Read Northwest Gbaya HEBREU 11 Bible Online

HEBREU 11 - Northwest Gbaya bible

HEBREU 11

¹Kɔ̧ɔ̧ɗɔɔwen nɛ́ yuwar kpaa mɔ nɛ̀‘i e nɛ̀ ta kaɗi, nɛ́ yuwar iŋa mgbák mɔ nɛ̀‘i tɛ́ zɔk hɔ̧ɔ̧ na.

²Nɛ́ kɔ̧ɔ̧ɗɔɔwen a̧ duka nɛ́ de sedaako wen o bíí ɓeemɛ.

³Nɛ́ tɛ kɔ̧ɔ̧ɗɔɔwen ɛ́ɛ́ iŋa nɛnɛ‘e Sɔ̧ dee o mɔ tɛ̀ tɔ̧́ɔ̧́-wen kɔ̧-a̧. Hegɔ nɛ́ tɛ́ mɔ nɛ̀‘i zɔk na a̧ Sɔ̧ dee nɛ̀ mɔ nɛ̀‘i zɔk’ɛ.

⁴Nɛ́ tɛ kɔ̧ɔ̧ɗɔɔwen a̧ Abɛl ɗafa nɛ̀ Sɔ̧ nɛ̀ de-a gan ko Kain, ɓɛɛ nɛ́ mɔ‘i a̧ dee ha̧ Sɔ̧ mɛ́ zɔk Abɛl hee wi-de-mɔ nɛ̀ yuwar-a ga, ɓɛɛ a̧ kpɛk ha̧a̧mɔ kɔ̧-a̧ nɛ̀ de-a. Mɛ̀ nɛ́ wen zu kɔ̧ɔ̧ɗɔɔwen kɔ̧-a̧, nɛ̀ oi fea-a'i, a̧ Abɛl tɔ̧ nɛ̀ wen h’ɛ́ɛ́ hɔ kinii.

⁵Nɛ́ tɛ kɔ̧ɔ̧ɗɔɔwen ko Enɔk a̧ Sɔ̧ baa nɛ̀ Enɔk si yiwese mɛ̀ wen ká a̧ tɛ́ɛ̀ fe; wa kpa so a̧ na, wen Sɔ̧ baa a̧ yaknɛ. Nɛti ha̧ Sɔ̧ mɛ́ ba a̧ yaknɛ, Sɔ̧ dee sedaako zu a̧‘e, Enɔk dee tɛ-wi.

⁶Kà kɔ̧ɔ̧ɗɔɔwen bó na, bíí nyɛm mɛ́ de tɛ́ Sɔ̧ na. Wen wi nɛ̀ kɔ̧ɔ̧ mɛ́ ɗɔŋ si katɛ Sɔ̧, tɛ́ kɔ̧ ɗɔaa'e, Sɔ̧ a̧a̧ sɛnɛ, ɓɛɛ Sɔ̧ tɛ́ ha̧ mɔɔ-oi kia a̧ ha̧ o bíí nɛ̀ kii a̧.

⁷Sɔ̧ mbaŋa só tɛ́ Nɔe zu ŋma mɔ nɛ̀ bíí tɛ́ zɔk so nɛti na, ɓɛɛ nɛ́ tɛ̀ kɔ̧ɔ̧ɗɔɔwen á̧ à̧ ee nɛ̀ wen'i tɛ́ kpasawen; nɛ́ mɔ'ɔ n'aa ɗafa kombon wen kpasa o bíí kɔ̧-a̧. Nɛ́ tɛ kɔ̧ɔ̧ɗɔɔwen á̧ à̧ gɔna nɛ̀ kita zu nu, ɓɛɛ a̧ kifi duk wi-de-mɔ nɛ̀ yuwar-a nɛ‘i kpa nɛ̀ ɗoŋ kɔ̧ɔ̧ɗɔɔwen.

