Read Northwest Gbaya 1 PIERRE 3 Bible Online

1 PIERRE 3 - Northwest Gbaya bible

1 PIERRE 3

¹Kale-a mbɛt, okoo, ɛ̀nɛ̀ mbó zu ha̧ o wíì k’ɛ́nɛ́, wen kà ŋma bíí mgbara wa bɛ̧ kɔ̧ɔ̧ ɗɔɔ Wen ko Sɔ̧, ɓɛɛ mɛ̀ nɛ́ duka-a k’ɛ́nɛ́ nɛ̀ sa̧a̧-a̧ in nɛ̀ tu̧u̧-tɛ-mɔ a̧ tɛ́ de ha̧ wa mɛ́ kɔ̧ ɗɔɔ wen'i, nɛ̀ bó nɛ́ tɛ́ ŋma wen k’ɛ́nɛ́ na.

³Ká ɗafa-tɛ k’ɛ́nɛ́ dúk nɛ́ wan mɛ́ zan, tɛ̀ kara-zu, aa kana-lɔr in aa gba de laa na.

⁴Ɗafa-tɛ k’ɛ́nɛ́ a̧ dúk nɛ́ wan nɛ̀ duk nɛ̀ hu̧sa̧-a̧ kɔ̧ see'nɛ́; nɛ́ ɗafa-tɛ nɛ̀ beka mbɔr na, wan mɛ́ ga̧a̧-see in mɔka-see nɛ̀ duk nɛ́ gasamɔ yí Sɔ̧.

⁵O okoo nɛ̀ yuu so Sɔ̧ nɛti ɓeemɛ, e nɛ̀ ta nɛ̀ a̧, ɗafa so tɛ̀ hee mɔ‘i ga, mbo nɛ̀ zu ha̧ o wíì kɔ‘i.

⁶Héé Sara mboo só zu ha̧ Abraham ɓɛɛ sa a̧‘e, gasa wan kɔ̧-a̧ ga, ɛ́nɛ́ kifa dúk nɛ́ o boko-bem kɔ̧-a̧ kinii wen zu dee demɔ, in k’ɛ̀nɛ̀ nɛ́ ee ha̧ kíí ŋma mɔ mɛ́ de'nɛ́ na.

⁷Kale-a mbɛt, wiwii, ɛ̀nɛ̀ dúk nɛ̀ de-a in o kóò k’ɛ́nɛ́ wen ɛ́nɛ́ iŋa'e okoo nɛ́ bú-kpánà; ɛ̀nɛ̀ tú̧ tɛ-wa, wen wa tɛ́ kpa duka-kpasa nɛ̀ mɔɔ-oi in'nɛ̀ɛ́ mbɛt; ɛ̀nɛ̀ dé hegɔ wen ká ŋma mɔ tɛ́ɛ̀ dor'nɛ́ tɛ̀ kɔfa-sɔ̧ k’ɛ́nɛ́.

⁸Ɛ́nɛ́ lɛŋ ɛ̀nɛ̀ yá nɛ̀ see kpɔk dúk nɛnɛ nɛ̀ de taamɔ in o ŋmaa, kɔ̧ nɛ̀ ŋmaa hee o nya-wi ga, de nɛ̀ ko ha̧ o ŋmaa nɛ̀ mɔka-see.

⁹K’ɛ́nɛ́ kifi er ɗaŋmɔ oi nú ɗaŋmɔ na, kóó dara oi nú dara na mbɛt; ɓɛɛ ɛ̀nɛ̀ tók nɛ́ de yoŋgo, wen mɔ nɛ̀ Sɔ̧ saa'nɛ́ wen-aa nɛ́ mɔ‘i, h’ɛ́nɛ́ mɛ́ kpa toka-de-yoŋgo nɛ̀ mɔɔ-oi.

¹⁰Wen Yɔramɔ tɔ̧a̧: «Wi nɛ̀ kɔ̧ɔ̧ mɛ kpa de duka-a, kpa nɛ̀ wese-tortɛ, à̧ dór leɓe tɛ tɔ̧ɔ̧ ɗaŋ wen in ndàrá-nú-a tɛ tɔ̧ɔ̧ wen-ɔr-mɔ.

¹¹A̧ a̧ zík tɛ-a e ɗaŋmɔ dúk mɛ́ de nɛ́ demɔ, a̧ a̧ kíí nɛ́ ga̧a̧mɔ, ndak nɛ̀ ɗoŋ-aa mbɛt.

