Read Northwest Gbaya 2 TIMOTEE 2 Bible Online

2 TIMOTEE 2 - Northwest Gbaya bible

2 TIMOTEE 2

¹Bem kɔ‘m, mɛ̀ ŋgáí tɛ-mɛ tɛ deemɔ nɛ̀ ta-tɛ nɛ̀ a̧a̧ tɛ Jesu Krist.

²Mɛ́ yamba mɔ er-am ti o gíí wi-sedaako; mɛ̀ úsí mɔ‘i ha̧ o mgbák bíí nɛ̀ nyɛma usa-a siti ha̧ o ŋma bíí mbɛt.

³Mɛ̀ kpɛ́k war bɔnɛ kɔ-mɛ hee kpasa wi-biro ko Jesu Krist ga.

⁴Bíí nɛ̀ a̧a̧ tɛ tom-sooza beka ye zaŋ deemɔ ko o géé bíí na, kà a̧ nɛ́ kɔ̧ɔ̧ mɛ́ de mɔ nyɛm see wi nɛ̀ baa a̧‘i.

⁵Kale-a mbɛt, nɛ́ wi nɛ̀ a yaa-gan-ŋmaa nɛ̀ yuwar-a a̧ kpa mɔɔ-oi-aa.

⁶Nɛ́ wi-wa-fɔ nɛ̀ zɔk bɔnɛ-fɔ a̧ tɛ́ kpa nyɔnɔ-a nɛti.

⁷Mɛ̀ tá mɔ zu mɔ n'am tɔ̧ ha̧ mɛ‘i, ɓɛɛ nɛ́ Gasa Wan a̧ tɛ́ usi mgbara mɔ‘i lɛŋ ha̧ mɛ́.

⁸Tɛ-mɛ a̧ mbáŋ ɗoŋ Jesu Krist, nɛ̀ kura ŋgɔn tɛ́ fio, nɛ̀ duk nɛ́ bezaŋ David nyɛm nɛ̀ ɗoŋ De Mbe Wen n'am usi'i.

⁹Ndaa bɔnɛ n'am zɔk hɛ̧ɛ̧ hɔ nɛnɛ tɛ̀ hɛra'm nɛ̀ nyak-zɔɓɔ hee wi-de-ɗaŋmɔ ga'i nɛ́ mɔ‘i. Ɓɛɛ bó nɛ́ wen ko Sɔ̧ a'i hɛra na.

¹⁰Nɛ́ mɔ‘i s'am nyɔŋ nin-am tɛ́ mɔ lɛŋ wen zu o bíí nɛ̀ Sɔ̧ hoka ha̧ wa mbɛt mɛ́ kpa duka-kpasa nɛ̀ a̧a̧ tɛ Jesu Krist in gasamɔ nɛ̀ tɛ́ duk kpoo nɛ kpoo.

¹¹Wen’ɛ nyɛma ha'i mɛ́ e nɛ̀ ta: «K’ɛ̀ɛ̀ nɛ́ fee in a̧, ɛ́ɛ́ tɛ́ duk kpasa in a̧ mbɛt;

¹²k’ɛ̀ɛ̀ nɛ́ zɔka bɔnɛ in a̧, ɛ́ɛ́ tɛ́ ɔ wan in a̧; k’ɛ̀ɛ̀ káf'a, a̧ tɛ́ kafi ɛ́ɛ́ mbɛt;

¹³ɓɛɛ k’ɛ̀ɛ̀ yór ɗoŋ ha̧a̧nú k’ɛ́ɛ́ ha̧ a̧ na, a̧ beka e ha̧a̧nú kɔ̧-a̧ dúk na, wen a̧ nyɛm mɛ́ kafi tɛ-a nɛ̀ tɛ-a na.»

¹⁴Mɛ̀ mbáŋ tɛ̀ o bíí tɛ mɔ‘i lɛŋ tɔ̧ nɛnɛ ha̧ wa nɛ̀ sa̧a̧-a̧ ti Sɔ̧‘e, ká wa yé zaŋ sii-kafɛ tɛ wen nɛtɛ nɛtɛ na, wen o mɔɔ nɔ‘i gbak bíí na, ɓɛɛ de dee ha̧ o wi-zia-a mɛ́ yɔ.

