Read Northwest Gbaya HEBREU 8 Bible Online

HEBREU 8 - Northwest Gbaya bible

HEBREU 8

¹Wii-see-mɔ tɛ́ mɔ n’ɛ̀ɛ̀ tɔ̧'ɛ nɛ́ mɔ'ɔ: ŋma pɛrti gasa wan-ɗafi-sɔ̧ k’ɛ́ɛ́ hegɔ a̧a̧ sɛnɛ nɛ̀ dúk nù nɛ̀ war wiiko ká̧ damti ko Sɔ̧, wan nɛ̀ ɔ gasa yiwese mɛ̀.

²A̧ de nɛ́ tom ko gasa wan-ɗafi-sɔ̧ sɛn kɔ̧ kpasa sa̧a̧-fara, mɛ̀ nɛ́ wen nɛ̀ tɔ̧, kɔ̧ kpasa tua-laa nɛ̀ Gasa Wan ɗafa, nɛ̀ bó nɛ́ bíí na.

³Gasa wan-ɗafi-sɔ̧ lɛŋ duk wen ha̧a̧ mɔ ha̧ Sɔ̧ in ɗafa-sɔ̧; hegɔ nyɛma kànà ha̧ a̧ mɛ́ kpa mɔ n'aa tɛ́ ha̧ ha̧ Sɔ̧ mbɛt.

⁴Kà Krist dúk so zu nù'ɛ, bó nɛ́ a̧ tɛ̀ɛ́ duk nɛ́ wi-ɗafi-sɔ̧ na, wen nɛ́ o ŋma bíí nɛ̀ ha̧ mɔ ha̧ Sɔ̧, nyɛm nɛ̀ ɗoŋ heembea, a̧ baa fara'i;

⁵ɓɛɛ tòm ɗafa-sɔ̧ nɛ̀ o wi-ɗafi-sɔ̧ de'i dúk nɛ́ mɔɔ-usi-mɔ in gi̧ɔ̧ kpasamɔ mɛ́ yiwese. Mɛ̀ nɛ́ kale mɔ in ko Moisɛ. Ŋgimbi n'aa tɛ̀ɛ́ ɗafi nɛ̀ tua-laa, Sɔ̧ tɔ̧a̧‘e: «Mɛ̀ dé mɔ lɛŋ nyɛm nɛ̀ ɗoŋ mɔ n'am usa ha̧ mɛ zu kaya'i.»

⁶Nɛ̀ mbetɛ, tom nɛ̀ a̧a̧ er Jesu gana kɔ-wa nyɛmna, wen a̧ dee ha̧ nɔɔ-tɔk, nɛ̀ dee gan kuti-a mɛ́ hɔ gba̧a̧, nɛ̀ tugun-aa duk zu o ha̧a̧nú nɛ̀ dee gan o wan mɛ́ ti.

⁷Kà kuti nɔɔ-tɔk nyɛ́m so sɛnɛ, bó nɛ́ wi tɛ̀ɛ́ kpai so kuti-a nɛ̀ yiitoo-aa na.

⁸Ɓɛɛ Sɔ̧ tɔ̧ wen a zu o bíí kɔ‘i'e: «Ŋgimbi tɛ́ hɔ, n'am tɛ́ nɔ mbe tɔk in nutua ko Israɛl in Juda; nɛ́ Gasa Wan a̧ tɔ̧ wen’ɛ.

⁹Nɔɔ-tɔk‘i beka hɔ ŋmaa in wan n'am nɔɔ so in o zɔmdáa kɔ-wa ŋgimbi n'am kaia so nɛ̀ wa nɛ̀ er-am gbonɛ Egiptɛ mɛ̀ ga na; wen wa nɛ̀ tɛ-wa mbó so zu tɛ nɔɔ-tɔk kɔ‘m in wa na; nɛ́ hegɔ s'am e wa dúk mbɛt. Nɛ́ Gasa Wan a̧ tɔ̧ɔ̧ wen’ɛ.

¹⁰Ɓɛɛ nɔɔ-tɔk n'am tɛ́ nɔ in nutua ko Israɛl h’ɛ́ɛ́ mɛ́ ndaɗi in ŋmaa ɗoŋ ŋgimbi'i nɛ̀ mɔ'ɔ. Nɛ́ Gasa Wan a̧ tɔ̧ wen’ɛ: heembea kɔ‘m n'am tɛ́ ha̧ ha̧ wa'i, mi tɛ́ e tɛ taamɔ kɔ-wa, ɓɛɛ mi yɔra o heembea nɔ‘i kɔ̧ see-wa mbɛt. Mi tɛ́ duk nɛ́ Sɔ̧ kɔ-wa, ɓɛɛ wa tɛ́ ya nɛ́ dukbíí kɔ‘m.

¹¹Ɓɛɛ kóó o ndé beka usi mɔ ha̧ ŋma-a, koo ha̧ nya-a̧ tɔ̧ nɛnɛ‘e: ‹Mɛ̀ íŋ Gasa Wan,› ɓɔna; wen wa lɛŋ tɛ́ iŋ am, o geɗek-wi hɔ nɛnɛ tɛ̀ o gasawi mbɛt.

¹²Wen mi tɛ́ e yɔɔ-kaya kɔ-wa ha̧ wa, ɓɛɛ tɛ‘m beka mbaŋ ɗoŋ ɗaŋmɔ kɔ-wa ɓɔna.»

¹³Wen nɛ̀ Sɔ̧ tɔ̧ɔ̧ zu mbe nɔɔ-tɔk‘i dee ha̧ kuti-a mɛ́ kifi dúk gba̧‘a̧-a̧, ɓɛɛ gba̧‘a̧ mɔ nɛ̀ sɔka kaɗi, hɛɗa mɛ́ de geemɔ kaɗi.