Read Northwest Gbaya 1 TIMOTEE 5 Bible Online

1 TIMOTEE 5 - Northwest Gbaya bible

1 TIMOTEE 5

¹Ká mɛ́ gai sɔkawi nɛ̀ ŋgai na, ɓɛɛ mɛ̀ tɔ̧́ mbɔrɔ ha̧ a̧ hee a̧ nɛ́ dáà kɔ-mɛ ga. Mɛ̀ zɔ́k o daŋa ŋgaiwi hee o nya-mɛ ga;

²mɛ̀ zɔ́k o gasa okoo hee o nàà kɔ-mɛ ga, ɓɛɛ mɛ̀ zɔ́k o boko-bem hee o boko-nya-mɛ ga, tɛ duka-a nɛ̀ sa̧a̧-a̧.

³Mɛ̀ tú̧ tɛ o ko-gera nɛ̀ duk nɛ́ ko-gera nɛ̀ mbetɛ.

⁴Kà ŋma ko-gera nɛ́ bòó nɛ̀ bem in o be-koo, nɛ̀ o bem nɔ‘i a̧ yámbí yuu Sɔ̧ tɛ deemɔ nɛ̀ de-a in o mgbák bíí kɔ̧ tua kɔ-wa, kifi nɛ̀ er dee demɔ siɗoŋ ha̧ o dáà in nàà kɔ-wa. Mɔ nɛ̀ nyɛma yí Sɔ̧ nɛ̀ mbetɛ nɛ́ mɔ‘i.

⁵War ko mgbák ko-gera nɛ̀ duk ɛ̀nɛ̀, a̧ a̧ é ta nɛ̀ Sɔ̧, e nɛ̀ see tɛ aia-nú in kɔfa-sɔ̧ zɛ nɛ wese.

⁶Ɓɛɛ war ko ko-gera nɛ̀ ye kɔ‘i nɛ tɛ mɔɔ-desee, kóó a̧ duk kpasa, a̧ fee so kaɗi.

⁷Ɓɛɛ mɛ̀ mbáŋ tɛ o ko-gera zu mɔ‘i wen ká‘i tɛ́ɛ̀ kpa ŋma wen mɛ́ tɔ̧ zu wa.

⁸Wi nɛ̀ zɔk o bíí kɔ‘i nɛ̀ de-a na, gan gan o bíí kɔ̧ tua kɔ̧-a̧, wi’ɛi kafa kɔ̧ɔ̧ɗɔɔwen, a̧ ɗaŋa gan wi nɛ̀ kɔ̧ ɗɔaa na.

⁹Ko-gera nɛ̀ mɛ tɛ́ yɔr nin-a mgbara o dɔka-a, nɛ́ wan nɛ̀ pɛ-a ku̧naŋ ɓu-mɔɔrɔ-ɗoŋ-kpɔk yaknɛ, nɛ̀ a̧a̧ so nɛ̀ wíì kpɔk ɓɛɛ.

¹⁰A̧ tɛ duk nɛ́ okoo nɛ̀‘i iŋa wen zu dee demɔ kɔ̧-a̧: tɛ daia o bem kɔ̧-a̧, tɛ kpɛka gɛnɛ, tɛ fɔra naŋ o sa̧a̧-bíí, tɛ gbaka o wi-bɔnɛ; a̧ a̧ dúk kànà nɛ́ okoo nɛ̀ ee see tɛ dee demɔ lɛŋ.

¹¹War ko o ko-gera nɛ̀ ɓɔna nɛ̀ ŋgai, mɛ̀ é wa duk, wen ŋgimbi nɛ̀ dee wɔ-tɛ tɛ́ de ha̧ wa mɛ́ zik ɗoŋ e ha̧ Krist, wa tɛ́ kii mɛ́ ba mbe wíì.

¹²Hegɔ, kita tɛ́ tik wa, wen wa ee kuti ha̧a̧nú kɔ-wa duk.

¹³Woyo mbɛt, hee mɔ'ɔ nɛ̀ wa bó nɛ̀ mɔ mɛ́ de na ga, wa ya ndɛn nɛ̀ nú tua nɛnɛ; zu-a'i wa bur nɛ́ wen, dali nɛ̀ wen, tɔ̧ nɛ̀ wen nɛ̀ wa nyɛm mɛ́ tɔ̧ na.

