Read Northwest Gbaya 2 PIERRE 1 Bible Online

2 PIERRE 1 - Northwest Gbaya bible

2 PIERRE 1

¹Nɛ́ mi Simɔŋ-Pierre, wi-de-tom nɛ̀ duk nɛ́ betom ko Jesu Krist a̧ tom kalata’ɛ ha̧ o wi nɛ̀ a̧a̧ nɛ̀ gbà de[1] kɔ̧ɔ̧ɗɔɔwen hee k’ɛ́ɛ́ ga, wen zu deemɔ nɛ̀ yuwar-a ko Sɔ̧ k’ɛ́ɛ́, nɛ̀ duk nɛ́ Wan-kpasi-wi, Jesu Krist.

²Ɛ̀nɛ̀ kpá deemɔ nɛ̀ ta-tɛ ko Sɔ̧ in ga̧a̧mɔ nɛ̀ dɔka-a nɛ̀ ɗoŋ iŋa Sɔ̧ in Jesu, Gasa Wan k’ɛ́ɛ́.

³Hegɔ, ŋgayamɔ ko Sɔ̧ ha̧a̧ mɔ lɛŋ nɛ̀ nyɛma mɛ́ gbak yɛ tɛ duka-a k’ɛ́ɛ́, in tɛ yuu Sɔ̧; tɛ́ mɔ‘i a̧ dee h’ɛ́ɛ́ mɛ́ iŋ wi nɛ̀ saa so yɛ tɛ mgbák gasamɔ in dee demɔ kɔ̧-a̧.

⁴Nɛ́ tɛ́ mɔɔ nɔ‘i a̧ dee h’ɛ́ɛ́ mɛ́ kpa o gba demɔ nɛ̀ Sɔ̧ ha̧a̧ so nú wen-aa h’ɛ́ɛ́ nɛti; k’ɛ̀nɛ̀ nɛ́ kpaa mɔ n'aa ha̧a̧ nú sɛnɛ, ɛ́nɛ́ tɛ́ gbo tɛ̀ o wɔ mɔɔ-ɗaŋ-mɔ nɛ̀ ɔ wan zaŋnu, h’ɛ́nɛ́ mɛ́ ye tɛ́ mɔ, wan mɛ́ tɛ́ duka-a ko Sɔ̧.

⁵Wen hegɔ, ɛ̀nɛ̀ há̧ ŋgai tɛ‘nɛ́ lɛŋ wen ha̧ deemɔ nɛ̀ de-a mɛ́ ndaɗi in kɔ̧ɔ̧ɗɔɔwen k’ɛ́nɛ́, wen ha̧ iŋamɔ mɛ́ ndaɗi in deemɔ nɛ̀ de-a,

⁶ha̧ kasa-zu mɛ́ ndaɗi in iŋamɔ, ha̧ nɔɔ-ŋgiɗi mɛ́ ndaɗi in kasa-zu, ha̧ yuu Sɔ̧ mɛ́ ndaɗi in nɔɔ-ŋgiɗi,

⁷ha̧ kɔ̧ɔ̧ o nya-wi mɛ́ ndaɗi in yuu Sɔ̧, in ha̧ kɔ̧ɔ̧mɔ mɛ́ ndaɗi in kɔ̧ɔ̧ o nya-wi.

⁸Kà o mɔɔ nɔ‘i dúk tɛ‘nɛ́ nɛ̀ dɔka-a, bek’ɛnɛ dúk de ŋma mɔ na, na, ɓɛɛ wa tɛ́ de h’ɛ́nɛ́ mɛ́ iŋ Gasa Wan k’ɛ́ɛ́ Jesu Krist siti,

⁹ɓɛɛ bíí nɛ̀ bó nɛ̀ o mɔɔ nɔ‘i na nɛ́ wi-boma-yí nɛ̀ tam nɛ́ mɔ nɛ̀ nú-tum; tɛ-a bìí ɗoŋ-aa'e wa ɗafa so war-tɛ-a wen ɗaŋmɔ n'aa dee so nɛti.

¹⁰Wen hegɔ, o nya'm, ɛ̀nɛ̀ há̧ ŋgai tɛ‘nɛ́ gan kuti-a wen h’ɛ́nɛ́ mɛ́ yor ndaɗi tɛ́ sara in hoka'nɛ́ ko Sɔ̧. K’ɛ̀nɛ̀ dé mɔ hee mɔ‘i ga, ɛ́nɛ́ beka tik na ɓɔnsɛnɛ.

