Read Northwest Gbaya 1 PIERRE 2 Bible Online

1 PIERRE 2 - Northwest Gbaya bible

1 PIERRE 2

¹Ɛ̀nɛ̀ é dee ɗaŋ in gɔn-ta, in deemɔ nɛ̀ see yiitoo, in aa-see-mɔ, ká bá nɛ̀ baa-nin-bíí lɛŋ duk.

²Ɛ̀nɛ̀ dé wɔ yibere nɛ̀ duk nɛ̀ sa̧a̧-a̧, hee o be-zɔɗi ga; yibere'i nɛ́ wen ko Sɔ̧ nɛ̀ tɛ́ de h’ɛ́nɛ́ mɛ́ gasi, ɓɛɛ ɛ́nɛ́ kpasa.

³Wen ɛ́nɛ́ wee Gasa Wan hee leeko ga, ɓɛɛ ɛ́nɛ́ iŋ‘e a̧ ɔ dee.

⁴Ɛ̀nɛ̀ ɗɔ́ŋ píí katɛ a̧, wen a̧ nɛ́ kpasa ta wan nɛ̀ duk kpasa nɛ̀ o bíí pi̧i̧ so taŋ; nɛ́ Sɔ̧'ɔ̧ hoka a̧, ɓɛɛ a̧ duk nɛ́ gasamɔ nyɛmna yí Sɔ̧.

⁵Ɛ́nɛ́ dúk hee ta nɛ̀ duk kpasa ga mbɛt, ha̧ Sɔ̧ mɛ́ kai'nɛ́ mbo nɛ̀ tua ko Sa̧a̧ Ɔmi. Ɛ́nɛ́ tɛ́ ya nɛ́ zuduk sa̧a̧ o wi-ɗafi-sɔ̧ nɛ̀ tɛ́ ha̧ mɔɔ-ɗafi-sɔ̧ wan mɛ́ ko Sa̧a̧ Ɔmi nɛ̀ tɛ́ de tɛ́ Sɔ̧ nɛ̀ ɗoŋ Jesu Krist.

⁶Wen Yɔramɔ tɔ̧ɔ̧ so'e nde: «Mi hoka ŋma ta nɛ̀ gɛnɛ-a ɔ ŋgaya ɓɛɛ mi e a̧ nɛ̀ ta-e-mgbii-tua kinii sɛn Siɔŋ, hegɔ foe beka ba wi nɛ̀ e ta nɛ̀ a̧ na.»

⁷Zɔnamɔ nɛ́ k’ɛ́nɛ́ o wi nɛ̀ kɔ̧ɔ̧ ɗɔaa; ɓɛɛ war ko o wi nɛ̀ kɔ̧ ɗɔaa na, «Ta nɛ̀ o wi-mbo-tua pi̧i̧ so taŋ kifa duk nɛ́ de ta-e-mgbii-tua.»

⁸Sɛn ŋma fara tɔ̧a̧ mbɛt'e: «Ta'i mbɛt nɛ́ ta-kɔ̧-naŋ, nɛ́ kam-ta nɛ̀ de ha'i mɛ́ yo nù.» Wa kɔ̧ɔ̧ naŋ-wa nɛ̀ ta'i wen wa bɛ̧ɛ̧ kɔ̧ɔ̧ ɗɔɔ wen ko Sɔ̧, wen nɛ́ mɔ‘i a̧ duk so pɛm nɛ̀ wa.

⁹War k’ɛ́nɛ́, ɛ́nɛ́ nɛ́ kpar zuduk nɛ̀ Sɔ̧ hoka, ɛ́nɛ́ nɛ́ zuduk o wi-ɗafi-sɔ̧ ko wannu; ɛ́nɛ́ nɛ́ sa̧a̧ tugun bíí, ɛ́nɛ́ nɛ́ dukbíí nɛ̀ Sɔ̧ baa e mɛ́ duk nɛ́ kɔ‘i. Sɔ̧ hoka'nɛ́ mɛ́ tɔ̧ wen zɔm dee demɔ kɔ‘i, a̧ nɛ́ wi nɛ̀ saa'nɛ́ gbonɛ nɛ̀ ti-tum pii tɛ́ gba de sa̧a̧mɔ kɔ̧-a̧.

¹⁰Wen nɛti, ɛ́nɛ́ bó só nɛ́ dukbíí ko Sɔ̧ na, ɓɛɛ kinii ɛ́nɛ́ nɛ́ dukbíí kɔ̧-a̧; nɛti Sɔ̧ de so ko h’ɛ́nɛ́ na, ɓɛɛ kinii a̧ dee ko h’ɛ́nɛ́.

¹¹O de sɛm kɔ‘m, mi ai nú h’ɛ́nɛ́ hee ha̧ o wi-ɓir-war in o gɛnɛ ga, h’ɛ́nɛ́ mɛ́ dor tɛ‘nɛ́ tɛ̀ dee wɔ-mɔ ko mur-tɛ nɛ̀ de nɛ́ biro in sɔ̧-tɛ.