¹⁴Mi kɔ̧ɔ̧ kɔ‘m ha̧ o ko-gera nɛ̀ ɓɔna nɛ̀ ŋgai mɛ́ ba mbe wíì, wa a̧ kó bem, wa a̧ zɔ́k tua-wíì kɔ-wa nɛ̀ de-a, wen ká o wi-kur-zu yɛ tɛ́ɛ̀ kpa yuwar mɛ́ tɔ̧ ŋma wen zu yɛ.

¹⁵O ŋma mgbara wa a̧ra̧ ndak nɛ̀ ɗoŋ Satan.

¹⁶Kà ŋma okoo nɛ̀ kɔ̧ɔ̧ ɗɔaa nɛ́ bòó nɛ̀ ko-gera mgbara o nam kɔ‘i, ɓɛɛ kóò‘i a̧ nɛ́ɛ̀ gbák wa, wen ká tɛ̀ɛ́ duk nɛ́ tui zu zuduk bíí ko Krist, wen ha̧ zuduk bíí ko Krist mɛ́ kpa fara wen gbaka o kpasa ko-gera.

¹⁷O kuti-wi nɛ̀ de tom kɔ‘i nɛ̀ yuwar-a, nyɛma ha'i mɛ́ zɔn wa batɛ, gan gan o wan nɛ̀ e see tɛ tɔ̧ɔ̧ wen ko Sɔ̧, usi nɛnɛ mbɛt.

¹⁸Nɛ́ mɔ‘i a̧ Yɔramɔ tɔ̧a̧‘e: «Mɛ́ beka hɛr nú ndai ŋgimbi n'aa duk tɛ ŋmáá gba̧a̧-nyɔnɔ na,» ɓɛɛ tɔ̧ɔ̧ woyo'e: «Wi-de-tom tɛ́ kpa kànà mɔɔ-oi-tom kɔ‘i.»

¹⁹Ká mɛ́ kpɛk baa wen ko bíí zu kuti-wi bee na, hɔ ŋgimbi nɛ̀ o bíí yiitoo kóó taar dee sedaako-a sɛ.

²⁰Mɛ̀ gáí o wi-de-ɗaŋmɔ ɓɔn yí bíí lɛŋ, wen ha̧ kíì mɛ́ de o dɔka-a.

²¹Mi ee mɛ́ in Sɔ̧, in Jesu Krist, ká bá nɛ̀ o betom mɛ yiwese nɛ̀ Sɔ̧ hoka, mɛ̀ mbo zu tɛ usamɔ nɔ'ɔ, ɓɛɛ ká mɛ́ kɛ̧ mgbara bíí na, in ká mɛ́ hok bíí hok gbak nɛ̀ wa na.

²²Ká mɛ́ e er zu bíí nɛ̀ haya-a na, ká mɛ́ ye zaŋ ɗaŋmɔ ko ŋma bíí na mbɛt, ɓɛɛ mɛ̀ zɔ́k tɛ-mɛ nɛ̀ sa̧a̧-a̧.

²³Ká mɛ́ nɔ́ nɛ́ yì ɓɛɛ na. Mɛ̀ nɔ́ be dɔ̧ɔ̧ tikiɗi wen zaŋ-mɛ in wen o be zɛɛ nɛ̀ de mɛ́ dɔ̧ɔ̧-dɔ̧ɔ̧‘i.

²⁴O ŋma bíí a̧a̧ sɛnɛ nɛ̀‘i zɔk ɗaŋmɔ kɔ-wa kaɗi, sɛka'i gɔna kita zu wa; ɓɛɛ ko o ŋma, wi gɔn kita zu wa kaɗi sɛka'i zɔka ɗaŋmɔ‘i.

²⁵O de tom mbɛt, wi zɔk kànà zɔk; ɓɛɛ wan nɛ̀‘i zɔk na beka ɓɔn nɛ̀ hu̧sa̧-a̧ ɓɔnsɛnɛ na.