Read Northwest Gbaya 2 TESALONIK 3 Bible Online

2 TESALONIK 3 - Northwest Gbaya bible

2 TESALONIK 3

¹Hegɔ o nya-ɛɛ, ɛ̀nɛ̀ kɔ́fí Sɔ̧ wen yɛ, wen ha̧ wen ko Gasa Wan mɛ́ pɛsi nɛnɛ nɛ̀ haya-a in ha̧ o bíí mɛ́ zɔn wen'i hee mɔ'ɔ nɛ̀ de mgbara'nɛ́ ga.

²Ɛ̀nɛ̀ kɔ́fí Sɔ̧ mbɛt wen h’ɛ́ɛ́ mɛ́ gbo er o wi-ɗaŋ in o ɗaŋ-bíí wen bó nɛ́ wa lɛŋ a̧ a̧a̧ nɛ̀ kɔ̧ɔ̧ɗɔɔwen na.

³Gasa Wan nɛ́ wi-yor-ɗoŋ wen kɔ‘i; a̧ tɛ́ de h’ɛ́nɛ́ mɛ́ yor nɛ̀ nɔa-a, ɓɛɛ a̧ tɛ́ pɛm'nɛ́ wen Wan-ɗaŋ.

⁴Wen zu Gasa Wan, ɛ́ɛ́ iŋa nɛ̀ mbetɛ‘e, war k’ɛ́nɛ́, mɔ n’ɛ̀ɛ̀ tɔ̧́, ɛ́nɛ́ de dee, ɓɛɛ ɛ́nɛ́ tɛ́ de kànà hegɔ nɛnɛ siti mbɛt.

⁵Gasa Wan a̧ ír see'nɛ́ sitɛ kɔ̧ɔ̧mɔ ko Sɔ̧ in tɛ́ nɔɔ-ŋgiɗi ko Krist.

⁶O nya-ɛɛ, ɛ́ɛ́ tɔ̧ mbɔrɔ h’ɛ́nɛ́ nɛ̀ nin Gasa Wan Jesu Krist; k’ɛ́nɛ́ gbam in ŋma nya'nɛ́ nɛ̀ duk nɛ́ wi-tɛɛri na, nɛ̀ deemɔ kɔ̧-a̧ nyɛm ɗoŋ mɔ n’ɛ̀nɛ̀ zɔka tɛ̀ yɛ na mbɛt.

⁷K’ɛ́nɛ́, ɛ́nɛ́ iŋa hee ge ɛ̀nɛ̀ tɛ́ zɔk nɛ̀ ɗoŋ duka-a k’ɛ́ɛ́ ga. Bó nɛ́ ɛ́ɛ́ yaa so nɛ́ o wi-tɛɛri mgbara'nɛ́ na.

⁸Ɛ́ɛ́ ak ŋma bíí mɛ́ ha̧ mɔɔ-nyɔŋ h’ɛ́ɛ́ na, ɓɛɛ ɛ́ɛ́ dee tom zɛ nɛ wese, zɔk nɛ̀ bɔnɛ, mbɔi nɛnɛ wen k’ɛ́ɛ́ tɛɛ duk hee tui ga zu ŋma bíí mgbara'nɛ́.

⁹Nɛ̀ mbetɛ, ɛ́ɛ́ a̧a̧ so nɛ̀ ŋgai mɛ́ nyɔŋ mɔ k’ɛ́nɛ́, ɓɛɛ ɛ́ɛ́ de hegɔ na, k’ɛ̀nɛ̀ zɔk ɗoŋ deemɔ k’ɛ́ɛ́.

¹⁰Hegɔ, ŋgimbi n’ɛ́ɛ́ yaa so nɛnɛ in'nɛ̀ɛ́, ɛ́ɛ́ tɔ̧ɔ̧ so h’ɛ́nɛ́ hee mɔ'ɔ ga: «Kà ŋma bíí nɛ́ kɔ̧ɔ̧ dee tom na, ká a̧ nyɔŋ mɔ na mbɛt!»

¹¹Ɛ́ɛ́ zia'e o ŋma bíí a̧a̧ mgbara'nɛ́ nɛ̀ ya de nɛ̀ tɛɛri, kíí nɛ̀ wen, wa kɔ̧ dee ŋma mɔ na.

¹²Ɛ́ɛ́ tɔ̧ wen’ɛ tɔ̧ nɛ̀ mbɔrɔ ha̧ o wi nɔ‘i nɛ̀ nin Gasa Wan Jesu Krist'e: wa a̧ dé tom nɛ̀ de-a, ɓɛɛ wa a̧ nyɔ́ŋ nɛ́ mɔɔ-oi-tom nɛ̀ er-wa dea.

¹³Ɓɛɛ war k’ɛ́nɛ́, o nya-ɛɛ, k’ɛ́nɛ́ mbɔi tɛ́ dee demɔ na.

¹⁴Kà ŋma bíí mbo zu tɛ́ wen n’ɛ̀ɛ̀ tɔ̧ zaŋ kalata’ɛ na, ɛ̀nɛ̀ zɔ́k wi’ɛi ŋgaɓo, k’ɛ́nɛ́ gbam in a̧ na, wen ha̧ foe mɛ́ de a̧.

¹⁵Ɓɛɛ bó nɛ́ h’ɛ́nɛ́ mɛ́ zɔk a̧ hee wisɛn ga na; ɛ̀nɛ̀ gáí nɛ́ a̧ hee nya'nɛ́ ga ɛ̧.

¹⁶Gasa Wan, wan-ga̧a̧mɔ a̧ há̧ ga̧a̧mɔ h’ɛ́nɛ́ nɛ tɛ-a ɓɔnsɛnɛ tɛ yuwar lɛŋ nɛtɛ nɛtɛ. Gasa Wan a̧ dúk in'nɛ̀ɛ́ lɛŋ.

¹⁷Fanamɔ'ɛ nɛ́ mi Paul a̧ yɔr nɛ̀ er-am. Nɛ́ hegɔ a̧‘m yɔr nɛ̀ nin-am ndaa o kalata kɔ‘m kpɔk kpɔk; mɔ'ɔ nɛ́ yɔramɔ kɔ‘m.

¹⁸Deemɔ nɛ̀ ta-tɛ ko Gasa Wan k’ɛ́ɛ́ Jesu Krist a̧ dúk in'nɛ̀ɛ́ lɛŋ.