Read Northwest Gbaya HEBREU 7 Bible Online

HEBREU 7 - Northwest Gbaya bible

HEBREU 7

¹Mɛlkisedɛk duka so nɛ́ wannu Salɛm, wi-ɗafi-sɔ̧ ko Sɔ̧ nɛ̀ duk ŋgɔn mɛ̀. A̧ nɛ̀ɛ́ we ti Abraham ŋgimbi n'aa pia so nɛ̀ tɛ́ biro ɗoŋ bíí o wannu, ɓɛɛ a̧ tok de yoŋgo zu Abraham.

²Abraham ha̧a̧ zu-mɔ lɛŋ n'aa kaia tɛ́ biro ha̧ a̧. Nin Mɛlkisedɛk nɛ́ wen nɛ̀ tɔ̧‘e, «wannu nɛ̀ de mɔ nɛ̀ yuwar-a,» in a̧ nɛ́ wannu Salɛm, nɛ́ wen nɛ̀ tɔ̧‘e, «wannu ga̧a̧mɔ.»

³A̧ bó nɛ̀ dáà na, kóó nàá, kà bó nɛ̀ tugun-aa na mbɛt; wese koa a̧ bo na, wese fio kɔ̧-a̧ bo na mbɛt. A̧ hɔɔ ŋmaa in Bem ko Sɔ̧, ɓɛɛ a̧ tɛ́ duk wi-ɗafi-sɔ̧ kpoo nɛ kpoo.

⁴Ɛ̀nɛ̀ íŋ‘e Mɛlkisedɛk nɛ́ gasawi, wen zɔmdáa Abraham baa o gba demɔ n'aa kaia yí biro nɛ́ɛ̀ ha̧ nɛ̀ zu-mɔ ha̧ a̧.

⁵Ɓɛɛ nɛ̀ war ko o bezaŋ Levii, o wan nɛ̀‘i hok mɛ́ duk o wi-ɗafi-sɔ̧‘i, heembea ee ha̧ wa mɛ́ ba zu-mɔ er o bíí; mɛ̀ nɛ́ wen nɛ̀ tɔ̧‘e er o nya-wa nɛ̀ duk nɛ́ o bezaŋ Abraham.

⁶Ko Mɛlkisedɛk nɛ̀ bó so nɛ̀ tugun in o bezaŋ Levii na, a̧ baa zu mɔɔ-biro er Abraham, ɓɛɛ a̧ tok de yoŋgo zu Abraham, wi nɛ̀ Sɔ̧ ha̧a̧ so nú ha̧ a̧.

⁷Kafɛ bó tɛ́ mɔ'ɔ na: mɛ̀ nɛ́ gasawi a̧ tok toka de yoŋgo zu geɗek-wi.

⁸Ɓɛɛ ŋma mɔ nɛ̀ dúk tɛ́ mɔ‘i nɛ̀ mɔ'ɔ: o wi-ba-zu-mɔ‘i nɛ́ o wi nɛ̀ fe fee, ɓɛɛ nɛ̀ war ko Mɛlkisedɛk, Yɔramɔ tɔ̧a̧‘e a̧ dúk kpasa.

⁹Wi tɛ́ nyɛm mɛ́ tɔ̧‘e Levii, nɛ̀ duka so ba nɛ̀ zu-mɔ, ha̧a̧ war zu-mɔ kɔ‘i ha̧ Mɛlkisedɛk nɛ̀ ɗoŋ Abraham mbɛt.

¹⁰Wen Levii a̧a̧ so tɛ́ zɔmdáa kɔ̧-a̧ Abraham ŋgimbi nɛ̀ wa kpaa so nɛ̀ ŋmaa in Mɛlkisedɛk'i.

¹¹Yuwar ɗafa-sɔ̧ ko o be Levii nɛ́ gun heembea nɛ̀ Sɔ̧ ha̧a̧ ha̧ dukbíí Israɛl, ɓɛɛ kà ɗafa-sɔ̧‘i dé so ha'i mɛ́ nyɛm sɛnɛ nɛ̀ mbetɛ, bó nɛ́ wi tɛ̀ɛ́ kii so ŋma mbe wi-ɗafi-sɔ̧ nɛ̀ war ko Mɛlkisedɛk ɓɔna; wi tɛ̀ɛ́ hok so kànà nɛ́ o bezaŋ Arɔŋ ɓɛɛ.

¹²Kà yuwar ɗafa-sɔ̧ kpai, ɓɛɛ heembea tɛ́ kpai kànà mbɛt.

¹³Wen'i yɔra wen Gasa Wan k’ɛ́ɛ́, ɓɛɛ bo nɛ ŋma bíí zuduk kɔ̧-a̧ duka so tɛ tom ɗafa-sɔ̧ nɛti na.

¹⁴Wen bíí iŋa nɛ̀ de-a'e ndé, Gasa Wan k’ɛ́ɛ́ nɛ́ bezaŋ Juda, ɓɛɛ ŋgimbi nɛ̀ Moisɛ tɔ̧ɔ̧ nɛ̀ wen zu zuduk o wi-ɗafi-sɔ̧, a̧ sa nin i̧i̧ zuduk'i na.