¹⁵Mɛ̀ kíí mɛ́ duk yí Sɔ̧ hee bíí nɛ̀ nyɛma sɛnɛ ga; mɛ̀ dúk nɛ́ wi-de-tom nɛ̀ de foe-tom kɔ‘i na, nɛ̀ usi nɛ́ wen nɛ̀ duk nɛ́ kpasawen nɛ̀ de-a.

¹⁶Ká mɛ yé tɛ bura o ɗaŋ wen na, wen mɔ‘i de ha̧ o wi-tɔ̧a̧-a̧ mɛ a̧r tɛ́ mɔ ko Sɔ̧ siti.

¹⁷Wen ko wi nɔ‘i duk hee gba-da̧i̧ nɛ̀ mira nyɔŋ nɛnɛ siti ga. O pɛrti wi nɔ‘i nɛ́ Himenee in Filetos.

¹⁸Wa a̧ra̧ e kpasawen duk tɛ ta-a'e, kura-ŋgɔn tɛ fio dee kaɗi; hegɔ wa ɗaŋa kɔ̧ɔ̧ɗɔɔwen ko bíí nɛ̀ dɔka-a.

¹⁹Kóó hegɔ mbɛt, naŋ-tua nɛ̀ Sɔ̧ ea nɛ̀ ŋgaya-a a̧ duk'i, ɓɛɛ tumbal-wen-aa nɛ́ mɔ'ɔ: «Gasa Wan iŋa o bíí kɔ‘i,» in mbɛt: «Kóó o ndé nɛ̀ sa nin Gasa Wan à̧ é ɗaŋmɔ dúk.»

²⁰Bó nɛ́ o nyɛk-lɔr in o nyɛk-bu-mbɔi ɓɛɛ a̧ duk kɔ̧ gasa tua na, o nyɛk-te in o wan mɛ́ gìì a̧a̧ sɛnɛ mbɛt; o ŋma nɛ́ wen dee tu̧u̧-tɛ-tom, ɓɛɛ o ŋma nɛ́ wen géé tom lɛŋ.

²¹Wi nɛ̀ ɗafi war-tɛ wen o ndiŋmɔ nɔ‘i tɛ́ duk nɛ́ tu̧u̧-tɛ-nyɛk: war nyɛk'i ɔ sa̧a̧-a̧, tɛ́ gbak Wan-aa, ɓɛɛ duka wen dee tom lɛŋ.

²²Ká mɛ de wɔ-mɔ ko o ŋgaiwi na, mɛ̀ kíí nɛ́ deemɔ nɛ̀ yuwar-a, kɔ̧ɔ̧ɗɔɔwen, kɔ̧ɔ̧mɔ in duka-a tɛ ga̧a̧mɔ in o wi-sa̧a̧-see nɛ̀ sa nin Gasa Wan.

²³Mɛ̀ é mgbélé sárá ndaa-wen nɛ̀ gba̧a̧-a̧ bo na dúk, wen mɔ‘i dak nɛ́ kpɛri pi̧ nù mgbara o bíí sɔɔ géè.

²⁴Wi-de-tom ko Gasa Wan beka kpɛr na; a̧ tɛ́ duk nɛ̀ de-a in o bíí lɛŋ, a̧ tɛ́ duk nɛ́ bíí nɛ̀ nyɛma mɛ́ usi mɔ, nɛ̀ de nyimsea nɛ̀ haya-a na.

²⁵A̧ tɛ́ usi mɔ nɛ̀ munyal ha̧ o wi-si-kafɛ; ŋmafara Sɔ̧ tɛ́ de ha̧ wa mɛ́ kpai duka-a kɔ-wa mɛ́ iŋ kpasawen,

²⁶ɓɛɛ zu-wa tɛ pii ɗoŋ; hegɔ, wa tɛ́ gbo tɛ́ yɔk ko wan-ɗaŋmɔ nɛ̀ baa so wa nɛ̀ bara mɛ́ de mɔ n'aa kɔ̧a̧.