Read Northwest Gbaya O WI-GƆN-KITA 20 Bible Online

O WI-GƆN-KITA 20 - Northwest Gbaya bible

O WI-GƆN-KITA 20

¹O be Israɛl lɛŋ gboo nyɛm ŋmaa hee kpɔk bíí ga mɔi̧ ŋmaa katɛ GASA WAN sɛn Mispa, ku̧u̧naŋ-a nɛ Dan hɔ sɛn Bɛrseba hegɔ hɔ nú Galad mbɛt.

²O gasawi zu dukbíí Israɛl lɛŋ tɛɛ tɛ mɔi̧a-a ko o bíí ko Sɔ̧; o wi-biro nɛ nɛɛ kɔ-wa nɛ naŋ nɛ́ booro-gɔmŋmaa-naar, wa lɛŋ iŋa so bíí biro nɛ gba-paa.

³O be Bɛnjamin zia yaka-a ko o be Israɛl si sɛn Mispa. O be Israɛl tɔ̧a̧: «Ɛ̀nɛ̀ tɔ̧́ yuwar gbɛɛ zu’ɛ nɛ wa gbɛɛ'ɛ h’ɛ́ɛ́ zii.»

⁴Be Levii, wíì ko kóò‘i nɛ wa gbɛa'i, tɔ̧a̧: «Mi hɔɔ so in kóò kɔ‘m sɛn Gibea nú Bɛnjamin; zɛ dee am sɛn hi̧i̧, ɓɛɛ mi ɔ saaye'i.

⁵O bíí Gibea kura in am. Wa zika tua n'am ɔɔ sɛnɛ, wa kɔ̧ɔ̧ so mɛ gbɛ‘m; ko kóò kɔ‘m, wa ɔɔ in a̧ hegɔɔ mɔ sa̧ nɛnɛ, ɓɛɛ a̧ fe.

⁶Mi baa kóò kɔ‘m, mi ɓira a̧, ɓɛɛ mi tom kpoo tɛ-a dam nù ko o be Israɛl lɛŋ wen wa dee gasa ɗaŋmɔ in mɔɔ-búù sɛn Israɛl.

⁷Ɛnɛ o be Israɛl lɛŋ, ɛ̀nɛ̀ tɔ̧́ wen, ɛ̀nɛ̀ é zu mɔ.»

⁸Wa lɛŋ dika hee kpɔk bíí ga, ɓɛɛ wa tɔ̧: «Ŋma bíí mgbara yɛ kpɔk beka si ɗoŋ kɔ̧ tua-laa kɔ‘i na, ŋma bíí kpɔk beka si ɗoŋ ye kɔ‘i na.

⁹Ɓɛɛ kinii yuwar mɔ n’ɛɛ tɛ de in Gibea nɛ mɔ'ɔ: ɛɛ tɛ pi̧ nɛ́ tani ba nɛ biro dúk nɛ̀ wa.

¹⁰Ɓɛɛ sɛn mgbara o zuduk be Israɛl lɛŋ, ɛɛ tɛ hok bíí: ɛɛ tɛ kai bíí ɓu sɛn mgbara bíí gɔmŋmaa; bíí gɔmŋmaa mgbara bíí booro; bíí booro mgbara bíí booro-ɓu. Wi nɔ‘i hi̧i̧ tɛ duk kɔ-wa wen kia nyɔŋmɔ ha̧ o gii wi-biro nɛ tɛ nɛ mɛ bi o be Gibea tɛ nù ko Bɛnjamin nyɛm nɛ ɗoŋ mɔɔ-búù nɛ wa dea sɛn Israɛl.»

¹¹O be Israɛl lɛŋ mɔi̧a ŋmaa hee kpɔk bíí ga, ɓɛɛ wa ba zu dúk nɛ̀ ye'i.

¹²O zuduk be Israɛl toma bíí ha̧ duk be Bɛnjamin lɛŋ wen aka wa: «Gbɛɛ-zu nɛ dee mgbara'nɛ́ hɛ̧ɛ̧ nɛ ge nde?

¹³Kinii, ɛ̀nɛ̀ é o wi-de-gba̧a̧-mɔ-na nɔ‘i h’ɛ́ɛ́ gbɛ wa, fo nɛ ɗaŋmɔ yinɛ sɛn Israɛl.» O bezaŋ Bɛnjamin kɔ̧ mɛ zii wen ko o nya-wa, o be Israɛl na.

¹⁴O bezaŋ Bɛnjamin mɔi̧a ŋmaa tɛnɛ nɛ o ye kɔ-wa pii sɛn Gibea wen bíí o be Israɛl.

¹⁵O bezaŋ Bɛnjamin nɛ mɔi̧a ŋmaa lɛŋ wese'i, wen bíí biro in o be Israɛl dee nɛ booro-ɓu-yiitoo-zua-mɔɔrɔ-ɗoŋ-kpɔk nɛ iŋa biro nɛ gba-paa, wi tɔr o wi Gibea gɔmŋmaa-mɔɔrɔ-ɗoŋ-yiitoo nɛ ya nɛ o ŋga wi-biro na.

