Read Northwest Gbaya O WI-GƆN-KITA 10 Bible Online

O WI-GƆN-KITA 10 - Northwest Gbaya bible

O WI-GƆN-KITA 10

¹Ɗoŋ fio ko Abimɛlɛk, Tola kura ha̧ a̧ mɛ kpasi o be Israɛl. Tola nɛ bem ko Pua, be-koo Dodo. A̧ nɛ bíí ko Isakar nɛ ɔɔ sɛn saaye Samir mgbara kaya Efraim.

²Tola ɔɔ wan zu o be Israɛl tɛ pɛ ɓu-yiitoo-zua-taar. A̧ fea ɓɛɛ wa gun a̧ sɛn Samir.

³Ɗoŋ fio ko Tola, wi nɛ duka oi-aa nɛ Yair be Galad. A̧ ɔɔ wan zu o be Israɛl tɛ pɛ ɓu-yiitoo-zua-yiitoo.

⁴A̧ koo so o be-wiwii ɓu-taar nɛ a̧a̧ so nɛ be tuifuu in ye kɔ-wa kpɔk kpɔk dam wa. O ye nɔ‘i wa sa nɛ́ gbagari ko Yair sɛn nú Galad hɔ sɔsɔɔ.

⁵Yair fea ɓɛɛ wa gun a̧ sɛn Kamɔŋ.

⁶O be Israɛl ku̧u̧ naŋ dee mɔ ɗaŋ yí GASA WAN woyo. Wa sii ɗoŋ tɛ gasa o Bal in o Astarte ká bá nɛ̀ o sɔ̧ nú Aram, o sɔ̧ nú Sidɔŋ, o sɔ̧ nú Mɔab in o sɔ̧ ko o be Amɔŋ ká bá nɛ̀ sɔ̧ ko o be Filistii, ɓɛɛ wa e GASA WAN duk; wa gasi a̧ ɓɔna.

⁷Nyimsea ko GASA WAN kura zu o be Israɛl, ɓɛɛ a̧ a wa kɔ̧ er o be Filistii in o be Amɔŋ.

⁸Hegɔ o bíí nɔ‘i usa bɔnɛ ha̧ o be Israɛl nɛ dɔka-a ti pɛ‘i. Wa dee ŋgamɔ in o be Israɛl lɛŋ nɛ ɔɔ so nɛ kur Jurdɛn sɛn nù ko o be Amɔr, sɛn nú Galad tɛ pɛ ɓu-zua-mɔɔrɔ-ɗoŋ-taar.

⁹O be Amɔŋ kuu Jurdɛn mbɛt wen dee biro in o zuduk ko Juda, in Bɛnjamin gú nɛ̀ ko Efraim, ɓɛɛ o be Israɛl zɔk ŋga bɔnɛ nyɛmna.

¹⁰Nɛ mɔ'ɔ nɛ o be Israɛl aia nú sitɛ GASA WAN; wa tɔ̧a̧: «Ɛɛ dee ɗaŋmɔ ti'nɛ́, wen ɛɛ ee kpasa Sɔ̧ k’ɛɛ duk mɛ gasi nɛ o Bal.»

¹¹GASA WAN kifa nú ha̧ wa: «Ŋgimbi nɛ o be Egiptɛ, o be Amɔr, o be Amɔŋ, o be Filistii,

¹²o be Sidɔŋ, o be Amalɛk in o be Madiaŋ usa so nɛ bɔnɛ h’ɛ́nɛ́, ɛ́nɛ́ aia so nú ha̧‘m; bo nɛ mi kpasa so'nɛ́ er wa na nde?

¹³Ɓɛɛ k’ɛ́nɛ́, ɛ́nɛ́ ea'm duk h’ɛ́nɛ́ mɛ gasi nɛ o ŋma sɔ̧. Mɛ nɛ wen hegɔ, mi beka pii ɗoŋ mɛ kpasi'nɛ́ na.

¹⁴Ɛ̀nɛ̀ nɛ́ɛ̀ áí nú ha̧ o sɔ̧ n’ɛnɛ hoka ha̧ wa mɛ tɛ̀ɛ́ kpasi'nɛ́ tɛ ŋga bɔnɛ k’ɛ́nɛ́'ɛ.»

¹⁵O be Israɛl kifa nú ha̧ GASA WAN: «Ɛɛ dea ɗaŋmɔ, ɛnɛ nyɛma mɛ de mɔ in yɛɛ hee mɔ'ɔ n’ɛnɛ kɔ̧ɔ̧ ga; mɔ kpɔk ɛ̀nɛ̀ kpásí yɛ sɔsɔɔ.»

¹⁶Wa ku̧u̧ naŋ ɗaŋa o gɔni sɔ̧ nɛ a̧a̧ mgbara wa. Wa gasa GASA WAN, ɓɛɛ a̧ zɔk wa nɛ ko, wen zu bɔnɛ kɔ-wa'i.

¹⁷O be Amɔŋ mɔi̧a ŋmaa, ɓɛɛ wa ba gbagari kɔ-wa sɛn nú Galad, ɓɛɛ o be Israɛl mɔi̧ kɔ‘i ŋmaa ba gbagari kɔ‘i sɛn Mispa.

¹⁸Dukbíí in o wanye Galad ku̧u̧ naŋ tɔ̧a̧-a̧ a nú ŋmaa: «Wi nɛ tɛ ku̧ naŋ biro in o be Amɔŋ ti nɛ o? Nɛ́ wi’ɛi a̧ tɛ ɔ wan zu o bíí nú Galad lɛŋ.»