Read Northwest Gbaya 1 TIMOTEE 6 Bible Online

1 TIMOTEE 6 - Northwest Gbaya bible

1 TIMOTEE 6

¹O bíí lɛŋ nɛ̀ duk nɛ́ bara a̧ zɔ́k o dáa-bara kɔ‘i nɛ́ bíí nɛ‘i nyɛma mɛ́ tu̧ tɛ-wa nɛ̀ mbetɛ, wen ká nin Sɔ̧ in usamɔ k’ɛ́ɛ́ tɛ̀ɛ́ ɗaŋ.

²O bara a̧ tú̧ tɛ o dáa-bara kɔ‘i nɛ̀ kɔ̧ɔ̧ ɗɔaa; ká wa de ŋgazu e nɛ̀ wen ndé, wa nɛ́ o nya kɔ‘i na. Ɓɛɛ wa a̧ dé tom ha̧ wa nɛ̀ de-a gan kuti-a, wen o bara nɔ‘i gbak nɛ́ o nya yɛ n’ɛ̀ɛ̀ kɔ̧ɔ̧ nyɛmna nɛ̀ kɔ̧ɔ̧ ɗɔaa ha̧ Sɔ̧. Mɔ nɛ̀ mɛ tɛ́ usi tɔ̧ nɛnɛ ha̧ bíí mɛ́ de nɛ́ mɔ‘i.

³Kà ŋma bíí úsí ŋma usamɔ nɛtɛ, kà a̧ ndáɗí in mgbák wen ko Gasa Wan k’ɛ́ɛ́ Jesu Krist, in usamɔ nyɛm nɛ̀ ɗoŋ yuu Sɔ̧ na mbɛt,

⁴ŋmaŋa-tɛ boma yí wi’ɛi kaɗi. A̧ nɛ́ wi nɛ̀ iŋ mɔ na, wi-zika-zu nɛ̀ aŋ nɛ́ wen a ŋgɔn, si nɛ̀ káfɛ́ tɛ́ wen nɛtɛ nɛtɛ; nɛ́ tɛ́ mɔ‘i a̧ aa-see-mɔ, kpɛri, dara, ɓira-wen-ndela,

⁵in zaŋa-wen nɛ̀ kaɗi na mgbara o bíí nɛ̀ taamɔ kɔ-wa ɗaŋa, tɛ́ nɛnɛ. Kpasawen bó tɛ-wa na, ɓɛɛ wa ta kɔ-wa'e yuu Sɔ̧ nɛ́ yuwar-kpaamɔ.

⁶Nɛ̀ mbetɛ, yuu Sɔ̧ nɛ́ yuwar-kpaamɔ wen wi nɛ̀ duk nɛ̀ desee zu mɔ n'aa a̧a̧ nɛnɛ.

⁷Wen bó nɛ́ ɛ́ɛ́ baa ŋma mɔ tɛ́ nɛnɛ zaŋnu’ɛ na; kale-a mbɛt, ɛ́ɛ́ beka ba ŋma mɔ yaknɛ na.

⁸Ɛ́ɛ́ nɛ́ kpaa nyɔŋmɔ in laa-pi̧-tɛ-yɛ, ɛ̀ɛ̀ dúk nɛ̀ desee.

⁹O wi nɛ̀ kɔ̧ɔ̧ mɛ́ kpa mbɔi nɛ̀ dɔka-a, ɓan na, wa tika tɛ weamɔ nɛ̀ duk nɛ́ pɛ́r-ba-wa, in tɛ ɗaŋ wɔ-mɔ nɛ̀ bó nɛ́ kpasamɔ na. Nɛ́ mɔ‘i a̧ de ha̧ bíí mɛ́ tik yɔ nɛnɛ mbɛt.

¹⁰Tugun ɗaŋmɔ nɛtɛ nɛtɛ lɛŋ nɛ́ wɔ-sede; nɛ́ wɔ-sede a̧ dee ha̧ o ŋma bíí mɛ́ a̧r nyɛi̧ nɛ̀ kɔ̧ɔ̧ɗɔɔwen, dak nɛ̀ o mɔɔ-dita-see nɛtɛ nɛtɛ pi̧ zu wa.