⁸Nɛ́ tɛ kɔ̧ɔ̧ɗɔɔwen a̧ Abraham kɔ̧ɔ̧ so nɛ̀ sara mɛ́ kur yak si ŋma nù nɛ̀ Sɔ̧ ha̧a̧ nú mɛ́ ha̧ ha̧ a̧ nɛ̀ mɔɔ-oi, ɓɛɛ a̧ kur yak si ŋma fara n'aa iŋ na.

⁹Ɓɛɛ nɛ́ tɛ kɔ̧ɔ̧ɗɔɔwen á̧ à̧ nɛ̀ɛ́ duk nɛnɛ tɛ́ nù nɛ̀ Sɔ̧ ha̧a̧ so nú zu-a ha̧ a̧, hee ŋma gɛnɛ ga. A̧ duka hi̧i̧ ɔ nɛnɛ kɔ̧ tua-laa, in Izak ká bá nɛ̀ Jakob, o wi nɛ̀ kpaa so kale kpɔk ha̧a̧nú‘i mbɛt.

¹⁰A̧ duka kɔ̧ tua-laa pɛm nɛ̀ ye nɛ̀ naŋ garo-a a̧a̧ sɛnɛ nɛ̀ Sɔ̧ nɛ̀ tɛ-wi nɛ́ wi-wea-a in wi-mboa-a mbɛt.

¹¹Nɛ́ tɛ kɔ̧ɔ̧ɗɔɔwen a̧ Sara mbɛt baa nɛ̀ zaŋ tɛ̀ sɔ́kì kɔ‘i, wen taamɔ kɔ̧-a̧ nɛ̀ mbetɛ‘e, wi nɛ̀ ha̧a̧ nú ha̧ a̧‘i nɛ́ wi-yor-ɗoŋ-wen kɔ‘i.

¹²Mɛ̀ nɛ́ hegɔ, nɛ́ tɛ̀ bíí kpɔk nɛ̀ hɛɗa mɛ́ fe kaɗi a̧ gba gíí bíí nyɛɓa̧ nɛnɛ hee o sɔra yiwese in zɔm nyɛmɛ ká̧ zaŋ gba-tɔp ga.

¹³Nɛ́ zaŋ kɔ̧ɔ̧ɗɔɔwen a̧ o wi nɔ‘i lɛŋ fee nɛnɛ; wa kpa kiitɛ mɔ nɛ̀ Sɔ̧ ha̧a̧ nú sɛnɛ na, ɓɛɛ wa zɔka kànà o mɔɔ nɔ‘i lɛŋ nɛ̀ yí-wa, de nɛ̀ nyɛŋɛ-a mbɛt; ɓɛɛ wa iŋ‘e wa nɛ́ o gɛnɛ in o wi-ɓir-war.

¹⁴Wen o wi nɛ̀ tɔ̧ wen hegɔ‘i, usa nɛ̀ sa̧a̧-a̧‘e wa a̧a̧ tɛ kia mgbák nù kɔ-wa.

¹⁵Kà wa tá so mɔ wen kuti fara nɛ̀ wa ee duk'i, wa tɛ̀ɛ́ si so ɗoŋ woyo.

¹⁶Ɓɛɛ fara nɛ̀ wa kia'i nɛ́ ŋma fara nɛ̀ dee gan kuti-a; fara'i nɛ́ wan mɛ́ yiwese mɛ́. Mɛ̀ nɛ́ wen hegɔ, foe de Sɔ̧ ha̧ wa mɛ́ sa a̧‘e Sɔ̧ kɔ-wa na, wen a̧ ɗafa ye ha̧ wa nɛ̀ mbetɛ.

¹⁷Ŋgimbi nɛ̀ Sɔ̧ wee nɛ̀ Abraham, nɛ́ tɛ kɔ̧ɔ̧ɗɔɔwen á̧ Abraham ha̧a̧ nɛ̀ Izak. A̧ ha̧a̧ kpɔk bem kɔ̧-a̧ zu-a nɛ̀ Sɔ̧ ha̧a̧ so nú ha̧ a̧

¹⁸tɔ̧ nɛnɛ‘e: «Mɛ̀ nɛ́ nɛ̀ ɗoŋ Izak a̧ mɛ́ tɛ́ kpa nɛ̀ bezaŋ.»

