Read Northwest Gbaya 1 TIMOTEE 4 Bible Online

1 TIMOTEE 4 - Northwest Gbaya bible

1 TIMOTEE 4

¹Sa̧a̧ Ɔmi tɔ̧ɔ̧ nɛ̀ sa̧a̧-a̧‘e: tɛ́ sɔŋkur ŋgimbi o ŋma bíí tɛ́ bɛ̧ kɔ̧ɔ̧ɗɔɔwen mɛ́ ndaɗi in o taamɔ-ɔr-mɔ in usamɔ ko o ɗaŋ-sɔ̧.

²Wa tɛ́ a̧r wen zu dee mɔɔ-see-yiitoo ko o wi-ndela nɛ̀ ndɔla-ɗaŋmɔ dira see-wa hee wee-boi ga.

³O wi nɔ‘i tɛ́ dor o bíí tɛ baa-ŋmaa, in tɛ nyɔŋa o ŋma nyɔŋmɔ, ɓɛɛ nɛ́ Sɔ̧'ɔ̧ dee o nyɔŋmɔ nɔ‘i ha̧ o wi-mbo-zu ha̧ a̧, nɛ̀ iŋa mgbák kpasawen mɛ́ nyɔŋ, de nɛ̀ osoko-a.

⁴Wen mɔ lɛŋ nɛ̀ Sɔ̧ dea nɛ́ demɔ; mɔ nɛ̀‘i dee osoko ha̧ Sɔ̧ zu-a kaɗi, wi beka bɛ̧ na.

⁵Wen ko Sɔ̧ in kɔfa-sɔ̧ ɗafa war nyɔŋmɔ‘i kaɗi.

⁶Mɛ̀ wé ɗoŋ mɔ‘i lɛŋ ha̧ o nya-mɛ; hegɔ mɛ́ tɛ́ duk nɛ́ kpasa wi-de-tom ko Jesu Krist, nɛ̀ dai tɛ̀ nɛ̀ wen nɛ̀ a̧a̧ tɛ kɔ̧ɔ̧ɗɔɔwen in de usamɔ nɛ̀ tɛ-mɛ haia so sɛnɛ tɛ yamba-a.

⁷Ká mɛ́ tɔ̧ faɓa nyɛrɛ hee to ko o sɔka okoo ga na, ɓɛɛ mɛ̀ é see-mɛ́ tɛ yuu Sɔ̧.

⁸Ŋmasa tɛ-wi ha'i mɛ́ kpa ŋgai gbak wi gbak tɛ́ mɔ tikiɗi; ɓɛɛ yuu Sɔ̧ gbak wi tɛ́ mɔ lɛŋ. Bó nɛ́ yuu Sɔ̧ a̧a̧ nɛ̀ ha̧a̧nú wen duka-a, wan mɛ́ kinii, in wan mɛ́ siti mɛ mbɛt na nde?

⁹Wen’ɛ nɛ́ wen-e-nɛ-ta, nɛ̀ nyɛma ha̧ bíí lɛŋ mɛ́ kpɛk war kpɔk.

¹⁰Kóó ɛ́ɛ́ zɔk nɛ́ bɔnɛ bi nɛ̀ biro tɛ yuwar'i, mɛ̀ nɛ́ wen n’ɛ̀ɛ̀ ee ta nɛ̀ Sɔ̧ nɛ̀ duk kpasa, Wan-kpasi o bíí lɛŋ, gan gan o wi nɛ̀ kɔ̧ɔ̧ ɗɔaa.

¹¹Mɔ nɛ̀ mɛ tɛ́ usi tɔ̧ nɛnɛ ha̧ bíí mɛ́ de nɛ́ mɔ‘i.

¹²Hee mɔ'ɔ nɛ̀ mɛ́ nɛ́ be-ŋgaiwi ga, ká mɛ́ e ha̧ ŋma bíí mɛ́ e mɛ́ tɛ geemɔ na. Ɓɛɛ o wi nɛ̀ kɔ̧ɔ̧ ɗɔaa a̧ zɔ́k ɗoŋ mɔ tɛ̀ mɛ́, tɛ tɔ̧ɔ̧-wen, tɛ deemɔ, tɛ kɔ̧ɔ̧mɔ, tɛ kɔ̧ɔ̧ɗɔɔwen in tɛ duka-a nɛ̀ sa̧a̧-a̧.

¹³Mɛ̀ é see-mɛ tɛ tɔra wen ko Sɔ̧ ha̧ o bíí, tɔ̧ nɛ̀ mbɔrɔ, usi nɛ̀ mɔ ha̧ wa hɔ ŋgimbi n'am tɛ́ hɔ.

¹⁴Ká mɛ́ e ha̧a̧mɔ nɛ̀ ta-tɛ ko Sɔ̧ nɛ̀ duk tɛ-mɛ ha̧ mɛ́ duk géè na, wen mɛ̀ nɛ́ tɛ̀ tɔ̧ɔ̧ wen ko o wi-tɔ̧-wen oi nú Sɔ̧ in tɛ̀ ee er zu mɛ́ ko o kuti-wi á̧ mɛ́ kpaa nɛnɛ.

¹⁵Mɔ nɛ̀ mɛ tɛ́ kasi kɔ̧ see-mɛ́ in mɔ nɛ̀ mɛ tɛ́ yor zu-a nɛ́ mɔ‘i; hegɔ, o bíí lɛŋ tɛ́ zɔk'e mɛ́ nɛ́ nɛ̀ɛ́ siti.

¹⁶Mɛ̀ zɔ́k tɛ-mɛ́ nɛ̀ de-a in yuwar usamɔ kɔ-mɛ mbɛt. Mɛ̀ é see-mɛ́ sɛnɛ. Kà mɛ nɛ́ dee hegɔ, ɓɛɛ mɛ́ tɛ́ kpasi tɛ-mɛ nɛ̀ tɛ-mɛ in o bíí nɛ̀ zii wen kɔ-mɛ mbɛt.