Read Northwest Gbaya 1 JEAN 4 Bible Online

1 JEAN 4 - Northwest Gbaya bible

1 JEAN 4

¹O wi n'am kɔ̧ɔ̧ nyɛmna, k’ɛ́nɛ́ kɔ̧ ɗɔɔ o taamɔ lɛŋ nɛ̀ nú-tum na, ɓɛɛ ɛ̀nɛ̀ wé o taamɔ nɔ‘i h’ɛ́nɛ́ mɛ́ iŋ wan nɛ̀ tɛ̀ɛ́ nɛ̀ tɛ́ Sɔ̧, wen o wi-tɔ̧-wen oi nú Sɔ̧ ndela dama zaŋnu kaɗi.

²Ɓɛɛ mɔ nɛ̀ tɛ́ de h’ɛ́nɛ́ mɛ́ iŋ Sa̧a̧ Ɔmi ko Sɔ̧ nɛ́ mɔ'ɔ: wi nɛ̀ tɔ̧‘e Jesu Krist tɛ̀ɛ́ hee bíí ga, ɓɛɛ taamɔ‘i tɛ̀ɛ́ nɛ̀ tɛ́ Sɔ̧,

³ɓɛɛ wi nɛ̀ tɔ̧ hegɔ na, Sa̧a̧ Ɔmi ko Sɔ̧ bó tɛ̀ wi’ɛi na; taamɔ‘i nɛ́ ko wi-we-zu nɛ̀ Krist. Ɛ́nɛ́ baa zii'e a̧ tɛ́ tɛ̀; kinii a̧ hɔɔ zaŋnu kaɗi.

⁴O bem kɔ‘m, ɛ́nɛ́ nɛ́ ko Sɔ̧; ɛ́nɛ́ gana o wi-tɔ̧-wen oi nú Sɔ̧ ndela nɔ‘i, wen wi nɛ̀ dúk in'nɛ̀ɛ́ gana wi nɛ̀ dúk zaŋnu.

⁵Kɔ-wa, wa nɛ́ o bíí zaŋnu; wen kɔ-wa nɛ́ ko o bíí zaŋnu, ɓɛɛ sa o bíí zaŋnu zii wen kɔ-wa.

⁶K’ɛ́ɛ́, ɛ́ɛ́ nɛ́ ko Sɔ̧, ɓɛɛ wi nɛ̀ iŋa Sɔ̧ tɛ́ zii wen nú yɛ; wi nɛ̀ bó nɛ́ ko Sɔ̧ na, zii wen nú yɛ na. Nɛ́ tɛ́ mɔ‘i ɛ̀ɛ̀ tɛ́ kɛ̧ nɛ̀ mgbara Sa̧a̧ Ɔmi ko kpasawen in taamɔ-ɔr-bíí.

⁷O wi n'am kɔ̧ɔ̧ nyɛmna, ɛ̀ɛ̀ kɔ̧́ ŋmaa in o ŋmaa wen kɔ̧ɔ̧mɔ tɛ́ nɛ̀ tɛ́ Sɔ̧, ɓɛɛ kóó o ndé nɛ̀ kɔ̧ ŋmà-wi, nɛ́ Sɔ̧ a̧ koo a̧, ɓɛɛ a̧ iŋa Sɔ̧.

⁸Wi nɛ̀ kɔ̧ ŋmà-wi na, iŋ Sɔ̧ na, wen Sɔ̧ nɛ́ kɔ̧ɔ̧mɔ.

⁹Mɛ̀ nɛ́ tɛ́ mɔ'ɔ a̧ Sɔ̧ usa nɛ̀ kɔ̧ɔ̧mɔ kɔ‘i mgbara ɛ́ɛ́: a̧ toma kpɔk Bem kɔ̧-a̧ tɛnɛ zaŋnu h’ɛ́ɛ́ mɛ́ duk kpasa nɛ̀ ɗoŋ-aa.

¹⁰Mɔ nɛ̀‘i tɔ̧‘e kɔ̧ɔ̧mɔ nɛ̀ mɔ'ɔ: bó nɛ́ ɛ́ɛ́ a̧ kɔ̧ɔ̧ Sɔ̧ na, nɛ́ à̧ á̧ kɔ̧ɔ̧ yɛ, ɓɛɛ a̧ tom Bem kɔ̧-a̧ mɛ́ duk nɛ́ mɔɔ-ɗafi-sɔ̧ gɔn nɛ̀ zu ɗaŋmɔ k’ɛ́ɛ́.

