Read Northwest Gbaya HEBREU 9 Bible Online

HEBREU 9 - Northwest Gbaya bible

HEBREU 9

¹Kuti nɔɔ-tɔk a̧a̧ so nɛ̀ yuwar-gasa-sɔ̧ in tua ko Sɔ̧ mbɛt zaŋnu.

²Wa ɗafa so ŋma kuti tua-laa, ɓɛɛ nin kuti gɔna-bɛr-tua-aa nɛ́ sa̧a̧-fara; ɓɛɛ nɛ́ kɔ̧ gɔna-bɛr-tua-laa'i a̧ wa ee so dek-e-wee in taŋe ká bá nɛ̀ brɛt mɛ́ ha̧ ha̧ Sɔ̧ sɛnɛ.

³Ɓɛɛ ɗoŋ yiitoo babir-laa, tua-laa a̧a̧ sɛnɛ nɛ̀‘i sa'e fara nɛ̀ ɔ sa̧a̧ nyɛmna.

⁴Fara-dɔ-fuu-nyama nɛ̀‘i dee nɛ̀ lɔr duka hi̧i̧, in kuɓa nɔɔ-tɔk nɛ̀‘i sɔ̧ɔ̧ lɔr ɗoŋ-aa lɛŋ, ɓɛɛ mɔ nɛ̀ a̧a̧ kɔ̧ kuɓa'i nɛ́ be-tasi lɔr nɛ̀ man duka kɔ̧ a̧, in te ko Arɔŋ nɛ̀ ɓɔa, ɓɛɛ do, ká bá nɛ̀ o sɛka-ta nɔɔ-tɔk mbɛt.

⁵O keribim nɛ̀ usi gasamɔ ko Sɔ̧ yaa zu kuɓa nɔɔ-tɔk ɓɛɛ gi̧ɔ̧-tɛ-wa kpe zu fara-e-ɗaŋmɔ; bó nɛ́ mɔ ha'i mɛ́ tɔ̧ wen-aa lɛŋ sɛn hɛ̧ɛ̧ na.

⁶Ɓɛɛ ɗoŋ nɛ̀ mɔ lɛŋ ɗafa kaɗi, ɓɛɛ o wi-ɗafi-sɔ̧ duka so mɛ́ ye kɔ̧ kuti tua-laa'i ɓɔnsɛnɛ, de nɛ̀ tom kɔ-wa.

⁷Ɓɛɛ nɛ̀ war ko yiitoo tua-laa, nɛ́ gasa wan-ɗafi-sɔ̧ kpɔk ɓɛɛ a̧ ye hi̧i̧ war kpɔk tɛ́ pɛ kpɔk. A̧ tɛ́ ba kana tɔk-saɗi nɛnɛ ha̧ Sɔ̧ wen ɗaŋmɔ kɔ̧-a̧ mɛ́ tɛ-a, in wen ɗaŋmɔ nɛ̀ dukbíí dea nɛ̀ wa iŋ na.

⁸Tɛ́ mɔ‘i Sa̧a̧ Ɔmi usa'e, hee mɔ'ɔ nɛ̀ kuti tua-laa biti ga, yuwar yea-a si kɔ̧ fara nɛ̀ ɔ sa̧a̧ nyɛmna tɛ́ bò hɔ̧ɔ̧ na.

⁹Mɔ‘i nɛ́ mɔɔ-usi-mɔ wen ŋgimbi k’ɛ́ɛ́ kinii; gba̧a̧ wen-aa'e, o ha̧a̧mɔ nɛ̀‘i ha̧ ha̧ Sɔ̧, in ɗafa-sɔ̧ nɛ‘i ɗafi, nyɛm dea-a ha̧ see wi nɛ̀ gasi Sɔ̧ hegɔ mɛ́ nyɛm sɛnɛ na.

