Read Northwest Gbaya O WI-GƆN-KITA 17 Bible Online

O WI-GƆN-KITA 17 - Northwest Gbaya bible

O WI-GƆN-KITA 17

¹Ŋma bíí duka so mgbara kaya Efraim, nin-a nɛ Mika.

²A̧ tɔ̧ɔ̧ ha̧ nàà kɔ̧-a̧: «O kɔya bu-mbɔi tɛ booro-kpɔk-nɛ-gɔmŋmaa nɛ wa zu̧u̧ er'nɛ́, k’ɛ́nɛ́ fom nɛ̀ wi-zu̧a̧-a̧‘i ɓɛɛ ɛnɛ we ɗoŋ-aa ha̧‘m’ɛ, nɛ́ mɔɔ nɔ'ɔ; nɛ mi a̧‘m baa so.» Nàà kɔ̧-a̧ tɔ̧a̧: «Bem kɔ‘m, GASA WAN a̧ tok de yoŋgo zu mɛ.»

³Mika ha̧a̧ kɔya bu-mbɔi booro-kpɔk-nɛ-gɔmŋmaa'i si ɗoŋ ha̧ nàà kɔ‘i, ɓɛɛ nàà kɔ̧-a̧ tɔ̧ ha̧ a̧: «Mi nɛ tɛ‘m, mi ee so bu-mbɔi'i ha̧ GASA WAN wen zu bem kɔ‘m, wen duia-a nɛ ŋma sɔ̧. Hegɔ mi tɛ ha̧ bu-mbɔi'i ha̧ mɛ.»

⁴Mɛ̀ nɛ́ hegɔ ŋgimbi nɛ bem ha̧a̧ bu-mbɔi si ɗoŋ ha̧ nàà kɔ‘i, nàà kɔ̧-a̧ kaia bu-mbɔi gɔmŋmaa-yiitoo ha̧ wi-dui-mɔ; wi’ɛi sɛka te de nɛ ŋma sɔ̧, ɓɛɛ nɔ̧́í̧ bu-mbɔi yɔk nɛ ɗoŋ-aa, ɓɛɛ wa ba e kɔ̧ tua ko Mika.

⁵Mika'i a̧a̧ so nɛ ta-zu-nu; a̧ duia ŋma sɔ̧, ɓɛɛ a̧ mbo o ŋma be sɔ̧ mbɛt. A̧ pi̧i̧ laa tɛ ŋma bem kɔ̧-a̧ ha̧ a̧ mɛ duk nɛ wi-ɗafi-sɔ̧.

⁶Ŋgimbi'i, ŋma wan bo so sɛn Israɛl na, kóó o ndé de so nɛ mɔ nɛ see kɔ̧a̧.

⁷Ŋma be-ŋgaiwi a̧a̧ so sɛn Bɛtlɛhɛm nú Juda, nú-gara ko Juda nɛ duka so nɛ be Levii, ɓɛɛ nɛ ɔ so hi̧i̧ hee gɛnɛ ga.

⁸A̧ kura Bɛtlɛhɛm nú Juda wen kia ŋma fara mɛ duk sɛnɛ hee gɛnɛ ga. A̧ hɔɔ mgbara kaya Efraim nɛ́ɛ̀ hɔ kɔ̧ tua ko Mika.

⁹Mika aka a̧: «Mɛ tɛ nɛ ge fara ge?» A̧ kifa nú: «Mi nɛ be Levii sɛn Bɛtlɛhɛm nú Juda; mi kii nɛ fara mɛ duk sɛnɛ hee gɛnɛ ga.»

¹⁰Ɓɛɛ Mika tɔ̧ ha̧ a̧: «Mɛ̀ dúk in am, ɓɛɛ mɛ tɛ duk nɛ dáà kɔ‘m in wi-ɗafi-sɔ̧ kɔ‘m; ɓɛɛ kɔ‘m nɛ zu'm, mi tɛ ha̧ kɔya bu-mbɔi ɓu ha̧ mɛ dam ɗoŋ pɛ kpɔk kpɔk. Mɛ tɛ kpa laa in nyɔŋmɔ er-am mbɛt.»

¹¹Be Levii'i kpɛka mɛ duk tɛ ko Mika, ɓɛɛ Mika zɔk a̧ hee ŋma bem kɔ‘i ga.

¹²Mika pi̧i̧ laa tɛ-a ha̧ a̧ mɛ duk wi-ɗafi-sɔ̧. Nɛ mɔ'ɔ nɛ be-ŋgaiwi'i duka nɛ wi-ɗafi-sɔ̧ kɔ̧-a̧, ɓɛɛ ɓɔn tɛ kɔ̧-a̧.

¹³Mika tɔ̧a̧: «Kinii, mi iŋa'e GASA WAN tɛ de demɔ in am, wen wi-ɗafi-sɔ̧ kɔ‘m nɛ be Levii.»