¹²Naŋanɔ k’ɛ́nɛ́ à̧ dúk nɛ̀ de-a sɛn mgbara o gɔni-dùk; hegɔ, kóó nɛ̀ oi baa nin'nɛ́ nɛ̀ wa ba tɔ̧ nɛnɛ‘e, ɛ́nɛ́ de nɛ́ ɗaŋmɔ wó‘i, dee demɔ k’ɛ́nɛ́ tɛ́ usi mɔ ha̧ wa, ɓɛɛ wa gasa Sɔ̧ mbɛt wese tɛa-a kɔ̧-a̧.

¹³Ɛ̀nɛ̀ mbó zu ha̧ o bíí lɛŋ nɛ̀ ɔ wan zu bíí wen zu Gasa Wan, kóó nɛ́ wannu nɛ̀ dúk zu o dɔka bíí,

¹⁴kóó o gasawi n'aa e mɛ́ gɔn kita zu o wi-de-ɗaŋmɔ in mɛ́ zɔn o wi-de-demɔ.

¹⁵Mɔ nɛ Sɔ̧ kɔ̧a̧ mɛ̀ nɛ́ wen h’ɛ́nɛ́ mɛ́ de nɛ̀ demɔ; hegɔ, ɛ́nɛ́ tɛ́ kpe nú o wi nɛ̀ iŋ mɔ na nɛ̀ bó nɛ̀ kpasa taamɔ na.

¹⁶Duka-a k’ɛ́nɛ́ a̧ dúk nɛ́ ko o bíí nɛ̀ kpaa zu, ɓɛɛ k’ɛ́nɛ́ ba kpaa-zu k’ɛ́nɛ́ kpe nɛ̀ ɗaŋ k’ɛ́nɛ́ hee laa ga na, ɓɛɛ ɛ̀nɛ̀ dé mɔ hee o wi-de-tom ko Sɔ̧ ga.

¹⁷Ɛ̀nɛ̀ tú̧ tɛ̀ o bíí lɛŋ, ɛ̀nɛ̀ kɔ̧́ o nya'nɛ́, ɛ̀nɛ̀ yú kíí Sɔ̧, ɓɛɛ ɛ̀nɛ̀ tú̧ tɛ́ wannu.

¹⁸O wi-de-tom, ɛ̀nɛ̀ mbó zu ha̧ o wan-tom k’ɛ́nɛ́, yú nɛ̀ wa nɛ̀ kpasa-a, bó nɛ́ ha̧ o wan nɛ̀ duk nɛ̀ de-a, nɛ̀ ga̧a̧-a̧ mbɛt ɓɛɛ na, ɓɛɛ ha̧ o wan nɛ̀ duk nɛ̀ ɗaŋ-a mbɛt.

¹⁹Kà‘i nyɔ́ŋ nin nɛ̀ ɗoŋ mboozu ha̧ Sɔ̧ tɛ́ bɔnɛ nɛ‘i zɔk nɛ̀ duk nɛ̀ yuwar-a na, mɔ‘i nɛ́ demɔ.

²⁰K’ɛ̀nɛ̀ nyɔ́ŋ nin zu bɔnɛ wen ŋma ɗaŋmɔ n’ɛ̀nɛ̀ dea, ɓɛɛ ŋma zɔnamɔ tɛ́ mɔ‘i nɛ́ ge? Ɓɛɛ k’ɛ̀nɛ̀ nɛ́ dee nɛ́ demɔ, nɛ́ mɔ'ɔ n’ɛ̀nɛ̀ zɔk bɔnɛ wen-aa nɛ̀ nɔɔ-ŋgiɗi, mɔ‘i nɛ́ gasa demɔ yí Sɔ̧.

²¹Mɛ̀ nɛ́ mɔ‘i a̧ Sɔ̧ saa'nɛ́ mɛ́ de, wen Krist zɔka so bɔnɛ wen zu'nɛ́, usi nɛ̀ ɗoŋ-aa h’ɛ́nɛ́ mɛ́ de hegɔ mbɛt.

²²A̧ de ŋma ɗaŋmɔ na, wi kpa ŋma wen-ɔr-mɔ kɔ̧ nú-a na;

²³wa da̧a̧ a̧, ɓɛɛ a̧ da̧ kɔ̧-a̧ siɗoŋ na; zaŋ bɔnɛ kɔ̧-a̧, a̧ be mɔ a zu wa na; a̧ ee mɔ lɛŋ er wi nɛ̀ gɔn kita nɛ̀ yuwar-a.

²⁴A̧ nɛ́ wi nɛ̀ baa o ɗaŋmɔ k’ɛ́ɛ́ e tɛ́ kiitɛ-a sɛn zu te-diŋa, wen h’ɛ́ɛ́ mɛ́ fe ti ɗaŋmɔ k’ɛ́ɛ́, ɓɛɛ h’ɛ́ɛ́ mɛ́ duk kpasa, wen dee mɔ nɛ̀ yuwar-a. Nɛ́ da̧i̧ kɔ̧-a̧ á̧ kpasa'nɛ́.

²⁵Wen ɛ́nɛ́ yaa so hee o sami nɛ̀ yɔa ga, ɓɛɛ kinii ɛ́nɛ́ zika tɛ̀ pii tɛ́ wan-dai-sami in wan-pɛm-sɔ̧-tɛ‘nɛ́.