Read Northwest Gbaya O WI-GƆN-KITA 18 Bible Online

O WI-GƆN-KITA 18 - Northwest Gbaya bible

O WI-GƆN-KITA 18

¹Ŋgimbi'i, wannu bo so sɛn Israɛl na in ŋgimbi'i mbɛt, zuduk ko Dan kii nɛ ŋma nù mɛ duk sɛnɛ, wen wa kpa so nù mɛ ɔ sɛnɛ hee o oi duk be Israɛl ga na.

²O bem ko Dan toma o wi-biro mɔɔrɔ nú-gara kɔ-wa nɛ kura Sorea in Ɛstaɔl mɛ kpe naŋ mɔ nɛnɛ. Wa tɔ̧ɔ̧ ha̧ wa: «Ɛ̀nɛ̀ nɛ́, ɛ̀nɛ̀ kpé naŋ mɔ.» O wi nɔ‘i mɔɔrɔ‘i nɛ̀ɛ́ hɔ mgbara kaya Efraim, ɓɛɛ wa zir sɛn tɛ ko Mika.

³Hee mɔ'ɔ nɛ wa hɛɗa ká̧ tua ko Mika ga, wa kpaa tiger be Levii, wa ɗɔŋa si ti ɓɛɛ wa ak a̧: «Nɛ́ o'o mgbɔɔ mɛ tɛnɛ hɛ̧ɛ̧ o? Mɛ de nɛ ge sɛn hɛ̧ɛ̧ ge? Nɛ́ ge a̧ dor mɛ e hɛ̧ɛ̧ ge?»

⁴A̧ kifa nú ha̧ wa: «Mika dee mɔ nɛtɛ nɛtɛ ha̧‘m; a̧ baa'm tɛ tom, ɓɛɛ a̧ e'm nɛ wi-ɗafi-sɔ̧ kɔ̧-a̧.»

⁵O wi nɔ‘i tɔ̧ɔ̧ ha̧ be Levii'i: «Mɛ̀ ák mɔ in Sɔ̧, a̧ mɛ̀ zɔ́k kà naŋanɔ k’ɛɛ nɛ tɛ̀ɛ́ ba nɛ̀ yɛ.»

⁶Wi-ɗafi-sɔ̧ kifa nú ha̧ wa: «Ɛ̀nɛ̀ nɛ́ zaŋ ga̧a̧mɔ, GASA WAN zɔk nɛ́ naŋanɔ k’ɛ́nɛ́ n’ɛnɛ nɛ‘i nɛ̀ de yí.»

⁷O wi nɔ‘i mɔɔrɔ‘i yaka, ɓɛɛ wa hɔ sɛn saaye Lais. Wa zɔka'e o bíí nɛ ɔ ye hi̧i̧ lɛŋ ya tɛ ga̧a̧mɔ hee o bíí Sidɔŋ ga; mɔ bo zu wa na, nù kɔ-wa dɛm nyɔnɔ nɛ de-a; ŋma wannu bo zu wa na. Wa ɔ nyɛi̧a nɛ o bíí Sidɔŋ, wa ndaɗi so in o ŋma bíí na mbɛt.

⁸O wi nɔ‘i mɔɔrɔ‘i pia ɗoŋ tɛɛ kpa o nya-wa sɛn Sorea in Ɛstaɔl, ɓɛɛ o nya-wa ak wa: «Ɛnɛ dee hee ge?»

⁹Wa kifa nú: «Ɛ̀ɛ̀ kúr, ɛ̀ɛ̀ bá biro dúk nɛ̀ wa! Ɛ́ɛ́ zɔka'e nù‘i nɛ de nù nyɛmna, wen ge s’ɛnɛ duk nɛ oi nú‘nɛ́ ge? K’ɛ́nɛ́ nik naŋ‘nɛ́ tɛ yaka-a na, ɛ̀nɛ̀ nɛ́ɛ̀ bá nù‘i.

