Read Northwest Gbaya 1 JEAN 1 Bible Online

1 JEAN 1 - Northwest Gbaya bible

1 JEAN 1

¹Mɔ n’ɛ̀ɛ̀ yɔr mɔ h’ɛ́nɛ́ wen-aa’ɛ nɛ́ mɔ nɛ̀ duka so nɛ̀ ku̧u̧naŋ-a mɛ̀ tɛnɛ, nɛ́ mɔ n’ɛ̀ɛ́ zia, n’ɛ̀ɛ́ zɔka nɛ̀ yí-ɛ́ɛ́, n’ɛ̀ɛ́ mbaɗa, ɓɛɛ ɛɛ tam nɛ̀ er yɛ́ mbɛt; wen'i nɛ́ Wen-duka-kpasa.

²Duka-kpasa usa tɛ̀, ɛ́ɛ́ zɔka a̧, ɓɛɛ ɛ́ɛ́ dé sedaako, tɔ̧́ nɛ̀ wen-aa h’ɛ́nɛ́. Duka-kpasa'i nɛ́ wan nɛ̀ dúk ɓɔnsɛnɛ, nɛ̀ duka so katɛ Dáà, ɓɛɛ usi tɛ̀ h’ɛ́ɛ́.

³Mɔ n’ɛ̀ɛ́ zɔka in n’ɛ̀ɛ́ zia, nɛ́ mɔ‘i ɛ̀ɛ̀ tɔ̧́ wen-aa h’ɛ́nɛ́ wen h’ɛ́nɛ́ mɛ́ duk kpɔk in yɛɛ mbɛt; ɓɛɛ duka-a k’ɛ́ɛ́ kpɔk'i, nɛ́ duka-a kpɔk in Dáà in Bem kɔ̧-a̧ Jesu Krist.

⁴Ɛ́ɛ́ yɔ́r mɔ‘i lɛŋ h’ɛ́nɛ́ wen há̧ desee k’ɛ́ɛ́ mɛ́ dùk nɛ́ kpasa desee.

⁵Gba̧a̧ wen n’ɛ̀ɛ́ zia nú Bem kɔ̧-a̧ nɛ́ mɔ'ɔ n’ɛ̀ɛ̀ tɔ̧́ h’ɛ́nɛ́'ɛ: Sɔ̧ nɛ́ sa̧a̧mɔ; tum kóó tikiɗi bó tɛ́ a̧ na.

⁶K’ɛ̀ɛ̀ tɔ̧́‘e ɛ́ɛ́ dúk kpɔk in Sɔ̧ wó, ɓɛɛ k’ɛ̀ɛ̀ nɛ́ nɛ̀ɛ́ nɔ̀ ti tum, ɓɛɛ ɛ́ɛ́ dé nɛ́ ndela, ɛ́ɛ́ dé mɔ tɛ́ kpasawen na[1].

⁷Ɓɛɛ k’ɛ̀ɛ̀ nɛ́ nɛ̀ɛ́ nɔ̀ tɛ́ sa̧a̧mɔ hee mɔ'ɔ nɛ̀ a̧ nɛ̀ tɛ-a a̧a̧ tɛ̀ sa̧a̧mɔ ga, ɛ́ɛ́ dúk kpɔk in o ŋmaa nɛ̀ mbetɛ, ɓɛɛ tɔk tɛ̀ Bem kɔ̧-a̧ Jesu fɔ́r nɛ́ ɗaŋmɔ lɛŋ yinɛ tɛ-ɛɛ, ha̧ mɛ́ sa̧.

⁸K’ɛ̀ɛ̀ tɔ̧‘e, ɗaŋmɔ bó tɛ-ɛɛ na, ɛ́ɛ́ ɔr nɛ́ tɛ-ɛɛ, ɓɛɛ kpasawen bó tɛ-ɛɛ na.

⁹Ɓɛɛ k’ɛ̀ɛ̀ nɛ́ gbara ɗaŋmɔ k’ɛ́ɛ́, Sɔ̧ tɛ́ e h’ɛ́ɛ́, ɓɛɛ a̧ tɛ́ de ha̧ tɛ-ɛɛ mɛ́ sa̧ tɛ̀ ndiŋmɔ lɛŋ, wen a̧ nɛ́ wi-yor-ɗoŋ wen kɔ̧-a̧, in a̧ de mɔ nɛ yuwar-a mbɛt.

¹⁰K’ɛ̀ɛ̀ tɔ̧‘e, ɛ́ɛ́ de ɗaŋmɔ na, ɛ́ɛ́ ee Sɔ̧ nɛ̀ wi ndela, ɓɛɛ wen kɔ̧-a̧ bó tɛ-ɛɛ na.