Read Northwest Gbaya JAK 5 Bible Online

JAK 5 - Northwest Gbaya bible

JAK 5

¹Ɓɛɛ k’ɛ́nɛ́ o wanmbɔi, ɛ̀nɛ̀ hí̧í̧ tɛ‘nɛ́ ŋgaɓo, wen bɔnɛ nɛ̀ pɛm'nɛ́‘i.

²Kpaamɔ k’ɛ́nɛ́ mbɔra, o zɛmɛ nyɔŋa laa k’ɛ́nɛ́,

³lɔr in bu-mbɔi k’ɛ́nɛ́ gbɛɛ dua, ɓɛɛ gbɛɛ-dua kɔ-wa tɛ́ de sedaako zu'nɛ́; wa tɛ́ dɔ kpoo-tɛ‘nɛ́ hee wee ga. Ɛ́nɛ́ mɔi̧a o kpaamɔ e wen sɔŋkur ŋgimbi.

⁴Ɛ̀nɛ̀ zɔk, sede-tom ko o bíí nɛ̀ mɔi̧a nyɔnɔ kpɛɛfɔ k’ɛ́nɛ́ n’ɛ̀nɛ̀ dora, hiɗi nɛ́ mɔ; ɓɛɛ hiɗimɔ ko o wi-de-tom nɔ‘i a zer Gasa Wan ko o wi-biro.

⁵Ɛ́nɛ́ kpaa de duka-a zaŋnu zaŋ bɔtɛ in demɔ, zaŋ‘nɛ́ sura wèsé-gbɛ-mɔ[1].

⁶Ɛ́nɛ́ gɔna kita-fio zu o wi-de-mɔ nɛ̀ yuwar-a gbɛ nɛ̀ wa, wa de ŋgai na.

⁷O nya'm, ɛ̀nɛ̀ nɔ́ ŋgiɗi hɔ ŋgimbi pia-ɗoŋ ko Gasa Wan. Ɛ̀nɛ̀ zɔ́k wi-wa-fɔ! A̧ pɛm nɛ́ gba de nyɔnɔ-fɔ kɔ̧-a̧ nɛ̀ nɔɔ-ŋgiɗi hɔ ŋgimbi mɔi̧a kuti zu-nyɔnɔ in sɔŋkur-aa mbɛt.

⁸Ɛ́nɛ́ mbɛt, ɛ̀nɛ̀ nɔ́ ŋgiɗi, see'nɛ́ a̧ nɔ, wen pia-ɗoŋ ko Gasa Wan hɛɗa kaɗi.

⁹O nya'm, k’ɛ́nɛ́ ku̧i̧ mɔ zu ŋmaa in o ŋmaa na, wen ká Sɔ̧ tɛ́ɛ̀ gɔn kita zu'nɛ́. Ɛ̀nɛ̀ zɔ́k wi-gɔn-kita a̧ yor nú tua'i.

¹⁰O nya'm, ɛ̀nɛ̀ zɔ́k nɛ́ ɗoŋ bɔnɛ in nɔɔ-ŋgiɗi ko o wi-tɔ̧-wen oi nú Sɔ̧ nɛ̀ tɔ̧ɔ̧ so wen nɛ̀ nin Gasa Wan.

¹¹Ɛ̀nɛ̀ zɔk: ɛ́ɛ́ zɔn nɛ́ o wi nɛ̀ nɔ ŋgiɗi tɛ́ bɔnɛ; ɛ́nɛ́ zia so nyɛrɛ nɔɔ-ŋgiɗi ko Job, ɓɛɛ ɛ́nɛ́ zɔka mɔ nɛ̀ Gasa Wan dee in a̧ nɛ̀ sɔŋkur-aa mbɛt, wen Gasa Wan nɛ́ Wi-de-demɔ nɛ dɔka-a in Wi-de-ko.

¹²Ɓɛɛ tɛ́ mɔ lɛŋ, o nya'm, k’ɛ́nɛ́ kan mɔ na; k’ɛ́nɛ́ kan yiwese, kóó nù, kóó ŋma mɔ na mbɛt; «íí» k’ɛ́nɛ́ a̧ ɓɔn nɛ́ «íí,» ɓɛɛ «weyaa» k’ɛ́nɛ́ a̧ ɓɔn nɛ́ «weyaa,» wen ká kita tɛ́ɛ̀ tik'nɛ́.

¹³Kà ŋma bíí mgbara'nɛ́ zɔk bɔnɛ, a̧ a̧ kɔfi Sɔ̧; kà a̧ dúk nɛ̀ desee, a̧ a̧ bíí gima-gasi Sɔ̧.

¹⁴Kà ŋma bíí mgbara'nɛ́ ɔ zɛɛ, a̧ a̧ sa o kuti-wi mgbara zuduk bíí ko Krist tɛnɛ, ha̧ wa tɛn nɔ̧́ a zu-a nɛ̀ nin Gasa Wan Jesu, ɓɛɛ wa kɔfa Sɔ̧.

¹⁵Kɔfa-sɔ̧ nɛ̀ kɔ̧ɔ̧ɗɔɔwen tɛ́ kpasi wi-zɛɛ‘i ɓɛɛ Gasa Wan tɛ́ ba a̧ e ŋgɔn; kà a̧ nɛ́ dee so nɛ́ ŋma ɗaŋmɔ, Gasa Wan tɛ́ e ha̧ a̧ mbɛt.

¹⁶Wen hegɔ, ɛ̀nɛ̀ gbár ɗaŋmɔ k’ɛ́nɛ́ ha̧ ŋmaa in o ŋmaa, ɓɛɛ ɛ̀nɛ̀ kɔ́fí Sɔ̧ wen ŋmaa in o ŋmaa mbɛt, wen ha̧ zɛɛ k’ɛ́nɛ́ mɛ́ kaɗi, wen kɔfa-sɔ̧ ko wi-de-mɔ nɛ̀ yuwar-a a̧a̧ nɛ̀ ŋgai nyɛmna.

¹⁷Elii duka so nɛ́ bíí hee ɛ́ɛ́ ga; a̧ kɔfa Sɔ̧ nɛ̀ ŋgaya-a wen ká kórò tɛ́ɛ̀ hɔ, ɓɛɛ kórò hɔ na tɛ́ pɛ taar nɛ̀ fio-zɛ mɔɔrɔ-ɗoŋ-kpɔk.

¹⁸Mɛ́ ɗoŋ woyo a̧ kɔfa Sɔ̧, ɓɛɛ kórò hɔ, ɓɛɛ nù dɛm nyɔnɔ.

¹⁹O nya'm, kà ŋma bíí mgbara'nɛ́ a̧r nyɛi̧ nɛ̀ kpasawen, ɓɛɛ kà‘i mgbɔ a̧ piiɗoŋ,

²⁰ɛ̀nɛ̀ íŋ‘e wi nɛ̀ mgbɔɔ ɗaŋwi nɛ̀ a̧ra̧ so'i piiɗoŋ kpàsá nɛ́ sɔ̧-tɛ-wí'ɛi,[2] ɓɛɛ a̧ de ha̧ o ɗaŋmɔ nɛ̀ dɔka-a mɛ́ bi.