Read Northwest Gbaya 2 TESALONIK 2 Bible Online

2 TESALONIK 2 - Northwest Gbaya bible

2 TESALONIK 2

¹O nya'm, zu mɔ ko pia-ɗoŋ ko Gasa Wan k’ɛ́ɛ́ Jesu Krist, in mɔi̧a-ŋmaa n’ɛ̀ɛ̀ tɛ́ mɔi̧ katɛ a̧, ɛ́ɛ́ ak nɛ́ ɛ́nɛ́:

²k’ɛ́nɛ́ sakali zu'nɛ́ in k’ɛ́nɛ́ de kíì, wen zu ŋma tɔ̧ɔ̧-wen oi nú Sɔ̧, kóó ŋma tɔ̧ɔ̧-wen nɛtɛ, koo wa a̧ tɔ̧‘e nɛ́ ŋma kalata a̧ tɛ̀ɛ́ nɛ̀ tɛ́ yɛ mɛ́ de h’ɛ́nɛ́ mɛ́ kɔ̧ ɗɔaa'e, wese ko Gasa Wan hɔɔ kaɗi wó, na.

³Kóó tɛ́ ge yuwar ge, ká ŋma bíí ɔr'nɛ́ sɛnɛ na. Nɛti ha̧ wese'i mɛ́ hɔ, o bíí nɛ̀ dɔka-a tɛ́ e yuwar kɔ̧ɔ̧ɗɔɔwen duk, ɓɛɛ Wan-ɗaŋ nɛ̀ tɛ́ yɔ‘i, tɛ́ usi tɛ̀ sɛ.

⁴Wi’ɛi tɛ́ ba zu dúk nɛ̀ mɔ lɛŋ nɛ̀‘i sa'e sɔ̧, in nɛ̀‘i gasi; a̧ tɛ́ nɛ̀ɛ́ duk kɔ̧ tua ko Sɔ̧, ɓɛɛ tɔ̧a̧‘e wi nɛ́ Sɔ̧.

⁵Tɛ‘nɛ́ mbaŋ ɗoŋ wen n'am tɔ̧ɔ̧ so h’ɛ́nɛ́ ŋgimbi n'am duka nɛnɛ in'nɛ̀ɛ́ na nde?

⁶Ɓɛɛ ɛ́nɛ́ iŋa mɔ nɛ̀ dor wi’ɛi tɛ tɛa-a kinii; mɛ̀ nɛ́ wen ha̧ a̧ mɛ́ hɔ tɛ́ ŋgimbi kɔ̧-a̧.

⁷Kinii ŋgayamɔ ko mɔɔ-ɗaŋ a̧a̧ tɛ́ tom, ɓɛɛ mɛ̀ nɛ́ wen ha̧ wi’ɛi nɛ̀ dor a̧‘i mɛ́ yu,

⁸sɛka Wan-ɗaŋ usa tɛ. Búk mɛ́ kɔ̧ nú Gasa Wan Jesu tɛ́ ɗaŋ a̧, ɓɛɛ sa̧a̧mɔ pia-ɗoŋ kɔ̧-a̧ dee ha̧ a̧ mɛ́ kifi geemɔ.

⁹Nɛ́ ŋgayamɔ ko Satan a̧ Wan-ɗaŋ tɛ́ tɛ̀ nɛnɛ, de nɛ̀ o ŋgayamɔ nɛtɛ nɛtɛ lɛŋ, o mɔɔ-kifi, o mɔɔ-gɔn-ɗɛɗɛ-ɔr-bíí,

¹⁰ká bá nɛ̀ o ɗaŋ yuwar ɔramɔ lɛŋ wen o wi nɛ̀ tɛ́ yɔ, wen wa kɔ̧ so kpɛka kpasawen nɛ̀ tɛ̀ɛ́ kpasi so wa na.

¹¹Mɛ̀ nɛ́ hegɔ sa Sɔ̧ tóm ŋma ŋgayamɔ-yɔ-wi nɛ̀ de ha̧ wa mɛ́ a̧r in ha̧ wa mɛ́ kɔ̧ ɗɔɔ ndela,

¹²wen ha̧ a̧ mɛ́ gɔn kita zu o bíí nɛ̀ kɔ̧ ɗɔɔ kpasawen na, ɓɛɛ nɛ̀ ya nɛ̀ desee wen deemɔ nɛ̀ yuwar-a na.

¹³War k’ɛ́ɛ́, ɛ́ɛ́ tɛ́ duk tɛ̀ dee osoko ha̧ Sɔ̧ ɓɔnsɛnɛ wen'nɛ́, o nya-ɛɛ nɛ̀ Gasa Wan kɔ̧ɔ̧ nyɛmna, wen Sɔ̧ hoka so'nɛ́ nɛ̀ ku̧u̧naŋ-a mɛ h’ɛ́nɛ́ mɛ́ kpasi nɛ̀ ɗoŋ Sa̧a̧ Ɔmi nɛ̀ de ha̧ war-tɛ-wi mɛ́ sa̧, in nɛ̀ ɗoŋ kɔ̧ɔ̧ɗɔɔwen tɛ́ kpasawen.

¹⁴Nɛ́ mɔ‘i á̧ à̧ saa nɛ̀ ɛ́nɛ́ tɛ́ De Mbe Wen n’ɛ̀ɛ̀ usa, h’ɛ́nɛ́ mɛ́ kpa gasamɔ ko Gasa Wan k’ɛ́ɛ́ Jesu Krist.

¹⁵Hegɔ, o nya-ɛɛ, ɛ̀nɛ̀ yór nɛ̀ nɔa-a, ɛ̀nɛ̀ kásí o mɔ n’ɛ̀ɛ̀ usa h’ɛ́nɛ́ tɛ tɔ̧a̧-a̧ nɛ̀ nú, kóó tɛ yɔra-a zaŋ kalata mbɛt, nɛ̀ de-a.

¹⁶Gasa Wan k’ɛ́ɛ́ Jesu Krist nɛ̀ tɛ-wi in Sɔ̧ Dáà k’ɛ́ɛ́ nɛ̀ kɔ̧ɔ̧ yɛ, ɓɛɛ ha̧ nɔɔ-ŋgiɗi kpoo nɛ kpoo in de mɔɔ-e-nɛ̀-ta h’ɛ́ɛ́ nɛ̀ ɗoŋ deemɔ nɛ̀ ta-tɛ kɔ̧-a̧,

¹⁷a̧ gá̧ see'nɛ́ de nɛnɛ h’ɛ́nɛ́ mɛ́ yor nɛ̀ nɔa-a tɛ́ mɔ lɛŋ nɛ̀ ɔ dee, kóó nɛ́ deemɔ, kóó tɔ̧ɔ̧-wen.