Read Northwest Gbaya HEBREU 3 Bible Online

HEBREU 3 - Northwest Gbaya bible

HEBREU 3

¹Hegɔ o nya'm, o sa̧a̧-bíí nɛ̀ Sɔ̧ saa tɛ́ tom kɔ‘i mbɛt, ɛ̀nɛ̀ zɔ́k Jesu hee betom nɛ̀ Sɔ̧ toma mɛ́ duk hee gasa wan-ɗafi-sɔ̧ zu kɔ̧ɔ̧ɗɔɔwen k’ɛ́ɛ́ ga.

²A̧ mboo zu ha̧ Sɔ̧, wan nɛ̀ hoka a̧ mɛ́ de tom, hee mɔ'ɔ nɛ̀ Moisɛ mboo so nɛ̀ zu, de nɛ̀ tom kɔ‘i kɔ̧ tua ko Sɔ̧ nɛ̀ oi-aa ga.

³Hee mɔ'ɔ nɛ̀‘i zɔn nɛ̀ wi-de-tua gan kiitɛ tua ga, hegɔ mbɛt, wi tɛ zɔn Jesu gan Moisɛ.

⁴Tua lɛŋ, wi-dea-a a̧a̧ sɛnɛ, ɓɛɛ wi nɛ̀ dee mɔ lɛŋ nɛ́ Sɔ̧.

⁵Nɛ́ kpasawen, Moisɛ dee tom kɔ̧ tua ko Sɔ̧ nɛ̀ oi-aa nɛ̀ mboozu hee wi-de-tom ga, de nɛ̀ sedaako o mɔ nɛ̀ Sɔ̧ tɛ́ tɔ̧ nɛ̀ ɗoŋ. Krist mboo zu mbɛt, ɓɛɛ kɔ̧-a̧, a̧ nɛ́ Bem, ɓɛɛ Sɔ̧ ea a̧ mɛ́ duk zu tua kɔ‘i.

⁶K’ɛ̀ɛ̀ nɔ́ ŋgiɗi, e nɛ̀ see yɛ tɛ́ mɔ n’ɛ̀ɛ̀ e nɛ̀ ta hɔ sɔŋkur-aa, ɓɛɛ ɛ́ɛ́ nɛ́ tua kɔ̧-a̧ nɛ̀ mbetɛ.

⁷Nɛ́ hegɔ sa Sa̧a̧ Ɔmi tɔ̧‘e ndé: «Sɔsɔɔ, k’ɛ̀nɛ̀ zíí tiger-a,

⁸k’ɛ́nɛ́ ŋgai see'nɛ́ hee mɔ'ɔ nɛ̀ o zɔmdáa k’ɛ́nɛ́ dee so, wese nɛ̀ wa dee nɛ̀ ŋgazu, we nɛ̀‘m sɛn ŋga-gbárà mɛ̀, ga na.

⁹Wa wee so'm, kíí nɛnɛ mɛ́ kpa ndaa'm; wa zɔka so deemɔ kɔ‘m tɛ́ pɛ ɓu-naar.

¹⁰Ɓɛɛ nɛ́ mɔ‘i a̧ dee ha̧ see-am mɛ́ tu̧ zu o wi nɔ‘i, ɓɛɛ s'am tɔ̧: ‹O wi nɔ'ɔ nɛ̀ bó nɛ̀ kpasa taamɔ na ɓɔnsɛnɛ'ɛ, wa tɛ́ iŋ yuwar kɔ‘m hɔ̧ɔ̧ na.›

¹¹Ɓɛɛ mi kan mɔ nɛ̀ ɗaŋsee'e: ‹Kóó kpɔk mgbara wa beka kpa yea-a tɛ ɔma-tɛ kɔ‘m na!› »

¹²Ɛ̀nɛ̀ bá zu'nɛ́, o nya'm, wen ká ŋma mgbara'nɛ́ tɛ́ɛ̀ ŋgai see, si nɛ̀ kafɛ mɛ́ a̧r e Sɔ̧ nɛ̀ dúk kpasa dúk.

¹³Ɓɛɛ ɛ̀nɛ̀ tɔ̧́ mbɔrɔ ha̧ ŋmaa in o ŋmaa dam ɗoŋ wese lɛŋ, ŋgimbi nɛ̀ sɔsɔɔ nɛ̀ Yɔramɔ tɔ̧ wen-aa'i biti in yɛɛ, wen ká ɗaŋmɔ tɛ́ɛ̀ ɔr ŋma bíí kpɔk mgbara'nɛ́ mɛ́ ŋgai see.

¹⁴Wen k’ɛ̀ɛ̀ yor nɛ̀ nɔa-a tɛ́ kuti kɔ̧ɔ̧ɗɔɔwen k’ɛ́ɛ́‘i, ɓɛɛ ɛ́ɛ́ nɛ́ o gbama wi-de-tom in Krist,

¹⁵wen Yɔramɔ tɔ̧a̧‘e: «Sɔsɔɔ, k’ɛ̀nɛ̀ zíí tiger-a, k’ɛ́nɛ́ ŋgai see'nɛ́ hee mɔ'ɔ nɛ̀ o zɔmdáa k’ɛ́nɛ́ dee so wese nɛ̀ wa dee nɛ̀ ŋgazu, ga na.»

¹⁶O wi nɛ̀ zia so wen, ɓɛɛ ká de ŋgazu’ɛ, nɛ o? Bó nɛ́ o bíí lɛŋ nɛ̀ Moisɛ mgbɔɔ so gbonɛ nɛ̀ nú Egiptɛ na?

¹⁷See Sɔ̧ tu̧u̧ zu o tɛ́ pɛ ɓu-naar o? Bó nɛ́ see-aa tu̧u̧ zu o wi nɛ̀ dee ɗaŋmɔ, ɓɛɛ ká wɔr-wa ɓɔn ŋga-gbárà mɛ̀ na?

¹⁸Nɛ́ o a̧ Sɔ̧ kàná mɔ zu wa'e, wa beka kpa yea-a tɛ ɔma-tɛ kɔ‘i na, o? Bó nɛ́ o wi-ŋgazu nɔ‘i na?

¹⁹Ɓɛɛ ɛ́ɛ́ zɔka'e, wa nyɛm so yea-a sɛnɛ na, wen wa kɔ̧ ɗɔaa na.