Read Northwest Gbaya TITƐ 2 Bible Online

TITƐ 2 - Northwest Gbaya bible

TITƐ 2

¹Ɓɛɛ kɔ-mɛ, mɛ̀ úsí mɔ nyɛm nɛ̀ ɗoŋ kpasa usamɔ.

²Mɛ̀ tɔ̧́ ha̧ o sɔkawi mɛ́ zɔk tɛ-wa tɛ deemɔ kɔ-wa; wa a̧ dé nɛ́ tu̧u̧-tɛ-mɔ, wa a̧ kásí zu-wa, wa a̧ dúk nɛ̀ kpasa kɔ̧ɔ̧ɗɔɔwen, nɛ̀ kɔ̧ɔ̧mɔ in nɛ̀ nɔɔ-ŋgiɗi mbɛt.

³Mɛ̀ tɔ̧́ kalemɔ‘i ha̧ o gasa okoo mbɛt, wen ha̧ wa mɛ́ de mɔ hee o bíí nɛ̀ deemɔ kɔ-wa ɔ sa̧a̧ ga: ká wa bá nin bíí na, in ká wa dúk bara-dɔ̧ɔ̧ na mbɛt, ɓɛɛ wa a̧ úsí nɛ́ ɗoŋ dee demɔ ha̧ o bíí,

⁴tɔ̧ nɛ̀ mbɔrɔ ha̧ o be-zɔŋa mɛ́ kɔ̧ wíì in o bem kɔ-wa,

⁵wen ha̧ wa mɛ́ kasi zu zɔk nɛ̀ tɛ-wa kɔ̧ tua-wíì, ɗafi nɛ̀ tua kɔ-wa nɛ̀ de-a, mbo nɛ̀ zu ha̧ wíì mbɛt, wen ká o bíí tɛ̀ɛ́ e wen ko Sɔ̧ tɛ̀ geemɔ.

⁶Mɛ̀ tɔ̧́ mbɔrɔ ha̧ o be-ŋgaiwi mbɛt ha̧ wa mɛ́ kasi zu

⁷tɛ mɔ lɛŋ. Ɓɛɛ war kɔ-mɛ, wi tɛ́ zɔk nɛ́ ɗoŋ dee demɔ tɛ-mɛ: usa mɔ nɛ̀ sa̧a̧-a̧, duka-a nɛ̀ tu̧u̧-tɛ,

⁸in tɔ̧ɔ̧ de wen nɛ̀ ŋma bíí beka nyar ndaa-a na; hegɔ o wi-kur-zu mɛ́ beka kpa ŋma wen mɛ́ tɔ̧ zu yɛ na, ɓɛɛ foe baa wa.

⁹O bara a̧ mbó zu ha̧ o dáa-bara kɔ‘i tɛ́ mɔ lɛŋ. Wa a̧ dé mɔ de tɛ́ wan kɔ-wa, ɓɛɛ ká wa bɛ̧ deemɔ nɛ̀ wan kɔ-wa tɔ̧a̧ na.

¹⁰Ká wa ɓɔ́ŋ mɔ na, ɓɛɛ wa a̧ mbó zu nɛ̀ kpasa-a ɓɔnsɛnɛ; hegɔ, duka-a kɔ-wa tɛ́ tu̧ tɛ usamɔ nɛ̀ zɔk nɛ́ Sɔ̧, Wan-kpasi yɛ, tɛ́ mɔ lɛŋ.

¹¹Wen deemɔ nɛ̀ ta-tɛ ko Sɔ̧ usa tɛ̀ kaɗi; nɛ́ mɔ‘i a̧ duk nɛ́ tugun yuwar-kpasa-a ko o bíí lɛŋ.

¹²Ɓɛɛ nɛ́ deemɔ nɛ̀ ta-tɛ ko Sɔ̧ a̧ úsí h’ɛ́ɛ́ mɛ́ bɛ̧ sɛna Sɔ̧ in dee wɔ-mɔɔ-zaŋnu, ɓɛɛ h’ɛ́ɛ́ mɛ́ kasi zu, de nɛ̀ mɔ nɛ̀ yuwar-a, yu nɛ̀ Sɔ̧ tɛ́ ŋgimbi’ɛ,

¹³pɛm nɛ̀ gba demɔ nɛ̀ tɛ́ hɔ in gasamɔ ko gasa Sɔ̧ k’ɛ́ɛ́ in Wan-kpasi yɛ Jesu Krist nɛ̀ tɛ́ usi tɛ̀.

¹⁴A̧ ha̧a̧ tɛ-a nɛ̀ tɛ-a wen yɛ, mɛ́ gɔn zu yɛ tɛ o ɗaŋmɔ lɛŋ yinɛ, mɛ́ de yɛ nɛ̀ sa̧a̧ dukbíí kɔ̧-a̧, nɛ̀ tɛ́ de wɔ dee demɔ.

¹⁵Mɛ̀ nɛ́ hegɔ a̧ mɛ̀ tɛ́ tɔ̧ nɛ̀ wen, tɔ̧ nɛ̀ mbɔrɔ ha̧ o bíí, gai nɛ̀ wa nɛ̀ kpasa-a mbɛt, ká ŋma bíí kpɔk e mɛ́ tɛ geemɔ na.