¹¹O wi n'am kɔ̧ɔ̧ nyɛmna, hee mɔ'ɔ nɛ̀ Sɔ̧ kɔ̧ɔ̧ ɛ́ɛ́ hegɔ ga, ɛ́ɛ́ mbɛt, ɛ̀ɛ̀ kɔ̧́ ŋmaa in o ŋmaa.

¹²Ŋma bíí nɛ̀ zɔka Sɔ̧ bó na. K’ɛ̀ɛ̀ nɛ́ kɔ̧ɔ̧ ŋmaa in o ŋmaa, ɓɛɛ Sɔ̧ dúk tɛ̀ yɛ; kɔ̧ɔ̧mɔ kɔ̧-a̧ hɔɔ gba̧a̧ tɛ̀ yɛ.

¹³Ɛ́ɛ́ iŋa'e ɛ́ɛ́ dúk tɛ́ Sɔ̧, ɓɛɛ a̧ dúk tɛ̀ yɛ mbɛt wen n'aa ha̧a̧ Sa̧a̧ Ɔmi kɔ̧-a̧ h’ɛ́ɛ́.

¹⁴K’ɛ́ɛ́, ɛ́ɛ́ zɔka, ɓɛɛ nɛ́ mɔ‘i s’ɛ́ɛ́ de sedaako'e ndé, Dáà toma Bem kɔ‘i tɛnɛ mɛ́ duk wi-kpasi o bíí zaŋnu.

¹⁵Wi nɛ̀ tɔ̧‘e Jesu nɛ́ Bem ko Sɔ̧, Sɔ̧ duk tɛ́ a̧, ɓɛɛ wi’ɛi dúk tɛ́ Sɔ̧ mbɛt.

¹⁶K’ɛ́ɛ́, ɛ́ɛ́ iŋa kɔ̧ɔ̧mɔ nɛ̀ Sɔ̧ kɔ̧ɔ̧ nɛ̀ ɛ́ɛ́, ɓɛɛ ɛ́ɛ́ kɔ̧ ɗɔɔ kɔ̧ɔ̧mɔ‘i. Sɔ̧ nɛ́ kɔ̧ɔ̧mɔ. Wi nɛ̀ dúk tɛ̀ kɔ̧ɔ̧mɔ, dúk tɛ́ Sɔ̧, ɓɛɛ Sɔ̧ dúk tɛ́ a̧ mbɛt.

¹⁷Kɔ̧ɔ̧mɔ hɔɔ gba̧a̧ tɛ̀ yɛ tɛ́ mɔ'ɔ: ɛ́ɛ́ tɛ́ duk nɛ̀ nɔɔ-ŋgiɗi wese kita, wen hee mɔ'ɔ nɛ̀ Jesu duk ga, ɛ́ɛ́ dúk hegɔ mbɛt sɛn zaŋnu’ɛ.

¹⁸Kíì bó tɛ̀ kɔ̧ɔ̧mɔ na; kpasa kɔ̧ɔ̧mɔ bá nɛ́ kíì tɛ-wi yinɛ, wen kíì ndaɗa in bɔnɛ-oi-ɗaŋmɔ, ɓɛɛ wi nɛ̀ de kíì bó nɛ̀ kpasa kɔ̧ɔ̧mɔ na.

¹⁹K’ɛ́ɛ́, ɛ́ɛ́ a̧a̧ nɛ̀ kɔ̧ɔ̧mɔ wen Sɔ̧ kɔ̧ɔ̧ yɛ nɛti.

²⁰Kà ŋma bíí tɔ̧́‘e nde, wi kɔ̧ɔ̧ Sɔ̧, ɓɛɛ kà a̧ sɛn nya-a̧, wi’ɛi nɛ́ wi-ndela; wen wi nɛ̀ sɛn nya-a̧ n'aa zɔk, tɛ́ kɔ̧ Sɔ̧ n'aa zɔk na’ɛ hee ge?

²¹Heembea n'aa ha̧a̧ h’ɛ́ɛ́ nɛ́ mɔ'ɔ: wi nɛ̀ kɔ̧ɔ̧ Sɔ̧, a̧ kɔ̧́ nya-wi mbɛt.