¹⁶Mgbara o wi nɔ‘i lɛŋ, o wi-biro wan-gale nɛ́ o bíí gɔmŋmaa-mɔɔrɔ-ɗoŋ-yiitoo. Wa kpɔk kpɔk nyɛma mɛ pi̧ birndiŋ yo nɛ mui̧-zu kpɔk, wa nyun na.

¹⁷O be Israɛl mɔi̧a ɓɛɛ tɔr ŋmaa mbɛt. Wa dea bíí booro-gɔmŋmaa-naar nɛ iŋa biro nɛ gba-paa; wa lɛŋ nɛ́ o ŋgaŋa wi-biro, wi tɔr o bezaŋ Bɛnjamin na.

¹⁸O be Israɛl lɛŋ mɔi̧a ŋmaa daŋ si Bɛtɛl mɛ ak mɔ in Sɔ̧; wa tɔ̧a̧: «Nɛ́ o mgbara yɛ a̧ tɛ ba biro dúk nɛ̀ o bezaŋ Bɛnjamin ti o?» GASA WAN kifa nú: «Nɛ́ Juda a̧ tɛ daŋ ti.»

¹⁹O be Israɛl kura mɛ tutuyɛ sut, ɓɛɛ ba gbagari ká̧ Gibea.

²⁰O be Israɛl nɛ gboo mɛ bi o bezaŋ Bɛnjamin nɛka biro tan nɛ Gibea.

²¹O bezaŋ Bɛnjamin kura nɛ Gibea, ɓɛɛ wa gbɛ o be Israɛl booro-ɓu-yiitoo-zua-yiitoo wese'i.

²²O be Israɛl daka zu pii ɗoŋ tɛ́ɛ̀ ɗafi naŋ biro fara nɛ wa baa ku̧ naŋ biro sɛnɛ‘i.

²³O be Israɛl daŋa nɛ́ɛ̀ hí̧í̧ kɔ̧a̧ ti GASA WAN mɔ ga̧ nɛnɛ, ɓɛɛ wa ak a̧: «Ɛɛ tɛ ba biro kpa nɛ o nya yɛ o bezaŋ Bɛnjamin woyo nde?» GASA WAN kifa nú: «Ɛ̀nɛ̀ bá biro dúk nɛ̀ wa woyo.»

²⁴Tɛ yiitoo zɛ, o be Israɛl baa biro dúk nɛ̀ o bezaŋ Bɛnjamin.

²⁵Tɛ yiitoo zɛ‘i, o bezaŋ Bɛnjamin gboo nɛ Gibea tik zu wa, gbɛ o ŋga wi-biro ko o be Israɛl booro-ɓu-zua-mɔɔrɔ-ɗoŋ-taar nɛ iŋa bíí biro nɛ gba-paa.

²⁶O be Israɛl in dukbíí lɛŋ yaka si Bɛtɛl; wa yaa nù sɛn hi̧i̧, hí̧í̧ nɛ̀ kɔ̧a̧ sɛn ti GASA WAN woyo; ɓɛɛ wa zim yì mɛ tutuyɛ mɔ ga̧ nɛnɛ. Wa dɔɔ kpoo-sɔ̧ ha̧ GASA WAN ɓɛɛ wa ɗafi sɔ̧ wen kpaa ga̧a̧mɔ mbɛt.

²⁷O be Israɛl aka mɔ in GASA WAN woyo ŋgimbi'i, ká Kuɓa nɔɔ-tɔk ko GASA WAN a̧a̧ so fara'i mbɛt.

²⁸Nɛ́ Pinas bem ko Eleazar be-koo Arɔŋ a̧ yora ti kuɓa'i wese'i. Wa aka mɔ: «Ɛ̀ɛ̀ bá biro dúk nɛ̀ o nya yɛ woyo náà, kóó ɛ̀ɛ̀ é duk nde?» Ɓɛɛ GASA WAN kifi nú ha̧ wa: «Ɛ̀nɛ̀ nɛ́ wen sa̧a̧mɔ, mi tɛ a wa kɔ̧ er'nɛ́.»

²⁹O be Israɛl hu̧sa̧ o ŋma bíí zik Gibea kpa.

³⁰Tɛ taar zɛ, o be Israɛl baa zu dúk nɛ̀ o bezaŋ Bɛnjamin, ɓɛɛ wa nɛk biro tan nɛ Gibea hee nɛti ga.

³¹O bezaŋ Bɛnjamin kura ba biro kpa nɛ̀ o be Israɛl nɛ ɔra wa hee wa yu nɛ mɔ yak ga, ɓɛɛ ɗoŋ o bezaŋ Bɛnjamin nyɛi̧ nɛ saaye kɔ‘i. Wa ku̧u̧ naŋ gbɛɛ o be Israɛl hee nɛti ga. O be Israɛl nɛ wa gbɛa dea bíí ɓu-taar; wa gbɛɛ wa sɛn sasa-war nɛ ɓir nɛ Bɛtɛl in wan nɛ yak si Gibea nɛ war zaŋbɛɛ.