¹¹Ɓɛɛ kɔ-mɛ, bíí ko Sɔ̧, mɛ̀ yú pɛrti o mɔɔ nɔ‘i. Mɛ̀ kíí nɛ́ deemɔ nɛ̀ yuwar-a, yuu Sɔ̧, kɔ̧ɔ̧ɗɔɔwen, kɔ̧ɔ̧mɔ, nɔɔ-ŋgiɗi in ga̧a̧-see.

¹²Mɛ̀ bí kpasa biro kɔ̧ɔ̧ɗɔɔwen, ha̧ mɛ́ mɛ́ kpa duka-kpasa kpoo nɛ kpoo nɛ̀ Sɔ̧ saa so mɛ́ wen-aa, hee mɔ'ɔ nɛ̀ mɛ́ gbara so nɛnɛ ti o gíí wi-sedaako ga.

¹³Mi tɔ̧ wen’ɛ ha̧ mɛ́ sɛn ti Sɔ̧ nɛ̀ de ha̧ mɔ lɛŋ mɛ́ duk kpasa, in sɛn ti Jesu Krist nɛ̀ dee so sedaako ti Pɔns Pilat, gbar nɛ̀ kɔ̧ɔ̧ɗɔɔwen.

¹⁴Mɛ̀ kásí heembea dúk nɛnɛ nɛ̀ sa̧a̧-a̧, nɛ̀ ŋma mɔ mɛ́ tɔ̧ zu bo na, hɔ ŋgimbi nɛ̀ Gasa Wan k’ɛ́ɛ́ Jesu Krist tɛ́ pii nɛ̀ ɗoŋ.

¹⁵Tɛ́ ŋgimbi nɛ̀ Sɔ̧ gɔna, Sɔ̧ tɛ́ de ha̧ a̧ mɛ́ pii ɗoŋ: Sɔ̧ nɛ́ Wan-desee nɛ́ a̧ kpɔk a̧ duk zu mɔ lɛŋ; a̧ nɛ́ Wannu ko o wannu, Gasa Wan ko o gasa wan.

¹⁶A̧ kpɔk ɓɛɛ a̧ fe na, a̧ duk tɛ̀ sa̧a̧mɔ nɛ̀‘i nyɛm mɛ́ hɔ sɛnɛ na; ŋma bíí kpɔk nɛ̀ zɔka a̧ bo na, ŋma bíí nɛ̀ tɛ́ zɔk a̧ bo na mbɛt. Gasamɔ in ŋgayamɔ a̧ dúk nɛ́ kɔ̧-a̧ kpoo nɛ kpoo! Aamɛn.

¹⁷Mɛ̀ tɔ̧́ mbɔrɔ ha̧ o wanmbɔi zaŋnu’ɛ ndé, ká wa gásí zu zu mbɔi na, ká wa é ta nɛ̀ kpaamɔ nɛ̀ ɓan na, ɓɛɛ kaɗa na, ɓɛɛ wa a̧ e tá nɛ̀ Sɔ̧, wan nɛ̀ ha̧ o demɔ lɛŋ nɛ̀ dɔka-a h’ɛ́ɛ́, wen h’ɛ́ɛ́ mɛ́ kpa desee sɛnɛ.

¹⁸Wa a̧ dé nɛ́ demɔ, kpaamɔ kɔ-wa a̧ dúk nɛ́ dee demɔ; er-wa a̧ hú̧í̧ tɛ̀ ha̧a̧mɔ, wa a̧ kɛ̧́ mɔ kɔ-wa in o ŋma bíí.

¹⁹Hegɔ wa tɛ́ mɔi̧ de kpasa mbɔi wen wa nɛ̀ tɛ-wa wen ŋgimbi siti ha̧ wa mɛ́ kpa mgbák duka-kpasa.

²⁰Timotee, mɛ̀ zɔ́k mɔ nɛ̀‘i ee er mɛ́‘i nɛ̀ de-a. Ká mɛ́ ndak ɗoŋ ɗaŋ géé bura-wen in sii-kafɛ-ndela nɛ̀ wa ta'e nɛ́ iŋamɔ na.

²¹O ŋma bíí yora ɗoŋ taamɔ nɔ‘i, ɓɛɛ a̧r tɛ kɔ̧ɔ̧ɗɔɔwen. Deemɔ nɛ̀ ta-tɛ ko Sɔ̧ a̧ dúk in'nɛ̀ɛ́!