Read Northwest Gbaya O WI-GƆN-KITA 2 Bible Online

O WI-GƆN-KITA 2 - Northwest Gbaya bible

O WI-GƆN-KITA 2

¹Betom ko GASA WAN tɛɛ nɛ̀ Gilgal pii Bokim, ɓɛɛ tɔ̧ ha̧ o be Israɛl: «Mi mgbɔɔ‘nɛ́ nɛ̀ nú Egiptɛ, mi kaia'nɛ́ tɛnɛ ye nɛ nù n'am kana so mɔ ha̧ nɛnɛ ha̧ o dáà k’ɛ́nɛ́. Mi tɔ̧ɔ̧ so'e, mi beka yak zu nɔɔ-tɔk kɔ‘m in'nɛ̀ɛ́ na;

²ɓɛɛ nɛ̀ k’ɛ́nɛ́, ɛnɛ beka nɔ tɔk in o bíí tɛ nù‘i na. Ɛnɛ tɛ gbin o fara-ɗafi géé-sɔ̧ kɔ-wa yinɛ. Nɛ mɔ'ɔ n’ɛnɛ zii wen nú‘m na. Nɛ́ ge ɛnɛ dee hegɔ'ɔ ge?

³Nɛ́ bòò hegɔ, mi beka ndak wa yinɛ sɛn ti'nɛ́ na. Wa tɛ ya nɛ́ wi-de-ŋgamɔ in'nɛ̀ɛ́, ɓɛɛ o sɔ̧ kɔ-wa tɛ ya nɛ pɛ́r wen'nɛ́.»

⁴Ɗoŋ nɛ betom ko GASA WAN tɔ̧ɔ̧ wen'i ha̧ o be Israɛl kaɗi, wa aia nú hí̧í̧ nɛ̀ kɔ̧a̧.

⁵Wa saa nin fara'i nɛ Bokim, ɓɛɛ wa ɗafi sɔ̧ ha̧ GASA WAN sɛn hi̧i̧.

⁶Josue foo dukbíí siɗoŋ, ɓɛɛ o be Israɛl pɛsi si fara kɔ-wa kpɔk kpɔk, wen baa nù.

⁷Dukbíí dee tom ha̧ GASA WAN ŋgimbi lɛŋ nɛ Josue duka nɛ yí in ŋgimbi ko o kuti-wi nɛ duka ɗoŋ-aa nyɛi̧ ɗoŋ fio ko Josue, ɓɛɛ nɛ̀ zɔka so gasamɔ nɛ GASA WAN dee so wen Israɛl mbɛt.

⁸Josue bem ko Nun, wi-de-tom ko GASA WAN fea ká a̧ a̧a̧ nɛ pɛ gɔmŋmaa nɛ pɛ ɓu.

⁹Wa guna a̧ tɛ nù kɔ̧-a̧ n'aa kpaa so nɛ̀ mɔɔ-oi sɛn Timnat-Hɛrɛs mgbara kaya Efraim nɛ war ká̧-zan-mɛ́-ŋgɔn ha̧ kaya Gas.

¹⁰Pɛrti o wi nɔ‘i lɛŋ fea mbɛt. Ɗoŋ mɔ‘i, o mbe bezaŋ duka oi wa, nɛ̀ iŋ GASA WAN, kóó mɔ n'aa dee so wen Israɛl na.

¹¹O be Israɛl dee mɔ ɗaŋ yí GASA WAN, ɓɛɛ wa de tom ha̧ o géé-sɔ̧ Bal.

¹²Wa bɛ̧ɛ̧ GASA WAN Sɔ̧ ko o dáà kɔ-wa nɛ gboo wa nù Egiptɛ, ɓɛɛ wa ndak ɗoŋ o ŋma sɔ̧ ko o wi nɛ yaa so katɛ wa. Wa gbɛɛ zugur-wa nu ti o sɔ̧ nɔ‘i tu̧ nɛ see GASA WAN.

