Read Northwest Gbaya JAK 1 Bible Online

JAK 1 - Northwest Gbaya bible

JAK 1

¹Nɛ́ mi Jak, wi-de-tom ko Sɔ̧ in ko Gasa Wan Jesu Krist, a̧ tom kalata’ɛ ha̧ o zuduk bíí ko Sɔ̧ ɓu-zua-yiitoo nɛ̀ pɛsa dam zaŋnu; mi fana ɛ́nɛ́.

²O nya'm, ɛ̀nɛ̀ nɔ́ ŋgiɗi tɛ̀ o mɔ nɛ̀ ba tɛ‘nɛ́ lɛŋ nɛ̀ tortɛ,

³wen ɛ́nɛ́ iŋa o weamɔ we nɛ́ kɔ̧ɔ̧ɗɔɔwen k’ɛ́nɛ́ h’ɛ́nɛ́ mɛ́ kpa nɔɔ-ŋgiɗi.

⁴Ɓɛɛ nɔɔ-ŋgiɗi k’ɛ́nɛ́ a̧ dúk kànà nɛ́ kpasamɔ war kpɔk, wen h’ɛ́nɛ́ mɛ́ nyɛm sɛnɛ tɛ́ mɔ lɛŋ, ŋma mɔ ɓan na.

⁵Kà ŋma bíí mgbara'nɛ́ nɛ́ bòó nɛ̀ iŋa-mgbara-mɔ na, a̧ a̧ kɔfi er Sɔ̧, ɓɛɛ Sɔ̧ ha̧a̧ ha̧ a̧, wen Sɔ̧ nɛ́ wi nɛ̀ ha̧ mɔ ha̧ bíí lɛŋ, nɛ̀ dɔka-a in nɛ̀ desee.

⁶Wi’ɛi a̧ ák mɔ‘i nɛ̀ kɔ̧ɔ̧ɗɔɔwen; ká a̧ si káfɛ́ tikiɗi na, wen wi-si-kafɛ hɔɔ ŋmaa in pɛŋa-yì nɛ̀ búk ba si hɛ̧ɛ̧ si hi̧i̧.

⁷Ká pɛrti bíí hegɔ ta'e Gasa Wan tɛ́ ha̧ ŋma mɔ

⁸ha̧ wi nɛ̀ taamɔ kɔ̧-a̧ kɛ̧ɛ̧ yiitoo tɛ̀ o deemɔ kɔ̧-a̧ lɛŋ nɛtɛ nɛtɛ na.

⁹Nya yɛ nɛ̀ kpa mɔ dɔk na a̧ dúk nɛ̀ tortɛ ŋgimbi nɛ̀ Sɔ̧ tɛ́ ba a̧ e ŋgɔn.

¹⁰Ɓɛɛ nɛ̀ wanmbɔi a̧ dúk nɛ̀ tortɛ ŋgimbi nɛ̀ Sɔ̧ tɛ́ gbɔsi a̧ si ɗɔɔ, wen tika-a ko wanmbɔi hɔɔ ŋmaa in aia-a ko do-te.

¹¹Wen wese daŋ, kà kpɔr kaɗi ɓɛɛ dɔɔ zɔ̧ kor, do-a aia a nù, ɓɛɛ déè kɔ̧-a̧ kaɗa; mɛ̀ nɛ́ hegɔ a̧ wanmbɔi tɛ́ yu nɛnɛ mgbara o demɔ kɔ‘i.

¹²Wi nɛ̀ duk nɛ̀ nɔɔ-ŋgiɗi tɛ̀ weamɔ duk nɛ̀ desee, wen kà weamɔ‘i nɛ́ kaɗa, a̧ tɛ́ kpa mɔɔ-wan nɛ̀ duk nɛ́ duka-kpasa nɛ̀ Sɔ̧ ha̧a̧ so nú wen-aa ha̧ o wi nɛ̀ kɔ̧a̧ a̧.

¹³Ká ŋma bíí nɛ̀ mɔ we tɔ̧‘e weamɔ‘i tɛ̀ɛ́ nɛ̀ tɛ́ Sɔ̧ na, wen ŋma mɔ nɛ̀ tɛ́ we Sɔ̧ mɛ́ de ɗaŋmɔ bó na, ɓɛɛ Sɔ̧ nɛ̀ tɛ-a beka we bíí na mbɛt.

