Read Northwest Gbaya 1 TIMOTEE 3 Bible Online

1 TIMOTEE 3 - Northwest Gbaya bible

1 TIMOTEE 3

¹Wen’ɛ nyɛma ha'i mɛ́ e nɛ̀ ta! Kà ŋma bíí nɛ́ kɔ̧ɔ̧ mɛ́ duk zu zuduk bíí ko Krist, mɔ‘i nɛ́ tu̧u̧-tɛ-tom a̧ a̧ hoka.

²Wi’ɛi tɛ́ duk nɛ́ bíí nɛ̀ wen bó zu a̧ na, nɛ̀ a̧a̧ nɛ̀ kóò kpɔk, nɛ̀ kasi zu, nɛ̀ de mɔ nyɛm sɛnɛ nɛ̀ yuwar-a; a̧ tɛ́ duk nɛ́ wi-kpɛk-gɛnɛ, nɛ̀ nyɛma usa mɔ.

³A̧ beka duk nɛ́ wi-nɔ-dɔ̧ɔ̧ in wi-de-ŋgamɔ na; a̧ tɛ́ duk nɛ́ wi-mɔka-see, ga̧a̧-wi, nɛ̀ kii wen na, in nɛ̀ e see tɛ̀ mbɔi na mbɛt.

⁴Wi’ɛi tɛ́ iŋ zɔka o bíí kɔ̧ tua kɔ‘i nɛ̀ de-a, nɛ̀ o bem kɔ̧-a̧ mbo zu ha̧ a̧ tu̧ nɛ̀ tɛ-a mbɛt.

⁵Kà ŋma bíí iŋ zɔka o bíí kɔ̧ tua kɔ‘i nɛ̀ de-a na, héé ge a̧ tɛ́ iŋ kasa zuduk bíí ko Sɔ̧ nɛ̀ de-a ge?

⁶A̧ beka duk nɛ́ bíí nɛ̀ kɔ̧ɔ̧ ɗɔaa nɛ̀ mbe-a na, wen ká a̧ tɛ́ɛ̀ ŋmaŋ tɛ, tik nɛnɛ ɗɔɔ kpɔk kita ko Satan.

⁷A̧ tɛ́ duk nɛ́ wi nɛ̀ o bíí mɛ́ zan tɛ́ zɔn duka-a kɔ̧-a̧, wen ká ziimɔ in tuia-pɛr ko Satan tɛ́ɛ̀ ba a̧.

⁸O wi-gbak-bíí mbɛt a̧ yá nɛ́ o tu̧u̧-tɛ-bíí, o wi-tɔ̧-kpasawen nɛ̀ nɔ dɔ̧ɔ̧ yak zale na, nɛ̀ nyɔŋ yí bíí na.

⁹Wa tɛ́ kasi ɗukamɔ ko kɔ̧ɔ̧ɗɔɔwen tɛ taamɔ nɛ̀ ɔ sa̧a̧.

¹⁰A'i wé wa nɛti; kà‘i nɛ́ kpaa ŋma mɔ mɛ́ tɔ̧ zu wa na, ɓɛɛ sɛka'i ee wa tɛ́ tom-gbaka-bíí.

¹¹O kóò kɔ-wa mbɛt a̧ yá nɛ́ o tu̧u̧-tɛ okoo nɛ̀ kai ndaa ŋmá-wa na, nɛ̀ kasi zu, nɛ̀ mbo zu nɛ̀ de-a tɛ́ mɔ lɛŋ.

¹²O wi-gbak-bíí tɛ́ duk nɛ́ o bíí nɛ̀ a̧a̧ nɛ̀ kóò kpɔk, nɛ̀ zɔk o bem kɔ‘i in o bíí kɔ̧ tua kɔ‘i mbɛt nɛ̀ de-a.

¹³O wi-gbak-bíí nɛ̀ de tom kɔ‘i nɛ̀ yuwar-a tɛ́ duk nɛ́ gasawi, ɓɛɛ wa tɛ́ kpa gasa mɔɔ-e-nɛ-ta tɛ kɔ̧ɔ̧ɗɔɔwen nɛ̀ a̧a̧ tɛ Jesu Krist.

¹⁴Mi yɔr mɔ'ɔ ha̧ mɛ́, tɛ taa-a'e ɗoŋ-aa beka nyɛi̧ na, ɓɛɛ mi nɛ̀ɛ́ mɛ́ zɔk mɛ́.

¹⁵Mɔ kpɔk, kà‘m hɔ́ nɛ̀ haya-a na, kalata-a tɛ́ usi yuwar duka-a ha̧ mɛ́ kɔ̧ tua ko Sɔ̧, nɛ̀ duk nɛ́ zuduk bíí ko Sɔ̧ nɛ̀ duk kpasa; zuduk bíí‘i nɛ́ naŋ-tua in mbiŋ nɛ̀ tɔi kpasawen e ŋgɔn.

¹⁶Nɛ̀ mbetɛ, ɗukamɔ nɛ̀ duk zaŋ yuu Sɔ̧ k’ɛ́ɛ́ ɔ gasa: A̧ tɛ̀ɛ́ tɛ́ mur-tɛ, Sa̧a̧ Ɔmi dee sedaako zu a̧; o betom mɛ yiwese yeŋa a̧, bíí tɔ̧ɔ̧ wen kɔ̧-a̧ mgbara o gɔni-dùk; o bíí zaŋnu kɔ̧ɔ̧ ɗɔaa ha̧ a̧, ɓɛɛ Sɔ̧ baa a̧ si ŋgɔn tɛ gasamɔ.