¹³Wa ee GASA WAN duk, ɓɛɛ wa gasi nɛ Bal in Astarte.

¹⁴See GASA WAN tu̧u̧ zu o be Israɛl. A̧ aa wa kɔ̧ er o wi-kai-mɔ ko bíí, ɓɛɛ o wi nɔ‘i kai mɔ kɔ-wa lɛŋ. A̧ aa wa kɔ̧ er o wisɛn kɔ-wa nɛ yaa katɛ wa mbɛt; wa nyɛm so mɛ yor ti o wisɛn kɔ-wa ɓɔna.

¹⁵Tɛ̀ o yari kɔ-wa lɛŋ, er GASA WAN duka so zu wa mɛ de ɗaŋmɔ in wa, hee mɔ'ɔ nɛ GASA WAN tɔ̧ɔ̧ so ha̧ wa, ɓɛɛ ka a̧ kan nɛ̀ mɔ ha̧ wa ga. Bɔnɛ kɔ-wa ŋgaya nyɛmna.

¹⁶Nɛ mɔ'ɔ nɛ GASA WAN dee ha̧ o ŋma wi-gɔn-kita mɛ ya mgbara wa, ɓɛɛ wa kpasi wa er o wi-kai-mɔ kɔ-wa.

¹⁷Zu-a'i, wa zii wen nú o wi-gɔn-kita nɔ‘i na mbɛt, wen wa ndaka kànà nɛ́ ɗoŋ o sɔ̧ nɔ‘i gu nɛ nù ti wa. Wa ee yuwar ko o dáà kɔ-wa nɛ ba so ndak nɛ̀ ɗoŋ o heembea ko GASA WAN duk nɛ haya-a. Wa de mɔ hee o dáà kɔ-wa ga na.

¹⁸Ŋgimbi nɛ GASA WAN e wi-gɔn-kita zu wa, ɓɛɛ a̧ duka in wi’ɛi, gbo nɛ̀ wa sɛn er o wisɛn kɔ-wa ŋgimbi nɛ wi-gɔn-kita'i ɓɔna kpasa, wen GASA WAN de so nɛ ko ha̧ wa tɛ aia-nú kɔ-wa ti o wi nɛ de ŋgamɔ in wa usi nɛ̀ bɔnɛ ha̧ wa.

¹⁹Ɓɛɛ ɗoŋ fio ko wi-gɔn-kita, wa sii ɗoŋ tɛ ɗaŋmɔ woyo gan ko o dáà kɔ-wa, nɛ́ nɛ̀ ɗoŋ o ŋma sɔ̧, de nɛ̀ tom ha̧ wa, gu nɛ̀ nù ti wa. Wa e ŋma ɗaŋ yuwar deemɔ kɔ-wa in ŋgazu kɔ-wa duk na.

²⁰See GASA WAN tu̧u̧ zu o be Israɛl, ɓɛɛ a̧ tɔ̧: «Hee mɔ'ɔ nɛ dukbíí'ɛ gbina nɔɔ-tɔk kɔ‘m n'am nɔɔ in o dáà kɔ-wa, ɓɛɛ ká wa zii wen kɔ‘m na ga,

²¹mi mbɛt, mi beka ndak o dukbíí nɔ'ɔ nɛ Josue ee sɛka fe nɛnɛ'ɛ yinɛ ti wa ɓɔna.»

²²Mɛ̀ nɛ́ wéé o be Israɛl a̧ GASA WAN we nɛ̀ o dukbíí nɔ‘i mɛ iŋ kà wa nɛ́ tɛ̀ɛ́ ba yuwar kɔ̧-a̧ nɛ́ nɛ nɔ̀ hee mɔ'ɔ nɛ o dáà kɔ-wa dee so ga.

²³Hegɔ GASA WAN ee o gɔni bíí nɔ‘i, a̧ ndak so wa yinɛ nɛ haya-a na, ɓɛɛ a̧ e so wa kɔ̧ er Josue na mbɛt.