¹⁹Taamɔ ko Abraham'e, Sɔ̧ a̧a̧ nɛ̀ ŋgai mɛ́ de ha̧ Izak mɛ́ kur tɛ́ fio, ɓɛɛ duk hee bem kɔ̧-a̧ fee nɛ̀ mbetɛ ɓɛɛ Abraham kpa a̧ woyo ga.

²⁰Nɛ́ tɛ kɔ̧ɔ̧ɗɔɔwen a̧ Izak toka nɛ̀ de yoŋgo zu o Jakob in Esau wen duka-a kɔ-wa siti.

²¹Nɛ́ tɛ kɔ̧ɔ̧ɗɔɔwen a̧ Jakob nɛ̀ hɛɗa so mɛ́ fe kaɗi toka nɛ̀ de yoŋgo zu o bem ko Jozɛf kpɔk kpɔk; a̧ ɛka so tɛ-a nɛ̀ dɔra kɔ̧-a̧ gasi nɛ̀ Sɔ̧.

²²Nɛ́ tɛ kɔ̧ɔ̧ɗɔɔwen a̧ Jozɛf nɛ̀ hɛɗa so mɛ́ fe kaɗi tɔ̧ɔ̧ nɛ̀ wen zu gboa-a ko o be Israɛl nú Egiptɛ in mɔ nɛ̀ wa tɛ́ de nɛ̀ gba̧a̧-a̧.

²³Ŋgimbi nɛ̀ wa koo nɛ̀ Moisɛ, nɛ́ tɛ kɔ̧ɔ̧ɗɔɔwen a̧ dáà in nàà kɔ̧-a̧ hu̧sa̧ nɛ̀ a̧ tɛ́ fio-zɛ taar, wen déè ko be-zɔɗi'i baa yí-wa nyɛmna, ɓɛɛ wa de kíí geŋa ko wannu na.

²⁴Ŋgimbi nɛ̀ Moisɛ gasa kaɗi, nɛ́ tɛ kɔ̧ɔ̧ɗɔɔwen á̧ à̧ bɛ̧ɛ̧ nɛnɛ ha̧ o bíí mɛ́ sa a̧‘e bem ko boko-bem ko Faraɔŋ.

²⁵A̧ hoka mɛ́ zɔk bɔnɛ in dukbíí ko Sɔ̧ gan duka-a tɛ́ bɔtɛ zaŋ ɗaŋmɔ tɛ́ ŋma be ŋgimbi.

²⁶Taamɔ kɔ̧-a̧‘e ea a̧ nɛ̀ o bíí e tɛ̀ geemɔ hee ko Krist ga ɔ déè gan o mbɔi tɛ nú Egiptɛ, wen yí-a duk so nɛ tɛ mɔɔ-oi-tom.

²⁷Nɛ́ tɛ kɔ̧ɔ̧ɗɔɔwen a̧ Moisɛ kura nɛnɛ nú Egiptɛ yak, kíí nyimsea ko wannu de a̧ na. A̧ yora nɛ̀ nɔa-a hee bíí nɛ̀ zɔk Sɔ̧ nɛ̀‘i zɔk na’ɛ ga.

²⁸Nɛ́ tɛ kɔ̧ɔ̧ɗɔɔwen á̧ à̧ dee nɛ̀ gbaŋa Paska, ɓɛɛ a̧ misi̧ tɔk a zu nú tua wen ká wi-ɗaŋ-mɔ tɛ́ɛ̀ kum o kaya-bem ko o be Israɛl.

²⁹Nɛ́ tɛ kɔ̧ɔ̧ɗɔɔwen a̧ wa kuu nɛ̀ Gbɛ̧ gba-tɔp hee zu kora nù ga daŋ kur, ɓɛɛ ŋgimbi nɛ̀ o be Egiptɛ wee mɛ́ de kpɔk mɔ‘i, yì kpee zu wa liŋgɔm.

