Read Northwest Gbaya 2 PIERRE 2 Bible Online

2 PIERRE 2 - Northwest Gbaya bible

2 PIERRE 2

¹Nɛti o ŋma wi-tɔ̧-wen oi nú sɔ̧ ndela a̧a̧ so mgbara dukbíí; kale-a mbɛt, o wi-usi-mɔ-ndela tɛ́ duk mgbara'nɛ́, de nɛ̀ gɔn-ta usi nɛ̀ ɗaŋ usamɔ, kafi nɛ̀ wan nɛ̀ gɔna zu-wa, dak nɛ̀ yɔa-a pi̧ zu wa nɛ̀ haya-a;

²ɓɛɛ o dɔka bíí tɛ́ ndak ɗoŋ wa tɛ̀ ɗaŋ duka-a kɔ-wa, tɔ̧ nɛ̀ ɗaŋ wen zu yuwar kpasawen, wen zu wa.

³Ɓɛɛ zaŋ dee wɔ-mbɔi kɔ-wa, wa tɛ́ ɔr'nɛ́ nɛ̀ nyɔ̧ɔ̧ wen nyɔŋ nɛ̀ mɔ k’ɛ́nɛ́. War kɔ-wa, kita pɛm nɛ́ wa ɓeemɛ, ɓɛɛ yɔa-a duk kɔ‘i nɛ̀ gbaayí wen wa.

⁴Wen bó nɛ́ Sɔ̧ ee so o betom mɛ́ yiwese nɛ̀ dee so ɗaŋmɔ duk géè na, ɓɛɛ a̧ hɛra wa, kai a kɔ̧ ɗuka-fara pɛm nɛ̀ wese gɔna-kita.

⁵Bó nɛ́ Sɔ̧ ee gɔna-kita zu nù mɛ́ wan mɛ́ ti dúk na; a̧ dee ha̧ gasa ha̧a̧-yì mɛ́ hur zu nù nɛ̀ o ɗaŋwi yaa so sɛnɛ‘i; o bíí n'aa kpasa nɛ́ mɔɔrɔ-ɗoŋ-yiitoo, ɗoŋ-taar-a nɛ́ Nɔe nɛ̀ tɔ̧ so kɔ‘i nɛ́ wen deemɔ nɛ̀ yuwar-a.

⁶Nɛ́ mɔ'ɔ nɛ̀ Sɔ̧ ɗaŋa o ye Sɔdɔm in Gɔmɔr yinɛ kpoo nɛ kpoo kifi géé bùk hee mɔɔ-usi-mɔ ga ha̧ o ɗaŋwi mɛ́ ɗoŋ.

⁷Ɓɛɛ a̧ kpasi Lot wi-de-mɔ nɛ̀ yuwar-a nɛ̀ see ɗaŋa batɛ zu ɗaŋ duka-a ko o ɗaŋwi nɔ‘i,

⁸wen wi-de-mɔ nɛ̀ yuwar-a'i duka so mgbara wa, zɔk nɛ̀ wa, zii nɛ̀ tɔ̧́ɔ̧́-wen kɔ-wa mbɛt. Wese lɛŋ see wi-de-mɔ nɛ̀ yuwar-a'i ɗaŋa batɛ zu ɗaŋ dee mɔɔ-búù ko o wi nɔ‘i.

⁹Hegɔ, Gasa Wan nyɛma mɛ́ ɓar o wi-yu-a yinɛ tɛ weamɔ, ɓɛɛ a̧ kaia o wi nɛ de mɔ nɛ̀ yuwar-a na á, pɛm nɛ̀ wese-gɔna-kita wen usa bɔnɛ ha̧ wa;

¹⁰gan gan, o wi nɛ̀ ndak ɗoŋ o ndiŋ wɔ-mɔ ko mur-tɛ, e nɛ̀ wan ko Gasa Wan tɛ̀ geemɔ. Tɛ-wa de nyír na, wa nɛ́ o wi-ŋmaŋ-tɛ, ɓɛɛ kíì de wa tɛ fɛ̧ŋa o gasamɔ mɛ́ yiwese na.

¹¹O betom mɛ yiwese nɛ̀ gana o ɗaŋ wi-usi-mɔ nɔ‘i nɛ̀ ŋgai in ŋgayamɔ, tɔ̧ wen ti Gasa Wan fɛŋ nɛ̀ o gasamɔ nɔ‘i na.

