Read Northwest Gbaya JAK 2 Bible Online

JAK 2 - Northwest Gbaya bible

JAK 2

¹O nya'm, ɛ́nɛ́ beka kɔ̧ ɗɔaa ha̧ Jesu Krist Gasa Wan k’ɛ́ɛ́ nɛ̀ a̧a̧ nɛ̀ gasamɔ, dúk nɛnɛ tɛ̀ kɛ̧ɛ̧-mgbara-bíí na.

²Ŋmafara, ŋma bíí pi̧i̧ de wele-lɔr er in gba de laa ye nɛnɛ mgbara'nɛ́ tɛ̀ mɔi̧a-a k’ɛ́nɛ́, ɓɛɛ nɛ́ mɔ'ɔ nɛ̀ ŋma wisan pi̧i̧ kɔ‘i nɛ́ a̧ka̧ laa zɛgbɛ-zɛgbɛ ye nɛnɛ tɛ̀ mɔi̧a-a'i mbɛt,

³ɓɛɛ k’ɛ̀nɛ̀ kpɛ́k nɛ́ wi-pi̧-de-laa mɛ́ tɔ̧ ha̧ a̧‘e: «Ɛ̀nɛ̀ tɛ́ɛ̀ dúk k’ɛ́nɛ́ tɛ̀ de fara hɛ̧ɛ̧,» kóó k’ɛ̀nɛ̀ tɔ̧́ ha̧ wisan'e: «Mɛ̀ yór kɔ-mɛ mɛ‘i», kóó: «Mɛ̀ dúk nù ká̧ mɔɔ-duk-nɛnɛ kɔ‘m hɛ̧ɛ̧»,

⁴bó nɛ́ kɛ̧ɛ̧-mgbara-bíí a̧‘i na nde? Bó nɛ́ ɛ́nɛ́ kifa dúk nɛ́ wi-gɔn-kita nɛ̀ a̧a̧ nɛ̀ ɗaŋ taamɔ na nde?

⁵O nya'm n'am kɔ̧ɔ̧ nyɛmna, ɛ̀nɛ̀ zii: bó nɛ́ Sɔ̧ a̧ hoka o wi nɛ̀ o bíí zaŋnu zɔk hee o wisan ga'i mɛ́ de ha̧ wa mɛ́ duk wi-kpa-mɔ tɛ̀ kɔ̧ɔ̧ɗɔɔwen in ha̧ wa mɛ́ kpa Wan ko Sɔ̧ nɛ̀ mɔɔ-oi n'aa ha̧a̧ so nú sɛnɛ ha̧ o wi nɛ̀ kɔ̧a̧ a̧ na nde?

⁶Ɓɛɛ k’ɛ́nɛ́ nɛ́ mɔ'ɔ n’ɛ̀nɛ̀ e nɛ́ o wisan tɛ̀ geemɔ! Bó nɛ́ o wanmbɔi a̧ usi bɔnɛ h’ɛ́nɛ́, gbur nɛ̀ ɛ́nɛ́ nɛnɛ si ti kita’ɛ na nde?

⁷Bó nɛ́ wa a̧ ɗaŋ de nin nɛ̀‘i sa h’ɛ́nɛ́'ɛ na nde?

⁸Ɓɛɛ k’ɛ̀nɛ̀ kásí heembea Wan ko Sɔ̧ nyɛm nɛ̀ ɗoŋ mɔ nɛ̀ Yɔramɔ tɔ̧a̧‘e: «Mɛ̀ kɔ̧́ ŋma mɛ́ hee kiitɛ-mɛ ga», ɓɛɛ ɛ́nɛ́ de nɛ́ demɔ.

⁹K’ɛ̀nɛ̀ kɛ̧́ mgbara bíí, ɛ́nɛ́ de nɛ́ ɗaŋmɔ, ɓɛɛ heembea tɛ́ ba'nɛ́ hee wi-gbin-heembea ga.

¹⁰Kà‘i kásí o heembea lɛŋ, ɓɛɛ kà‘i gbín ŋma kpɔk, ɓɛɛ wi gbina heembea nɛ́ oi-aa lɛŋ kaɗi.

¹¹Wen wi nɛ̀ tɔ̧a̧: «Ká‘i dé dàlà na», nɛ́ kpɔk wi’ɛi a̧ tɔ̧ɔ̧ mbɛt'e: «Ká‘i gbɛ́ zu na». Kà mɛ́ nɛ́ dee dàlà na, ɓɛɛ kà mɛ̀ gbɛ zu, mɛ́ gbina heembea.

¹²Ɛ̀nɛ̀ tɔ̧́ wen de nɛ̀ mɔ hee o bíí nɛ‘i saa mɛ́ gɔn kita zu wa nyɛm nɛ̀ ɗoŋ heembea-kpaa-zu ga.

¹³Wi nɛ̀ de ko ha̧ ŋma-a na, kita beka de ko ha̧ wi’ɛi na mbɛt. Deako gana zu kita.