¹²Wen yí Gasa Wan a̧a̧ zu o wi-de-mɔ nɛ̀ yuwar-a; a̧ yeŋ nɛ́ zer-aa tɛ kɔfa-sɔ̧ kɔ-wa; ɓɛɛ a̧ ba nɛ́ zu dúk nɛ̀ o wi-de-ɗaŋmɔ.»

¹³K’ɛ̀nɛ̀ kíí mɛ́ de nɛ́ demɔ, ɓɛɛ nɛ́ o'o tɛ de ɗaŋmɔ in'nɛ̀ɛ́ o?

¹⁴Kà o bíí usi bɔnɛ h’ɛ́nɛ́ wen n’ɛ̀nɛ̀ de mɔ nɛ̀ yuwar-a wó, n’ɛ̀nɛ̀ dúk nɛ̀ desee; k’ɛ́nɛ́ yú wa na, k’ɛ́nɛ́ de kíì na mbɛt.

¹⁵Ɓɛɛ ɛ̀nɛ̀ dúk nɛ̀ sa̧a̧-see, é nɛ̀ ta nɛ̀ Krist Gasa Wan k’ɛ́ɛ́. Ɛ̀nɛ̀ dúk dɔ̧ɔ̧ ɓɔnsɛnɛ, wen wee ɗoŋ gba̧a̧ mɔɔ-e-nɛ-ta k’ɛ́nɛ́ ha̧ o wi nɛ̀ tɛ́ ak'nɛ́.

¹⁶Ɛ̀nɛ̀ wé ɗoŋ-aa nɛ̀ ga̧a̧-see, nɛ̀ mboozu in de taamɔ mbɛt; hegɔ‘i, foe tɛ́ de o wi nɛ̀ ɓir wen e nú‘nɛ́ wen zu de naŋanɔ k’ɛ́nɛ́ tɛ́ Krist.

¹⁷Kà Sɔ̧ nɛ́ kɔ̧ɔ̧ ha̧ bíí mɛ́ zɔk bɔnɛ, ɓɛɛ gana so a'i zɔ́k bɔnɛ wen zu demɔ, bó nɛ́ wen zu ɗaŋmɔ na.

¹⁸Wen Krist nɛ̀ tɛ-wi fee war kpɔk wen zu ɗaŋmɔ, a̧ fee wen ɗaŋmɔ ko o bíí lɛŋ, a̧ nɛ́ wi-de-mɔ nɛ̀ yuwar-a; ɓɛɛ a̧ fea wen zu o wi nɛ̀ de mɔ nɛ̀ yuwar-a na, ha̧ a̧ mɛ́ mgbɔ‘nɛ́ hɔ ti Sɔ̧. Kiitɛ-a fee zaŋnu’ɛ, ɓɛɛ a̧ kpasi nɛ̀ ŋgai ko Sa̧a̧ Ɔmi.

¹⁹Mɛ̀ nɛ́ hegɔ, a̧ nɛ̀ɛ́ tɔ̧ De Mbe Wen ha̧ o sɔ̧-tɛ bíí nɛ̀ yaa so kɔ̧ zɔɓɔ.

²⁰O wi nɔ‘i nɛ́ o wi-de-ŋgazu nɛ̀ Sɔ̧ dee so ko ha̧ wa batɛ, ŋgimbi nɛ̀ Nɔe sɛka nɛ̀ kombon. O bíí nɛ̀ yee so kombon'i dɔk na, wa duka so nɛ́ mɔɔrɔ-ɗoŋ-taar, ɓɛ̀ɛ́ yì kpásí wa[2].

²¹Mɔ‘i usi nɛ́ zuia'nɛ́ n’ɛ̀nɛ̀ kpasa wen-aa kinii’ɛ, bó nɛ́ wen fɔra ndiŋ tɛ-wi yinɛ na, ɓɛɛ nɛ́ ha̧a̧ tɛ-wi ha̧ Sɔ̧ nɛ̀ kpasa taamɔ; nɛ́ a̧ a̧ kpasi'nɛ́ wen zu kpasa-a ko Jesu Krist,

²²nɛ̀ daŋa si yiwese duk nɛ̀ wii-er Sɔ̧, ɓɛɛ nɛ́ a̧ a̧ duk zu o betom mɛ yiwese, o wan, in o ŋgayamɔ.