Read Northwest Gbaya JAK 4 Bible Online

JAK 4 - Northwest Gbaya bible

JAK 4

¹Nɛ̀ ge a̧ dak biro in kpɛri pi̧ mgbara'nɛ́ ge? Bó nɛ́ o wɔ-mɔ k’ɛ́nɛ́ a̧ de biro tɛ́ kiitɛ‘nɛ́ na nde?

²Ɛ́nɛ́ de wɔ mɔ nyɛmna, ɓɛɛ ɛ́nɛ́ kpa na; ɛ́nɛ́ nɛ́ o wi-gbɛ-zu nɛ̀ a̧a̧ nɛ̀ aa-see-mɔ; hegɔ ɛ́nɛ́ beka kpa mɔ na. Ɛ́nɛ́ bí nɛ́ biro, dak nɛ̀ biro pi̧ nù. Ɛ́nɛ́ kpa mɔ na, wen ɛ́nɛ́ ak na.

³Ɛ́nɛ́ ak, ɓɛɛ ɛ́nɛ́ kpa na, wen ɛ́nɛ́ ak nɛ́ mɔɔ-ha̧-desee h’ɛ́nɛ́ ɓɛɛ.

⁴Ɛ́nɛ́ hɔɔ ŋmaa in ko-de-ŋgazu! Ɛ́nɛ́ iŋ‘e dee sɛm in mɔɔ-zaŋnu nɛ́ sɛna Sɔ̧ na nde? Wen wi nɛ̀ kɔ̧ɔ̧ mɛ́ de sɛm in mɔɔ-zaŋnu, duk nɛ́ wisɛn ko Sɔ̧.

⁵Ɛ́nɛ́ ta k’ɛ́nɛ́‘e nɛ́ géé wen a̧ Yɔramɔ tɔ̧a̧‘e: «Sɔ̧ kɔ̧ɔ̧ ɔmi n'aa ee mɛ́ duk tɛ-ɛɛ hegɔ hɔ tɛ̀ dee gɔya-a'i» nde?

⁶Zu mɔ‘i Sɔ̧ dee mɔ nɛ̀ ta-tɛ h’ɛ́ɛ́ gan zu i̧i̧ batɛ, wen Yɔramɔ tɔ̧a̧‘e: «Sɔ̧ kifi er kifi ha̧ o wi-gasi-zu, ɓɛɛ a̧ dee demɔ in o wi-mɔka-see.»

⁷Ɛ̀nɛ̀ mbó zu ha̧ Sɔ̧, ɓɛɛ k’ɛ́nɛ́ kpɛk Wan-ɗaŋmɔ na; hegɔ, Wan-ɗaŋmɔ tɛ́ yu mɔ nyɛi̧ nɛ̀ ɛ́nɛ́.

⁸Ɛ̀nɛ̀ ɗɔ́ŋ pii katɛ Sɔ̧, ɓɛɛ a̧ tɛ́ ɗɔŋ pii katɛ‘nɛ́ mbɛt; ɛ̀nɛ̀ o ɗaŋwi, ɛ̀nɛ̀ fɔ́r er'nɛ́, ɓɛɛ ɛ́nɛ́ o wi nɛ̀ a̧a̧ nɛ̀ see yiitoo, ɛ̀nɛ̀ ɗáfí see'nɛ́ mɛ́ duk nɛ̀ sa̧a̧-a̧.

⁹Ɛ̀nɛ̀ tá bɔnɛ k’ɛ́nɛ́, ɛ̀nɛ̀ zím fio, ɛ̀nɛ̀ hí̧í̧ kɔ̧a̧; mami k’ɛ́nɛ́ a̧ dúk nɛ́ hi̧a̧-fio, ɓɛɛ desee k’ɛ́nɛ́ a̧ dúk nɛ́ dita-see.

¹⁰Ɛ̀nɛ̀ mɔ́k see'nɛ́ ti Gasa Wan, ɓɛɛ a̧ tɛ́ ba'nɛ́ e ŋgɔn.

¹¹O nya'm, k’ɛ́nɛ́ ɗaŋ wen tɛ́ ŋmaa in o ŋmaa na. Wi nɛ̀ ɗaŋ wen tɛ̀ nya-wi nɛ̀ ɗoŋ, tɔ̧́ nɛ́ ɗaŋ wen zu heembea gɔn nɛ̀ kita sɛnɛ mbɛt. Kà mɛ gɔn kita zu heembea, ɓɛɛ mɛ́ bó nɛ́ wi-kasi-heembea ɓɔna; mɛ́ kifa duk nɛ́ wi-gɔn-kita zu heembea.

¹²Wan-ha̧-heembea in wan-gɔn-kita nɛ́ kpɔk ɓɛɛ; nɛ́ à̧ á̧ nyɛma kpasa bíí, kóó dea-a ha̧ bíí mɛ́ yɔ mbɛt. Ɓɛɛ kɔ-mɛ, mɛ́ nɛ́ o mɛ́ gɔn kita zu ŋma-mɛ o?

¹³Ɓɛɛ ɛ́nɛ́ nɛ̀ tɔ̧‘e: «Sɔsɔɔ, kóó mɔɔsa̧, ɛ́ɛ́ tɛ́ nɛ̀ saaye mɛ̀‘i, ɛ́ɛ́ tɛ́ duk hi̧i̧ pɛ kpɔk, ɗɔr nɛ̀ mɔ, kpa nɛ̀ mbɔi wo’ɛ,»

¹⁴ɛ́nɛ́ iŋ duka-a k’ɛ́nɛ́ mɛ́ sa̧a̧mɔ na, wen ɛ́nɛ́ hɔɔ ŋmaa in kutu nɛ̀ duk ɗoŋ-aa nyɛi̧ na ɓɛɛ gɔna’ɛ.

¹⁵Ɛ́nɛ́ tɛ̀ɛ́ tɔ̧ so'e ndé: «Kà Gasa Wan nɛ́ kɔ̧a̧ ɛ́ɛ́ tɛ́ duk kpasa siti, de nɛ̀ ɛ̧ɛ̧, kóó i̧i̧.»

¹⁶Zɔk kinii, ɛ́nɛ́ gasi nɛ́ zu'nɛ́, ŋmaŋ nɛ̀ tɛ‘nɛ́; gasa zu hegɔ de na.

¹⁷Wi nɛ̀ iŋa dee demɔ, ɓɛɛ nɛ̀ de na, de nɛ́ ɗaŋmɔ.