¹⁴Mɛ̀ nɛ́ wɔ-mɔ ko bíí kpɔk kpɔk a̧ ɔr bíí mɛ́ de ɗaŋmɔ.

¹⁵Kà wɔ-mɔ bá zaŋ kaɗi, ɓɛɛ koo ɗaŋmɔ; ɓɛɛ kà ɗaŋmɔ gásí kaɗi, ɓɛɛ koo fio.

¹⁶O nya'm n'am kɔ̧ɔ̧ nyɛmna, k’ɛ́nɛ́ ɔr tɛ‘nɛ́ tɛ́ mɔ‘i na.

¹⁷Ha̧a̧mɔ lɛŋ nɛ̀ duk nɛ́ kpasamɔ in nɛ̀ nyɛma sɛnɛ zir nɛ̀ ŋgɔn nɛ̀ tɛ Dáà ko sa̧a̧mɔ. Sɔ̧ fo tɛ̀ mɛ́ kpai kà tum dé nɛnɛ na mbɛt.

¹⁸A̧ koo yɛ nɛ̀ ɗoŋ kpasawen nyɛm nɛ̀ ɗoŋ mɔ n'aa kɔ̧a̧, h’ɛ́ɛ́ mɛ́ ya nɛ́ kuti zu-mɔ mgbara o mɔ n'aa dea lɛŋ.

¹⁹O nya'm n'am kɔ̧ɔ̧ nyɛmna, ɛ́nɛ́ nɛ́ o wi-iŋ-mɔ; zer'nɛ́ a̧ kɔɓi wen nɛ̀ haya-a, ɓɛɛ ká nú‘nɛ́ tɔ̧ wen hai na, ká see'nɛ́ kur nɛ̀ haya-a na mbɛt.

²⁰Wen wi-de-nyimsea de tom nɛ̀ yuwar-a nyɛm yí Sɔ̧ na.

²¹Hegɔ, ɛ̀nɛ̀ é mɔ nɛ̀ de ndiŋ in ɗaŋ deemɔ dúk, ɓɛɛ ɛ̀nɛ̀ kpɛ́k wen ko Sɔ̧ nɛ̀ guna kɔ̧ see'nɛ́ nɛ̀ mɔka-see, wen wen'i nyɛma mɛ́ kpasi'nɛ́.

²²K’ɛ́nɛ́ ɔr tɛ‘nɛ́ tɛ̀ yaa-a nɛ̀ desee zii nɛ̀ wen ko Sɔ̧ ɓɛɛ na, ɓɛɛ ɛ̀nɛ̀ dé nɛ́ tom-aa nɛ̀ mbetɛ.

²³Hegɔ wi nɛ̀ zii wen ko Sɔ̧ ɓɛɛ de mɔ nɛ̀ wen'i usi na, hɔɔ ŋmaa in ŋma bíí nɛ̀ zɔk yí nɛ̀ mɔɔ-zɔk-yí, ɓɛɛ ɗoŋ n'aa zɔka mgbák yí-a nɛ̀ wa koo nɛ̀ a̧ kaɗi, kà a̧ yák, ɓɛɛ a̧ iŋ oi yí-a ɓɔna.

²⁵Wi nɛ̀ zɔk heembea wan nɛ̀ nyɛma sɛnɛ nɛ̀ de ha'i mɛ́ kpa zu, de nɛ̀ mɔ-a, kà wi’ɛi nyɔ́ŋ nin sɛnɛ, nɛ̀ bó nɛ́ zia-a nɛ̀ ɗoŋ zer géè ɓɛɛ na, wi’ɛi tɛ́ kpa toka-de-yoŋgo tɛ́ mɔ n'aa tɛ́ de.

²⁶Wi nɛ̀ ta'e wi a̧a̧ tɛ̀ yuwar-gasa-sɔ̧, kà a̧ íŋ dora leɓ‘a na, a̧ ɔr nɛ́ tɛ-a nɛ̀ tɛ-a, ɓɛɛ yuwar-gasa-sɔ̧ kɔ̧-a̧‘i nɛ́ geemɔ.

²⁷Yuwar-gasa-sɔ̧ nɛ̀ nyɛma sɛnɛ in nɛ̀ ɔ sa̧a̧ nɛ́ mɔ'ɔ: gbaka o be-oi in o ko-gera tɛ̀ dita-see kɔ-wa, in zɔka tɛ-wi nɛ̀ mɔɔ-zaŋnu ká‘i tɛ́ɛ̀ ɗaŋ war-tɛ-wi.