¹⁴O nya'm, k’ɛ̀ɛ̀ tɔ̧́‘e, ɛ́ɛ́ a̧a̧ nɛ̀ kɔ̧ɔ̧ɗɔɔwen, ɓɛɛ kà tom-aa bó na, mɔ‘i tɛ́ gbak hee ge? Pɛrti kɔ̧ɔ̧ɗɔɔwen hegɔ‘i nyɛma mɛ́ kpasi wi nde?

¹⁵Kà ŋma nya-wi, kóó ŋma boko-nya-wi bó nɛ̀ laa-pi̧-tɛ, kóó kà a̧ bó nɛ̀ nyɔŋmɔ na wese lɛŋ,

¹⁶ɓɛɛ kà ŋma bíí mgbara'nɛ́ tɔ̧ ha̧ a̧‘e: «Mɛ̀ ɔ́ nɛ̀ de-a, tɛ-mɛ a̧ bá wee, zaŋ-mɛ a̧ sur,» ɓɛɛ bó nɛ́ wi’ɛi ha̧a̧ nɛ́ mɔ nɛ̀ ɓan a̧ ha̧ a̧ na'i, mɔ‘i tɛ́ gbak hee ge?

¹⁷Kale-a mbɛt, kà kɔ̧ɔ̧ɗɔɔwen dúk ɛ̀nɛ̀, tom-aa bó na, nɛ́ fio-mɔ.

¹⁸Kà ŋma bíí tɔ̧́‘e, mi a̧a̧ nɛ̀ kɔ̧ɔ̧ɗɔɔwen ɓɛɛ kɔ‘i wi a̧a̧ nɛ dee tom; a̧ a̧ usi mɔɔ-kɔ̧ɔ̧ɗɔɔwen kɔ̧-a̧ nɛ̀ tom-aa bó na'i ha̧‘m, ɓɛɛ mi usa mɔɔ-kɔ̧ɔ̧ɗɔɔwen kɔ‘m tɛ́ tom-aa ha̧ a̧.

¹⁹Mɛ́ kɔ̧ɔ̧ ɗɔaa'e Sɔ̧ kpɔk ɓɛɛ? Ɔ dee nyɛmna. O ɗaŋ-sɔ̧ kɔ̧ɔ̧ ɗɔaa hegɔ mbɛt, ɓɛɛ tɛ-wa nak nak.

²⁰Mɛ́ nɛ̀ bó nɛ̀ kpasa taamɔ na’ɛ, mɛ́ kɔ̧ɔ̧ mɛ́ iŋ‘e kɔ̧ɔ̧ɗɔɔwen nɛ̀ tom-aa bó na, nɛ́ fio-mɔ nde?

²¹Bó nɛ́ Sɔ̧ zɔka dáà k’ɛ́ɛ́ Abraham hee wi-de-mɔ nɛ̀ yuwar-a ga wen zu tom kɔ̧-a̧, ŋgimbi n'aa ha̧a̧ nɛ̀ bem kɔ̧-a̧ Izak zu fara-ɗafi-sɔ̧ na nde?

²²Mɛ̀ zɔk, kɔ̧ɔ̧ɗɔɔwen in dee tom kɔ̧-a̧ yee ŋmaa; mɛ̀ nɛ́ tom a̧ dee ha̧ kɔ̧ɔ̧ɗɔɔwen mɛ́ nyɛm sɛnɛ.

²³Hegɔ, mɔ nɛ̀ Yɔramɔ tɔ̧ɔ̧ so wen-aa hɔɔ gba̧a̧: «Abraham kɔ̧ɔ̧ ɗɔaa ha̧ Sɔ̧, ɓɛɛ Sɔ̧ zɔk a̧ hee wi-de-mɔ nɛ̀ yuwar-a ga wen zu mɔ‘i,» ɓɛɛ sa Abraham'e sɛm kɔ‘i.

²⁴Hee ɛ́nɛ́ zɔka ga, mɛ̀ nɛ́ tɛ́ tom a̧‘i zɔk nɛ̀ bíí hee wi-de-mɔ nɛ̀ yuwar-a ga, bó nɛ́ tɛ̀ kɔ̧ɔ̧ɗɔɔwen ɓɛɛ na.

²⁵Mɛ̀ nɛ́ kale mɔ‘i a̧ dee so in Rahab, kó-de-mɔ nɛ̀ mbɔɗɔnu mbɛt. Sɔ̧ zɔka a̧ hee wi-de-mɔ nɛ̀ yuwar-a ga wen zu tom n'aa dea, ŋgimbi n'aa kpɛka so nɛ̀ o betom, usi nɛ̀ mbe yuwar ha̧ wa mɛ́ yak nɛnɛ.

²⁶Kà ɔmi bó na, kiitɛ-wi nɛ́ fio-mɔ; kà tom bó na, kɔ̧ɔ̧ɗɔɔwen nɛ́ fio-mɔ mbɛt.