Read Northwest Gbaya 1 JEAN 5 Bible Online

1 JEAN 5 - Northwest Gbaya bible

1 JEAN 5

¹Kóó o ndé nɛ̀ kɔ̧ɔ̧ ɗɔaa'e Jesu nɛ́ Krist, Sɔ̧ koo wi’ɛi; ɓɛɛ kóó o ndé nɛ̀ kɔ̧́ Sɔ̧ nɛ̀ kó bíí'ɛ tɛ́ kɔ̧ kànà wi nɛ̀ Sɔ̧ kó'ɛ mbɛt.[5]

²K’ɛ̀ɛ̀ nɛ́ kɔ̧ɔ̧ Sɔ̧, ɓɛɛ k’ɛ̀ɛ̀ nɛ́ dee mɔ nyɛm nɛ̀ ɗoŋ heembea kɔ̧-a̧, ɛ́ɛ́ tɛ́ iŋ‘e, ɛ́ɛ́ kɔ̧ɔ̧ o bem ko Sɔ̧,

³wen kɔ̧́ɔ̧́ Sɔ̧, nɛ́ kasa o heembea kɔ̧-a̧. Ɓɛɛ o heembea ko Sɔ̧ bó nɛ́ zɔm tui na,

⁴wen o bíí nɛ̀ Sɔ̧ koo lɛŋ gana mɔɔ-zaŋnu, ɓɛɛ mɔ nɛ̀ gana mɔɔ-zaŋnu nɛ́ kɔ̧ɔ̧ɗɔɔwen k’ɛ́ɛ́.

⁵Wi nɛ̀ gana mɔɔ-zaŋnu nɛ́ o? Kànà nɛ́ wi nɛ̀ kɔ̧ ɗɔaa'e Jesu nɛ́ Bem ko Sɔ̧.

⁶Jesu Krist nɛ́ wi nɛ̀ tɛ̀ɛ́ nɛ̀ yì in tɔk; bó nɛ́ yì ɓɛɛ na, ɓɛɛ nɛ́ yì in tɔk mbɛt. Nɛ́ Sa̧a̧ Ɔmi a̧ de sedaako mɔ‘i wen Sa̧a̧ Ɔmi nɛ́ kpasawen.

⁷O wi-de-sedaako a̧a̧ sɛnɛ taar:

⁸Sa̧a̧ Ɔmi, yì, in tɔk; ɓɛɛ wa taar lɛŋ de nɛ kpɔk sedaako.

⁹K’ɛ̀ɛ̀ nɛ́ kpɛka sedaako ko bíí, ɓɛɛ bó nɛ́ sedaako ko Sɔ̧ gana ko bíí na nde? Wen sedaako nɛ̀ Sɔ̧ dee nɛ́ mɔ'ɔ: a̧ dee sedaako wen zu Bem kɔ̧-a̧.

¹⁰Wi nɛ̀ kɔ̧ ɗɔaa ha̧ Bem ko Sɔ̧ a̧a̧ nɛ̀ mɔɔ-sedaako'i sɛn tɛ̀. Wi nɛ̀ kpɛk wen ko Sɔ̧ na e nɛ́ Sɔ̧ nɛ̀ wi-ndela, wen n'aa kɔ̧ ɗɔɔ sedaako nɛ̀ Sɔ̧ dee wen Bem kɔ‘i na.

¹¹Ɓɛɛ sedaako'i nɛ́ mɔ'ɔ: Sɔ̧ ha̧a̧ duka-kpasa kpoo nɛ kpoo h’ɛ́ɛ́, ɓɛɛ duka-kpasa'i dúk tɛ̀ Bem kɔ̧-a̧.

¹²Wi nɛ̀ a̧a̧ nɛ̀ Bem kpaa duka-kpasa kaɗi; ɓɛɛ wi nɛ̀ Bem ko Sɔ̧ dúk tɛ́ a̧ na kpa duka-kpasa na.

¹³Ɛ́nɛ́ n’ɛ̀nɛ̀ kɔ̧ɔ̧ ɗɔaa nɛ̀ nin Bem ko Sɔ̧, mi yɔr mɔ'ɔ lɛŋ h’ɛ́nɛ́, wen h’ɛ́nɛ́ mɛ́ iŋ‘e ɛ́nɛ́ kpaa duka-kpasa kpoo nɛ kpoo kaɗi!

¹⁴Mɔ n’ɛ̀ɛ̀ kpa nɔɔ-ŋgiɗi sɛnɛ ti a̧ nɛ́ mɔ'ɔ: k’ɛ̀ɛ̀ ák mɔ er-a nyɛm nɛ̀ ɗoŋ mɔ n'aa kɔ̧a̧, a̧ tɛ zii;

¹⁵ɓɛɛ k’ɛ̀ɛ̀ nɛ́ iŋa'e a̧ zii akamɔ k’ɛ́ɛ́ zii, ɛ́ɛ́ iŋa'e ɛ́ɛ́ kpaa mɔ n’ɛ̀ɛ́ aka'i kaɗi.

¹⁶Kà ŋma bíí nɛ́ zɔka nya-wi tɛ̀ dee ɗaŋmɔ nɛ̀ bó nɛ́ ɗaŋmɔ-dak-wi pi̧ tɛ́ fio na, wi’ɛi a̧ kɔfi Sɔ̧, ɓɛɛ Sɔ̧ tɛ́ kpasi nya-a̧‘i. Bó nɛ́ mi tɔ̧ nɛ́ o wi nɛ̀ de ɗaŋmɔ wan nɛ̀ tɛ́ dak fio pi̧ zu wa na, wen pɛrti ɗaŋmɔ hegɔ a̧a̧ sɛnɛ, ɓɛɛ bó nɛ́ i̧i̧ a̧‘m tɔ̧‘e, ɛ̀nɛ̀ kɔ́fí Sɔ̧ zu-a na.

¹⁷Gbina heembea lɛŋ nɛ́ ɗaŋmɔ, ɓɛɛ bó nɛ́ ɗaŋmɔ lɛŋ a̧ dak wi pi̧ tɛ́ fio na.

¹⁸Ɛ́ɛ́ iŋa'e kóó o ndé nɛ̀ Sɔ̧ koa de ɗaŋmɔ ɓɔna, wen nɛ́ Bem ko Sɔ̧ a̧ zɔk wa, ɓɛɛ Wan-ɗaŋ kpa ŋgai zu wa na.

¹⁹Ɛ́ɛ́ iŋa'e ɛ́ɛ́ nɛ́ ko Sɔ̧, ɓɛɛ o mɔɔ-zaŋnu lɛŋ dúk ɗɔɔ ŋgai ko Wan-ɗaŋ.

²⁰Ɛ́ɛ́ iŋa'e Bem ko Sɔ̧ tɛa, ɓɛɛ ha̧ iŋamɔ h’ɛ́ɛ́, wen h’ɛ́ɛ́ mɛ́ iŋ Kpasa Wi. Ɛ́ɛ́ dúk tɛ́ Kpasa Wi sɛn tɛ̀ Bem kɔ̧-a̧ Jesu Krist. Jesu nɛ́ Kpasa Wi, a̧ nɛ́ Sɔ̧, a̧ nɛ́ duka-kpasa kpoo nɛ kpoo.

²¹O bem kɔ‘m, ɛ̀nɛ̀ zɔ́k tɛ‘nɛ́ wen o géé-sɔ̧.