¹¹Hegɔ, Sɔ̧ tɛ́ kpɛk'nɛ́ nɛ̀ de-a mɛ́ ye tɛ́ Wan nɛ̀ duk kpoo nɛ kpoo; Wan'i nɛ́ ko Gasa Wan in Wan-kpasi-wi k’ɛ́ɛ́ Jesu Krist.

¹²Hegɔ ɛ́nɛ́ iŋa mbɛt, kóó ɛ̀nɛ̀ dúk nɛ̀ nɔa-a tɛ́ kpasawen nɛ̀ a̧a̧ sɛnɛ kinii’ɛ mbɛt, mi kɔ̧ɔ̧ kana mɛ́ mbaŋ tɛ‘nɛ́ ɓɔnsɛnɛ zu mɔɔ nɔ'ɔ.

¹³Mi taa nyɛma kànà ha̧‘m mɛ́ tɔ̧ mbɔrɔ h’ɛ́nɛ́ ŋgimbi n'am biti duka-a zaŋnu’ɛ, h’ɛ́nɛ́ mɛ́ duk nɛ̀ yí,

¹⁴wen mi iŋa'e ŋgimbi kɛ̧ɛ̧ tɛ̀ yɛ nɛ̀ ŋmaa hɛɗa kaɗi, hee mɔ'ɔ nɛ̀ Gasa Wan k’ɛ́ɛ́ Jesu Krist usa ha̧‘m ga.

¹⁵Ɓɛɛ mi tɛ́ kii kànà nɛ̀ de-a wen h’ɛ́nɛ́ mɛ́ kpa yuwar ɗoŋ yaka-a kɔ‘m, ha̧ tɛ‘nɛ́ mɛ́ mbaŋ ɗoŋ usamɔ nɔ‘i tɛ́ mɔ lɛŋ.

¹⁶Wen bó nɛ́ ɛ́ɛ́ tɔ̧ɔ̧ wen ŋgayamɔ in tɛa-a ko Gasa Wan k’ɛ́ɛ́ Jesu Krist h’ɛ́nɛ́ hee to nɛ̀‘i gɔn nɛ́ tɛ-wi tɔ̧ nɛnɛ'ɛ ga na; ɓɛɛ mɛ̀ nɛ́ wen n’ɛ̀ɛ̀ zɔka mgbák gasamɔ kɔ̧-a̧ nɛ̀ gbaayí yɛ.

¹⁷A̧ kpaa zɔnamɔ in gasamɔ er Sɔ̧ Dáà, ŋgimbi nɛ̀ ŋma tiger gboo nɛ̀ tɛ́ zɔm gasamɔ ko Sɔ̧ tɔ̧ nɛnɛ ha̧ a̧‘e: «Wi’ɛ nɛ́ Bem kɔ‘m n'am kɔ̧ɔ̧ nyɛmna, desee kɔ‘m lɛŋ dúk zu a̧.»

¹⁸Ɛ́ɛ́ nɛ̀ tɛ̀ yɛ zia tiger'i nɛ̀ yiwese, ŋgimbi n’ɛ̀ɛ̀ duka nɛnɛ in a̧ zu sa̧a̧ kaya mɛ̀.

¹⁹Zu-a'i, ɛ́ɛ́ a̧a̧ nɛ̀ wen ko o wi-tɔ̧-wen oi nú Sɔ̧ nɛ̀ duk nɛ́ kpasamɔ. Nɛ́ mɔ h’ɛ́nɛ́ mɛ́ zɔk mɔ sɛnɛ nɛ̀ de-a, wen wen'i duk hee lamba nɛ̀ nyɛk ti-tum ga, hɔ ŋgimbi nɛ̀ mɔ tɛ́ gɔn, ɓɛɛ sɔra-tuyɛ nyɛka kɔ̧ see'nɛ́.

²⁰Hegɔ, ɛ̀nɛ̀ íŋ mɔ'ɔ nɛ̀ de-a: ŋma bíí nyɛm mɛ we ɗoŋ wen ko o wi-tɔ̧-wen oi nú Sɔ̧ nɛ̀ a̧a̧ zaŋ Yɔramɔ nɛ̀ ta-tɛ-wi na.

²¹Bó nɛ́ taamɔ ko bíí a̧ dee ha'i mɛ́ tɔ̧ wen oi nú Sɔ̧ na ndó-ndó-ndó, ɓɛɛ nɛ́ Sa̧a̧ Ɔmi a̧ baa bíí tɔ̧ nɛ̀ wen oi nú Sɔ̧.