¹⁰Ɛ́nɛ́ be tɛ̀ɛ́ hɔ hi̧i̧, ɛ́nɛ́ tɛ kpa nɛ́ ŋma dukbíí nɛ ta mɔ wen biro na. Nù‘i ɔ pɛsa, Sɔ̧ ha̧a̧ nù‘i h’ɛ́nɛ́, nɛ́ nù nɛ̀ ŋma mɔ ɓan sɛnɛ na.»

¹¹Nɛ mɔ'ɔ nɛ o bíí nú-gara ko Dan gɔmŋmaa-mɔɔrɔ-ɗoŋ-kpɔk kura nɛ Sorea in Ɛstaɔl nɛ o boi-biro.

¹²Wa daŋa nɛ́ɛ̀ ɔ sɛn Kiriat-Yearim nú Juda; nɛ́ hegɔ sa wa sa nin fara'i'e Gbagari ko Dan hɔ sɔsɔɔ. Fara'i duk nɛ war yee-wese ha̧ Kiriat-Yearim.

¹³Wa duka hi̧i̧ ɓir nɛnɛ si mgbara kaya Efraim, ɓɛɛ wa hɔ kɔ̧ tua ko Mika.

¹⁴O wi nɔ‘i mɔɔrɔ nɛ yaka so mɛ kpe naŋ mɔ sɛn saaye Lais'i tɔ̧ɔ̧ ha̧ o nya-wa: «Bó nɛ́ ɛ́nɛ́ iŋa'e ŋma géé-sɔ̧, o be mboo-sɔ̧, in ŋma sɛka-sɔ̧ nɛ‘i yɔka bu-mbɔi ɗoŋ-aa a̧a̧ kɔ̧ ŋma tua nɔ'ɔ na nde? Kinii, ɛ̀nɛ̀ íŋ mɔ n’ɛnɛ tɛ de.»

¹⁵Nɛ mɔ'ɔ nɛ o wi nɔ‘i mɔɔrɔ‘i nɛɛ si kɔ̧ tua ko be Levii'i tɛ ko Mika, ɓɛɛ wa fan a̧.

¹⁶Kale ŋgimbi'i, o bezaŋ Dan gɔmŋmaa-mɔɔrɔ-ɗoŋ-kpɔk kɛra nú tua nɛ boi-biro.

¹⁷O bíí mɔɔrɔ nɛ kpee so naŋ mɔ yee tua; wa kaia gee sɔ̧‘i, o be mboo-sɔ̧ nɔ‘i, in sɛka-sɔ̧ nɛ‘i yɔka so bu-mbɔi nɛ ɗoŋ-aa, ɓɛɛ ká wi-ɗafi-sɔ̧ in o bíí gɔmŋmaa-mɔɔrɔ-ɗoŋ-kpɔk ya so nú tua nɛ boi-biro.

¹⁸Hee mɔ'ɔ nɛ o wi nɛ yee kɔ̧ tua ko Mika kaia so gee sɔ̧, o be mboo-sɔ̧, in sɛka-sɔ̧ nɛ‘i yɔka bu-mbɔi nɛ ɗoŋ-aa ga, wi-ɗafi-sɔ̧ aka wa: «Nɛ́ ge ɛ̀nɛ̀ de ge?»

¹⁹Wa kifa nú ha̧ a̧: «Mɛ̀ dúk nɛ oi nú-mɛ a̧ mɛ tɛ in yɛɛ ha̧ mɛ mɛ duk nɛ́ dáà k’ɛɛ, in wi-ɗafi-sɔ̧ k’ɛɛ. Duka wi-ɗafi-sɔ̧ ko kpɔk nutua a̧ tɛ gan duka wi-ɗafi-sɔ̧ ko ŋma zuduk, in ŋma nú-gara sɛn Israɛl nde?»

²⁰Wi-ɗafi-sɔ̧ kpaa desee; a̧ kaia géé-sɔ̧, o be mboo-sɔ̧, in sɛka-sɔ̧ nɛ‘i yɔka bu-mbɔi nɛ ɗoŋ-aa, ɓɛɛ a̧ ye mgbara wa.