¹²O wi nɔ‘i iŋ mɔ na hee saɗi ga; wen mɔ ko saɗi nɛ́ baa pɛ́r, ɓɛɛ fee mbɔr. O wi nɔ‘i da̧ nɛ́ mɔ nɛ̀ wa iŋ mgbara-a na; wa tɛ́ mbɔr hee mɔ'ɔ nɛ̀ saɗi mbɔr nɛnɛ'ɛ ga;

¹³hegɔ wa tɛ́ kpa mɔɔ-oi deemɔ nɛ̀ yuwar-a na. Wa kpa nɛ́ desee tɛ dee mɔɔ-búù nɛ̀ bu-wese; wa nɛ́ o ɗaŋ yɔsɛ in ndiŋmɔ nɛ̀ kpa nɛ́ desee tɛ dee ndela tɛ́ zɔm nyɔŋa mɔ kɔ-wa in'nɛ̀ɛ́.

¹⁴Zɔkamɔ kɔ-wa nɛ́ zɔkamɔ-dàlà, wa sur tɛ dee ɗaŋmɔ na; wa tui nɛ́ pɛ́r ha̧ o bíí nɛ̀ bó nɛ̀ ŋgai na, see-wa duna nɛ̀ wɔ-kia-mbɔi: wa nɛ́ o be-fom.

¹⁵Wa bɛ̧ɛ̧ tana war, ɓɛɛ wa yɔ mɔ, ba nɛ̀ yuwar ko Balam bem ko Bɔsɔr, nɛ̀ kpɛka so ha̧ mbɔi nɛ̀ duk nɛ̀ yuwar-a na mɛ́ ɔr a̧,

¹⁶ɓɛɛ a̧ kpa mɔɔ-oi gbina heembea kɔ̧-a̧, wen tuifuu nɛ̀ nyɛm so mɛ́ tɔ̧ wen na, baa tiger-bíí tɔ̧́ nɛ̀ wen ha̧ a̧, ɓɛɛ gɔn nú wi-tɔ̧-wen oi nú Sɔ̧‘i tɛ dee mgbelemɔ kɔ‘i.

¹⁷O wi nɔ‘i nɛ́ zu-zer nɛ̀ yì bó sɛnɛ na; wa duk hee tura-zan nɛ̀ búk ba yaknɛ ga. Mɔ nɛ̀ pɛm wa nɛ́ ti-tum kpɔ̧ɔ̧-kpɔ̧ɔ̧.

¹⁸Zɔm kpoko-wen a̧a̧ kɔ̧ nú-wa, ɓɛɛ wa tui nɛ́ pɛ́r nɛ̀ o ndiŋ wɔ-mɔ ko mur-tɛ ha̧ wi nɛ̀ gboo mgbara o wi-yɔ-kaya nɛ̀ mbe-a.

¹⁹O wi-ɔr-wi nɔ‘i ha̧a̧ nú ha̧ wa'e, wa tɛ́ kpa zu, ɓɛɛ wa nɛ̀ tɛ-wa duk nɛ́ o bara ko mbɔramɔ; wen kà ŋma mɔ kpá ŋgai zu mɛ́, mɛ́ nɛ́ bara ko mɔ‘i.

²⁰Kà o wi nɛ̀‘i daka yinɛ tɛ̀ o ndiŋ mɔɔ-zaŋnu tɛ̀ iŋa Gasa Wan in Wan-kpasi-wi k’ɛ́ɛ́ Jesu Krist, kà wa nɛ́ ee ha̧ o ndiŋmɔ nɔ‘i mɛ́ kaɓali wa kpa nɛ̀ ŋgai zu wa woyo, sɔŋkur duka-a kɔ-wa tɛ́ ɗaŋ gan kuti-a.

²¹Wen gana so ká o wi nɔ‘i íŋ so yuwar deemɔ nɛ̀ yuwar-a na; ɓɛɛ nɛ̀ mɔ'ɔ nɛ̀ wa iŋa kaɗi, ɓɛɛ wa zik ɗoŋ e ha̧ sa̧a̧ heembea nɛ̀‘i ha̧a̧ so ha̧ wa.

²²Mɔ hɔɔ zu wa nyɛm nɛ̀ tua-wen’ɛ: «Toyo sii ɗoŋ tɛ̀ ɔ̧i̧ kɔ‘i,» kóó: «Ŋgɔya zui yì kaɗi, ɓɛɛ sii ɗoŋ kiŋgili tɛ̀ nɛ̀ ɓɔtɛ woyo.»