¹⁰Tugun mɔɔ nɔ‘i nɛ́ o nyɔŋmɔ in o mɔɔ-nɔ, ká bá nɛ̀ o yuwar fɔra-tɛ nɛtɛ nɛtɛ nɛ̀ duk nɛ́ do-mɔ ko bíí, ɓɛɛ mɔ tɛ́ duk kànà hegɔ hɔ nɛnɛ ŋgimbi nɛ̀ Sɔ̧ tɛ́ ɗafi mbe yuwar mɔ.

¹¹Ɓɛɛ Krist tɛ̀ɛ́ kɔ‘i hee gasa wan-ɗafi-sɔ̧ nɛ̀ duk zu o demɔ nɛ̀ tɛ́ hɔ nɛ̀ ɗoŋ ga. Tua-laa n'aa duka kɔ̧ a̧ de nɛ̀ tom ɔ gasa in nyɛma sɛnɛ mbɛt gan wan mɛ́ ti; bó nɛ́ bíí a̧ ɗafa na, in bó mgbara mɔ nɛ̀ Sɔ̧ dea zaŋnu na.

¹²Bó nɛ́ tɔk vala-gbadua kóó tɔk daŋa be-wiwii-ndai á̧ à̧ yee nɛnɛ si kɔ̧ fara nɛ̀ ɔ sa̧a̧ nyɛmna war kpɔk'i na, ɓɛɛ nɛ́ tɔk tɛ-a á̧ à̧ ha̧a̧ gɔn nɛ̀ zu yɛ war kpɔk.

¹³Wa duka so misi̧ tɔk vala-gbadua, in tɔk wiwii-ndai, in bùk dɔɔ-kpoo be-ndai-ɗafi-sɔ̧ a tɛ̀ o bíí nɛ̀ war-tɛ sa̧ na mɛ́ fo ɗaŋmɔ nɛ̀ duk tɛ-wa nɛ̀ zan yinɛ.

¹⁴Bó nɛ́ tɔk-tɛ Krist gana mɔ‘i nyɛmna na nde? Wen a̧ ha̧a̧ tɛ-a, hee mɔ-dai nɛ̀ ŋma mɔ ɗaŋ tɛ-a ga na, ha̧ Sɔ̧ nɛ̀ ŋgai ko Sa̧a̧ Ɔmi nɛ̀ dúk kpoo nɛ kpoo. Tɔk-tɛ-a tɛ́ de ha̧ taamɔ fio-tom nɛ̀ dúk tɛ̀ yɛ mɛ́ yu, h’ɛ́ɛ́ mɛ́ de tom ha̧ Sɔ̧ nɛ̀ duk kpasa.

¹⁵Mɛ̀ nɛ́ wen hegɔ sa Krist duk nɛ́ wi nɛ̀ dee ha̧ mbe nɔɔ-tɔk mɛ́ hɔ gba̧a̧, nɛ̀ duk nɛ́ mbe nɔɔ-tɔk zu mɔɔ-oi. Fio kɔ̧-a̧ gɔna zu ɗaŋmɔ nɛ̀ bíí dee zaŋ kuti nɔɔ-tɔk wen ha̧ o bíí nɛ̀ Sɔ̧ saa mɛ́ kpa mɔɔ-oi nɛ̀ tɛ́ duk kpoo nɛ kpoo nɛ̀ Sɔ̧ ha̧a̧ so nú sɛnɛ.

¹⁶Wen fara nɛ̀ tɔ̧́ɔ̧́-wen zu mɔɔ-oi a̧a̧ sɛnɛ, wi tɛ́ iŋ fio ko wan-tɔ̧-wen'i.

¹⁷Tɔ̧́ɔ̧́-wen zu mɔɔ-oi-fio a̧a̧ nɛ̀ ŋgai ɗoŋ fio ɓɛɛ; ŋgimbi nɛ̀ wan-tɔ̧-wen biti duk kpasa, ɓɛɛ wen n'aa tɔ̧ zu mɔɔ-oi'i beka de ŋma mɔ na.

¹⁸Hegɔ, kuti nɔɔ-tɔk kpa so ŋgai na hɔ ŋgimbi nɛ̀ tɔk aa nɛ̀ nù.

