ o bíí ko Sɔ̧ Dáà k’ɛ́ɛ́ in Gasa Wan Jesu Krist.

²Deemɔ nɛ̀ ta-tɛ in ga̧a̧mɔ ko Sɔ̧ Dáà, in ko Gasa Wan Jesu Krist a̧ dúk in'nɛ̀ɛ́.

³Ɛ́ɛ́ tɛ́ de osoko ha̧ Sɔ̧ ɓɔnsɛnɛ wen zu'nɛ́, o nya-ɛɛ; ɔ dee h’ɛ́ɛ́ mɛ́ de hegɔ, wen kɔ̧ɔ̧ɗɔɔwen k’ɛ́nɛ́ nɛ́ nɛ̀ɛ́ siti nyɛmna, ɓɛɛ kɔ̧ɔ̧mɔ k’ɛ́nɛ́ in o ŋmaa gasi gasi siti sɛn mgbara'nɛ́ lɛŋ.

⁴Mɛ̀ nɛ́ wen hegɔ s’ɛ́ɛ́ dúk tɛ-ɛɛ nɛ̀ ɛ́nɛ́ mgbara o zuduk bíí ko Sɔ̧, wen zu nɔɔ-ŋgiɗi in kɔ̧ɔ̧ɗɔɔwen k’ɛ́nɛ́ zaŋ bɔnɛ in o weamɔ n’ɛnɛ nyɔŋ nin'nɛ́ zu-a'i lɛŋ.

⁵O bɔnɛ nɔ‘i usi nɛ́ gɔna-kita ko Sɔ̧ nɛ̀ yuwar-a; mɔɔ nɔ‘i hɔ zu'nɛ́ h’ɛ́nɛ́ mɛ́ nyɛm sɛnɛ wen Wan ko Sɔ̧, n’ɛnɛ zɔk bɔnɛ wen-aa'i.

⁶Nɛ̀ mbetɛ, nyɛma so kànà ha̧ Sɔ̧ mɛ́ nasi o wi-nasi'nɛ́,

⁷ɓɛɛ a̧ ha̧a̧ ɔma-tɛ h’ɛ́nɛ́, o wi nɛ̀ wa nasi'i, in yɛɛ kpɔk, ŋgimbi nɛ̀‘i tɛ́ zɔk Gasa Wan tɛ pia ɗoŋ nɛ̀ yiwese in o betom kɔ̧-a̧ zaŋ ŋgayamɔ kɔ̧-a̧.

⁸A̧ tɛ́ tɛ̀ zaŋ nyɛka leɓe-wee mɛ́ kifi er ha̧ o bíí nɛ̀ iŋ Sɔ̧ na, in nɛ̀ mbo zu tɛ De Mbe Wen ko Gasa Wan k’ɛ́ɛ́ Jesu na.

⁹Bɔnɛ kɔ-wa nɛ́ ɗaŋa wa nɛ̀ Gasa Wan tɛ́ ɗaŋ kpoo nɛ kpoo yinɛ yí-a nyɛi̧ nɛ̀ gasamɔ kɔ̧-a̧.

¹⁰Ŋgimbi n'aa tɛ́ pii nɛ̀ ɗoŋ, wese'i, o sa̧a̧-bíí kɔ̧-a̧ tɛ́ gas'a, o bíí lɛŋ nɛ̀ kɔ̧ɔ̧ ɗɔaa ha̧ a̧ tɛ́ zɔn a̧; war k’ɛ́nɛ́, ɛ́nɛ́ kɔ̧ɔ̧ so ɗɔɔ sedaako k’ɛ́ɛ́ mbɛt.

¹¹Mɛ̀ nɛ́ wen hegɔ s’ɛ́ɛ́ kɔfi Sɔ̧ ɓɔnsɛnɛ wen ha̧ Sɔ̧ k’ɛ́ɛ́ mɛ́ de h’ɛ́nɛ́ mɛ́ nyɛm yí sara n'aa saa nɛ̀ ɛ́nɛ́‘i, in tɛ́ ŋgayamɔ kɔ̧-a̧ a̧ a̧ dé h’ɛ́nɛ́ mɛ́ de demɔ lɛŋ n’ɛnɛ kɔ̧a̧, in a̧ a̧ dé ha̧ kɔ̧ɔ̧ɗɔɔwen k’ɛ́nɛ́ mɛ́ nɛ̀ siti mbɛt.

¹²Hegɔ, nin Gasa Wan k’ɛ́ɛ́ Jesu tɛ́ hur wen zu'nɛ́, ɓɛɛ nin'nɛ́ mbɛt tɛ hur wen zu a̧ nyɛm nɛ̀ ɗoŋ deemɔ nɛ̀ ta-tɛ ko Sɔ̧ k’ɛ́ɛ́ in Gasa Wan Jesu Krist.