³⁰Nɛ́ tɛ kɔ̧ɔ̧ɗɔɔwen a̧ o be Israɛl zika nɛ̀ ye Jeriko tɛ́ zɛ mɔɔrɔ-ɗoŋ-yiitoo, ɓɛɛ garo ye'i gbin a nù lɛŋ.

³¹Nɛ́ tɛ kɔ̧ɔ̧ɗɔɔwen a̧ Rahab kó-de-mɔ nɛ̀ mbɔɗɔnu kpɛka nɛ̀ o wi-kpe-naŋ-mɔ nɛ̀ de-a, ɓɛɛ wa gbɛ a̧ kpɔk in o wi-ŋgazu wese'i na.

³²A̧‘m tɔ̧ nɛ́ ge woyo ge? Ŋgimbi bó ha̧‘m mɛ́ we ɗoŋ mɔ ko Gedeɔŋ, Barak, Samsɔŋ, Jɛfte, David, Samuɛl in o wi-tɔ̧-wen oi nú Sɔ̧ na.

³³Nɛ́ tɛ kɔ̧ɔ̧ɗɔɔwen a̧ o wi nɔ‘i baa nɛ̀ o nù, de nɛ̀ mɔ nɛ̀ yuwar-a, kpa nɛ̀ mɔ nɛ̀ Sɔ̧ ha̧a̧ so nú wen-aa ha̧ wa. Wa kpee nú o dila,

³⁴wa bìì o ŋga wee, wa hɔɔ yɔk-fio nú gba-paa, zɛ́ɛ́ baa wa, ɓɛɛ wa kur tɛ̀ zɛ́ɛ́‘i kpa ŋgai woyo; wa duka nɛ́ ŋgaŋa wi-gbin-biro gan nɛ̀ o wi-biro ko o gɔni nù.

³⁵O bem nɛ̀ fee so kpasa ɓɛɛ kur ŋgɔn pii ɗoŋ tɛ̀ o nàà kɔ-wa. Bíí usa ŋga bɔnɛ hɔ tɛ́ fio ha̧ wa, ɓɛɛ wa kɔ̧ ha'i mɛ́ gbo wa na, wen ha̧ wa mɛ́ kur ŋgɔn tɛ́ fio mɛ́ kpa de duka-a nɛ̀ gana i̧i̧.

³⁶O ŋma zɔka bɔnɛ dara, o ŋma zɔka bɔnɛ nyasi, ká bá nɛ̀ bɔnɛ-nyak-zɔɓɔ in zɔɓɔ mbɛt.

³⁷Wa yoo o ŋma nɛ̀ ta gbɛ, wa ɓira o ŋma kɛ̧ tan see-a, ɓɛɛ wa gɔm o ŋma gbɛ nɛ̀ gba-paa; o wi nɔ‘i yambala nɛnɛ, mar nɛ̀ o ndàrá sami in o ndàrá gbadua, mɔ ɓan nɛ̀ wa, bíí nasi nɛ̀ wa usi nɛ̀ bɔnɛ ha̧ wa.

³⁸Zaŋnu bó nɛ́ fara nɛ̀ nyɛma so ha̧ o wi nɔ‘i mɛ́ duk sɛnɛ na; nɛ́ mɔ'ɔ nɛ̀ wa yambala dam ŋga-gbárà, nɛ̀ mgbara kaya, ɔ nɛnɛ nɛ̀ kɔ̧ di̧i̧ in kɔ̧ gboŋgo.

³⁹Zu-a nɛ̀ o wi nɔ‘i lɛŋ kpaa de sedaako wen zu kɔ̧ɔ̧ɗɔɔwen kɔ-wa'i, wa kpa kiitɛ mɔ nɛ̀ Sɔ̧ ha̧a̧ só nú sɛnɛ na.

⁴⁰Hee mɔ'ɔ nɛ̀ Sɔ̧ ɗafa só demɔ h’ɛ́ɛ́ nɛ̀ ɔ déè gan ga, a̧ kɔ̧ so ha̧ o wi nɔ‘i mɛ́ nyɛm sɛnɛ e yɛ dúk na.