¹⁹Ŋgimbi nɛ̀ Moisɛ tɔra so nɛ̀ o geŋa kpɔk kpɔk ha̧ dukbíí lɛŋ nyɛm nɛ̀ ɗoŋ heembea, a̧ baa tɔk o be-ndai in o vala-gbadua a ɗɔɔ yì, ɓɛɛ a̧ ba gbɛ̧ zɔ̧-laa buma-sami n'aa yuɓura ndɔŋ nú be-te[1] pi̧ ɗɔɔ-aa misi̧ nɛnɛ a zu kalata in dukbíí,

²⁰tɔ̧ nɛnɛ‘e ndé: «Mɔ'ɔ nɛ́ tɔk nɔɔ-tɔk nɛ̀ Sɔ̧ tɔ̧ɔ̧ wen-aa wen ɛ́nɛ́.»

²¹Nɛ́ mɔ'ɔ n'aa misa̧ tɔk'i a tɛ́ tua-laa in zu o nyɛk-ɗafi-sɔ̧ lɛŋ.

²²Heembea usa so'e tɔk nɛ́ mɔ nɛ̀ de ha̧ war ŋma mɔ nɛ̀ dɔka-a mɛ́ sa̧; ɓɛɛ hegɔ, kà tɔk á nù na, ea-ɗaŋmɔ bo na mbɛt.

²³Kà bó‘e dee do-mɔ hegɔ a̧ de ha̧ war mɔ nɛ̀ hɔɔ ŋmaa in o mɔ nɛ̀ duk yiwese mɛ́ sa̧, ɓɛɛ mɛ̀ nɛ́ o ɗafa-sɔ̧ nɛ̀ gana i̧i̧ batɛ a̧ tɛ́ de ha̧ war mgbák mɔ mɛ́ yiwese mɛ́ sa̧.

²⁴Wen bó nɛ́ Krist yee kɔ̧ sa̧a̧-fara nɛ̀ er bíí dea, nɛ hɔɔ ŋmaa in mgbák kpasa-a na, ɓɛɛ a̧ yee kɔ̧-a̧ nɛ́ si yiwese mɛ́, ha̧ a̧ mɛ́ nɛ̀ɛ́ duk ti Sɔ̧ kinii oi nú yɛ.

²⁵Ɓɛɛ bó nɛ́ ha̧ a̧ mɛ́ ha̧ tɛ-a yaknɛ hee mɔ'ɔ nɛ̀ gasa wan-ɗafi-sɔ̧ ye só nɛnɛ kɔ̧ sa̧a̧-fara tɛ́ pɛ kpɔk kpɔk ha̧ nɛ̀ tɔk saɗi’ɛ ga na.

²⁶Kà bó só hegɔ, war ɔ dɔka a̧ tɛ̀ɛ́ zɔk bɔnɛ ŋgimbi nɛ̀ nù ku̧u̧ nɛ̀ naŋ-a mɛ̀ tɛnɛ. Ɓɛɛ mɔ n'aa dea, a̧ hɔɔ war kpɔk tɛ́ sɔŋkur ŋgimbi, ha̧ nɛ̀ tɛ-a ɗafi nɛ̀ Sɔ̧ bí nɛ̀ ɗaŋmɔ yinɛ.

²⁷Mɔ ko bíí nɛ́ fea-a war kpɔk ɓɛɛ, ɓɛɛ ɗoŋ-aa nɛ́ kita.

²⁸Kale-a hegɔ mbɛt, Krist ha̧a̧ tɛ-wi war kpɔk, wen baa ɗaŋmɔ ko bíí nɛ̀ dɔka-a yinɛ, ɓɛɛ a̧ tɛ́ tɛ̀ war yiitoo-aa, bó nɛ́ wen zu ɗaŋmɔ ɓɔna, ɓɛɛ mɛ̀ nɛ́ wen kpasa o wi-pɛm-a.