¹⁵Ŋma mɔ nɛ̀ tɛ́ de ha̧ wen’ɛ mɛ́ sa̧ gan kuti-a nɛ́ hɔa-a ko ŋma wi-ɗafi-sɔ̧ nɛ̀ hɔɔ ŋmaa in Mɛlkisedɛk.

¹⁶A̧ bó nɛ́ bezaŋ wi-ɗafi-sɔ̧ sɛk'aa duk wi-ɗafi-sɔ̧ na, ɓɛɛ nɛ́ tɛ̀ yuwar ŋgai duka-kpasa kɔ̧-a̧ kpoo nɛ kpoo a̧ dee ha̧ a̧ mɛ́ duk wi-ɗafi-sɔ̧.

¹⁷Wen’ɛ tɔ̧ɔ̧ zu-a: «Mɛ́ nɛ́ wi-ɗafi-sɔ̧ nɛ̀ tɛ́ duk ɓɔnsɛnɛ hee war ko Mɛlkisedɛk ga.»

¹⁸Hegɔ kuti heembea yaia, wen a̧ bó nɛ̀ ŋgai na, in a̧ gbak wi na mbɛt,

¹⁹wen heembea de ha̧ mɔ mɛ́ nyɛm sɛnɛ na. Nɛ́ mɔ'ɔ nɛ̀ mbe mɔɔ-e-nɛ-ta nɛ̀ dee gan kuti-a hɔa ɓɛɛ nɛ́ a̧ ɛ̀ɛ̀ ɗɔŋ nɛ̀nɛ́ si katɛ Sɔ̧.

²⁰Zu-a'i kanamɔ ko Sɔ̧ a̧a̧ so kànà sɛnɛ. Bó nɛ́ tɛ̀ kanamɔ a̧ wa ee so nɛ̀ o ŋma wi-ɗafi-sɔ̧ tɛ́ tom na,

²¹ɓɛɛ ko Jesu, a̧ duka wi-ɗafi-sɔ̧ tɛ kanamɔ nɛ̀ Sɔ̧ kàná tɔ̧ nɛnɛ‘e: «Gasa Wan kàná mɔ, ɓɛɛ a beka kpai nú sɛnɛ ɓɔna: mɛ́ nɛ́ wi-ɗafi-sɔ̧ nɛ̀ tɛ́ duk ɓɔnsɛnɛ.»

²²Tɛ́ mɔ‘i, nɔɔ-tɔk nɛ̀ Jesu yor ɗoŋ-aa kinii gana kuti nɔɔ-tɔk mɛ́ ti.

²³Zu-a'i mbɛt, o bíí nɛ̀ dɔka-a duka wi-ɗafi-sɔ̧ ɗoŋ ŋmaa, wen fio dora so wa mɛ́ duk sɛnɛ siti.

²⁴Ɓɛɛ nɛ̀ war ko Jesu, hee mɔ'ɔ n'aa dúk kpoo nɛ kpoo ga, ŋma war ɗafa-sɔ̧ nɛ̀ tɛ́ yak zu kɔ̧-a̧ bo na.

²⁵Mɛ̀ nɛ́ hegɔ a̧ nyɛma mɛ́ kpasi o bíí nɛ̀ ɗɔŋ pii katɛ Sɔ̧ nɛ̀ ɗoŋ-aa war kpɔk, wen a̧ dúk kpasa kpoo nɛ kpoo, ha̧ a̧ mɛ́ ai nú ha̧ Sɔ̧ wen zu wa.

²⁶Jesu nɛ́ gasa wan-ɗafi-sɔ̧ nɛ̀ nyɛma yɛ, a̧ nɛ́ sa̧a̧-bíí, ŋma wen bó zu-a na, ɗaŋmɔ bó tɛ-a na, a̧ bó mgbara o wi-de-ɗaŋmɔ na; ɓɛɛ Sɔ̧ ba a̧ si yiwese ŋgɔn mɛ̀.

²⁷Bó nɛ́ a̧ tɛ́ ɗafi Sɔ̧ wese lɛŋ hee o ŋma gasa wan-ɗafi-sɔ̧ nɛ̀ ɗafi Sɔ̧ wen ɗaŋmɔ kɔ-wa mɛ́ tɛ-wa nɛti, ɓɛɛ sɛka wa ɗafa Sɔ̧ wen ɗaŋmɔ ko o oi bíí ga na; ɓɛɛ kɔ̧-a̧, a̧ ɗafa Sɔ̧ war kpɔk ŋgimbi n'aa ha̧a̧ nɛ̀ tɛ-a.

²⁸Heembea dee so ha̧ o bíí nɛ̀ nyɛm sɛnɛ na mɛ́ duk o gasa wan-ɗafi-sɔ̧, ɓɛɛ gba̧a̧-wen nɛ̀ Sɔ̧ tɔ̧a̧ sɛn ɗoŋ heembea n'aa kàná mɔ zu a̧ mbɛt, dee ha̧ Bem kɔ̧-a̧, wan nɛ̀ nyɛma sɛnɛ kpoo nɛ kpoo, mɛ́ duk gasa wan-ɗafi-sɔ̧.