Read Northwest Gbaya TITƐ 3 Bible Online

TITƐ 3 - Northwest Gbaya bible

TITƐ 3

¹Mɛ̀ mbáŋ tɛ̀ o bíí lɛŋ mɛ́ mbo zu ha̧ o wannu, in o gasawi; wa a̧ mbó zu ha̧ wa, ɓɛɛ ká wa nik naŋ-wa tɛ dee mɔ lɛŋ nɛ ɔ dee na.

²Ká wa dá̧ o bíí na, ká wa kíí wen na mbɛt; wa a̧ yá nɛ̀ de-a, ɓɛɛ wa a̧ dúk nɛ̀ mɔka-see ɓɔnsɛnɛ in o bíí lɛŋ.

³Wen nɛti mbɛt, ɛ́ɛ́ yaa so nɛ́ o wi nɛ̀ bó nɛ̀ kpasa taamɔ na, o wi-ŋgazu, o wi-yɔ-kaya, o bara-wɔ-mɔ in desee nɛtɛ nɛtɛ. Ɛ́ɛ́ yaa so tɛ̀ dee ɗaŋ in aa-see-mɔ; o bíí sɛna yɛ, ɓɛɛ ɛ́ɛ́ sɛn ŋmaa in o ŋmaa mbɛt.

⁴Ɓɛɛ ŋgimbi nɛ̀ Sɔ̧ Wan-kpasi yɛ usa demɔ in kɔ̧ɔ̧mɔ kɔ‘i ha̧ o bíí,

⁵á̧ kpasa yɛ, ɓɛɛ bó nɛ́ wen zu ŋma mɔ n’ɛ̀ɛ̀ dee nɛ̀ yuwar-a na; mɛ̀ nɛ́ wen zu deako kɔ̧-a̧ sɛn tɛ zuia yɛ mɛ́ ko nɛ̀ mbe-a h’ɛ́ɛ́ mɛ́ kpai dúk nɛ́ mbe bíí tɛ tom ko Sa̧a̧ Ɔmi.

⁶A̧ ha̧a̧ Sa̧a̧ Ɔmi h’ɛ́ɛ́ nɛ̀ kpasa-a nɛ̀ ɗoŋ Jesu Krist Wan-kpasi yɛ,

⁷wen h’ɛ́ɛ́ mɛ́ duk o wi-de-mɔ nɛ̀ yuwar-a tɛ deemɔ nɛ̀ ta-tɛ kɔ̧-a̧, h’ɛ́ɛ́ mɛ́ kpa duka-kpasa kpoo nɛ kpoo, n’ɛ̀ɛ̀ e nɛ̀ ta.

⁸Wen’ɛ nɛ́ wen nɛ̀‘i nyɛma mɛ́ e nɛ̀ ta. Mi kɔ̧ɔ̧ ha̧ mɛ́ mɛ́ kasi wen’ɛ nɛ̀ de-a, wen ha̧ o bíí lɛŋ nɛ̀ kɔ̧ɔ̧ ɗɔaa ha̧ Sɔ̧ mɛ́ e see-wa tɛ dee demɔ. Mɔ nɛ̀ ɔ dee nɛ̀ tɛ́ gbak bíí nɛ́ mɔ‘i.

⁹Ɓɛɛ ká mɛ́ ye tɛ tɔ̧ɔ̧ dɔka-wen, ak nɛ̀ tugun bíí, kpɛr nɛnɛ, si nɛ̀ kafɛ zu heembea na. O mɔɔ nɔ‘i gbak bíí tɛ́ ŋma mɔ kpɔk na.

¹⁰Ɓɛɛ ko wi nɛ̀ ndak ɗoŋ ŋma usamɔ nɛtɛ, kà mɛ̀ tɔ̧ mbɔrɔ ha̧ a̧ war kpɔk, kóó war yiitoo takaɗi, ɓɛɛ mɛ̀ é a̧ dúk.

¹¹Mɛ́ iŋa'e o pɛrti wi nɔ‘i yɔ nɛ́ kaya de nɛ̀ ɗaŋmɔ, ɓɛɛ wa gɔna kita zu wa nɛ̀ tɛ-wa kaɗi.

¹²Ŋgimbi n'am be tɛ̀ɛ́ tom Artemas, kóó Tikik nɛnɛ tɛ-mɛ, mɛ̀ kíí war mɛ̀ tɛ́ɛ̀ kpa'm sɛn Nikopolis, wen mi taa mɛ́ duk hi̧i̧ hɔ nú-kórò.

¹³Mɛ̀ gbák Zenas wi-gɔn-kita, in Apolos tɛ ɗafa mɔɔ-nɔ̀ kɔ-wa, wen ká ŋma mɔ tɛ́ɛ̀ ɓan wa.

¹⁴O bíí k’ɛ́ɛ́ a̧ yámbí ee see tɛ̀ dee de tom, ha̧ wa mɛ́ kpa mɔ wen gbaka o wi nɛ̀ mɔ ɓan wa; hegɔ duka-a kɔ-wa tɛ́ gbak bíí.

¹⁵O bíí nɛ̀ ya in am hɛ̧ɛ̧ lɛŋ fana mɛ́. Mɛ̀ fán o bíí nɛ̀ kɔ̧ɔ̧ yɛ nɛ̀ ɗoŋ kɔ̧ɔ̧ɗɔɔwen. Deemɔ nɛ̀ ta-tɛ ko Sɔ̧ a̧ dúk in'nɛ̀ɛ́ lɛŋ.