²¹Wa kaia o okoo, o obem, o mɔ-dai in o demɔ kɔ-wa a ti, ɓɛɛ wa ba yuwar kɔ-wa si ɗoŋ.

²²Wa nyɛi̧a nɛ tua ko Mika kaɗi, ɓɛɛ o bíí nɛ ɔ katɛ Mika mɔi̧ ŋmaa ndak ɗoŋ o bezaŋ Dan.

²³Wa hiɗa mɔ nɛ nin o bezaŋ Dan, ɓɛɛ o bezaŋ Dan zik tɛ tɔ̧ ha̧ Mika: «Nɛ́ ge'e de mɛ ge? Mɛ́ mɔ́í̧ o wi nɔ'ɔ mɛ de ge?»

²⁴Mika kifa nú: «Ɛnɛ kaia o sɔ̧ kɔ‘m n'am duia in wi-ɗafi-sɔ̧ kɔ‘m mbɛt yak nɛnɛ. Nɛ́ ge a̧ ɓɔna ha̧‘m ge? Wen ge s’ɛnɛ ak am tɔ̧ nɛnɛ‘e, nɛ́ ge nde ge?»

²⁵O bezaŋ Gad kifa nú ha̧ Mika: «Ɛɛ kɔ̧ mɛ zii ger-mɛ ɓɔna, wen ká see o wi nɔ'ɔ tɛɛ nyim, ɓɛɛ wa aa zu mɛ h’ɛ́nɛ́ mɛ kum in o bíí nutua kɔ-mɛ lɛŋ.»

²⁶O bezaŋ Dan yaka mɔ kɔ‘i; ɓɛɛ nɛ Mika zɔka'e wa ŋgaia gan wi, a̧ zika tɛ-a si ɗoŋ tɛ kɔ̧-a̧.

²⁷O bezaŋ Dan nɛ baa o sɔ̧ nɛ Mika duia in wi-ɗafi-sɔ̧ kɔ̧-a̧ mbɛt tika zu o bíí saaye Lais nɛ ya kɔ‘i tɛ ga̧a̧mɔ in nɛ ta mɔ wen biro na; wa gbɛɛ wa nɛ gba-paa, ɓɛɛ wa pi̧ wee tɛ ye kɔ-wa lɛŋ.

²⁸Ŋma bíí mɛ gbak o bíí Lais bo na wen wa ɔ so nɛ nyɛi̧a-a nɛ nú Sidɔŋ. Wa gbam so in o bíí Aram na mbɛt. Ye Lais duka so nɛ̀ kɔ̧ ɗɔŋgɔ si Bɛt-Rehob. O bezaŋ Dan mboo ye woyo, ɓɛɛ wa ɔ sɛnɛ.

²⁹Wa aa nin ye'i Dan nyɛm nɛ ɗoŋ nin zɔmdáa kɔ-wa Dan, bem ko Israɛl. Nɛti nin ye'i duka so nɛ Lais.

³⁰O bezaŋ Dan baa géé-sɔ̧ ko Mika e ŋgɔn, ɓɛɛ Jonataŋ, bem ko Gɛrsɔŋ, be-koo Moisɛ, duka nɛ wi-ɗafi-sɔ̧ kɔ-wa. Nɛ ɗoŋ, o bezaŋ Jonataŋ duka nɛ o wi-ɗafi-sɔ̧ ko o bezaŋ Dan hɔ ŋgimbi nɛ wa kaia nɛ wa yaknɛ nɛ bara-biro.

³¹Wa baa géé-sɔ̧ nɛ Mika duia so'i e ŋgɔn, ɓɛɛ wa kasi gee sɔ̧‘i ɗoŋ-aa nyɛi̧ nyɛm ŋmaa in ŋgimbi nɛ Tua ko Sɔ̧ ɓɔna so nɛnɛ sɛn Silo.