³²O bezaŋ Bɛnjamin tɔ̧ɔ̧ ha̧ ŋmaa: «Ɛ́ɛ́ gusa wa hee kuti-a ga!» Ɓɛɛ ká o be Israɛl tɔ̧ɔ̧ so'e, wi tɛ de gɔn-ta, yu nɛ̀ mɔ, mgbɔ nɛ̀ wa nyɛi̧ nɛ̀ saaye si yuwar mɛ.

³³O be Israɛl lɛŋ gboo nɛ fara hu̧sa̧-a̧ kɔ-wa nɛk biro sɛn Bal-Tamar, ɓɛɛ o wan nɛ hu̧sa̧ so zaŋbɛɛ gbo kɔ‘i ká̧ Gibea nɛ war yee-wese.

³⁴O ŋga wi-biro nɛ o be Israɛl hoka so tɛ bíí booro-ɓu tɛɛ hɔ mgbák ti Gibea. Biro ŋgaya nyɛmna, ɓɛɛ o bezaŋ Bɛnjamin iŋ so kɔ‘i ŋgamɔ nɛ̀ hai wa tɛnɛ‘i na.

³⁵GASA WAN gusa o bezaŋ Bɛnjamin ti o be Israɛl wese'i. O be Israɛl gbɛɛ o bezaŋ Bɛnjamin booro-ɓu-yiitoo-zua-mɔɔrɔ nɛ iŋa dee biro nɛ gba-paa.

³⁶O bezaŋ Bɛnjamin iŋa'e biro gana wi kaɗi. O be Israɛl ku̧u̧ naŋ daka tɛ ti o bezaŋ Bɛnjamin wen wa e nɛ́ ta wa nɛ̀ o wi nɛ wa hu̧sa̧ zik Gibea kpa.

³⁷O bíí nɛ wa hu̧sa̧ yaka si Gibea nɛ̀ haya-a; wa pɛsa dam saaye ɓɛɛ wa kum o bíí saaye'i lɛŋ nɛ gba-paa a nù.

³⁸Oi be Israɛl ee so nú in o o wan nɛ hu̧sa̧ so hee mɔ'ɔ ga: «Nɛ́ ɛnɛ a̧ tɛ mbaŋ tɛ yɛ nɛ zi-wee nɛ tɛ tur saaye mɛ.»

³⁹O be Israɛl zika ɗoŋ ha̧ biro; ɓɛɛ o bezaŋ Bɛnjamin ku̧ naŋ gbɛɛ o be Israɛl, hee o bíí ɓu-taar ga kaɗi. Wa tɔ̧ɔ̧ sitɛ ŋmaa: «Ɛɛ kuma wa lɛŋ hee mɔ'ɔ n’ɛɛ kuma so nɛ wa tɛ kuti biro ga.»

⁴⁰Ɓɛɛ nɛ mɔ'ɔ nɛ mɔɔ-usi-mɔ nɛ duk nɛ zi-wee ku̧u̧ naŋ tura-a saaye, ɓɛɛ kà o bezaŋ Bɛnjamin be tɛɛ zik tɛ, leɓe-wee kpee saaye lɛŋ tur nɛnɛ si yiwese.

⁴¹O be Israɛl zika tɛ woyo, ɓɛɛ kíì ba o bezaŋ Bɛnjamin wen wa zɔka'e ŋgamɔ tika zu wi.

⁴²O bezaŋ Bɛnjamin zika ɗoŋ e ha̧ o be Israɛl si war ŋga-gbárà, wen biro nasi nɛ wa, ɓɛɛ o wi nɛ tɛ nɛ saaye gbɛ wa nɛ yuwar.

⁴³Wa kɛra o bezaŋ Bɛnjamin, wa ndaka wa; wa ɔm tɛ-wa na; wa mbɔla wa hɔ ká̧ Geba nɛ war daŋa-wese.

⁴⁴O ŋga wi-biro ko o bezaŋ Bɛnjamin nɛ fea lɛŋ nɛ́ o ŋga wi-biro booro-ɓu-zua-mɔɔrɔ-ɗoŋ-taar.

⁴⁵O bezaŋ Bɛnjamin zika ɗoŋ yu mɔ si war ŋga-gbárà si ká̧ ta ko Rimɔŋ. Wa kaia o ŋma booro-mɔɔrɔ nɛ yuwar, wa ndaka o ŋma hɔ Gideɔm, ɓɛɛ wa gbɛ o ŋma woyo booro-yiitoo.

⁴⁶O bezaŋ Bɛnjamin lɛŋ nɛ fea tɛ kpɔk kale wese'i nɛ wi-biro booro-ɓu-yiitoo-zua-mɔɔrɔ; o wi nɔ‘i lɛŋ nɛ o kpasa wi-biro nɛ iŋa dee biro nɛ gba-paa.

⁴⁷O bezaŋ Bɛnjamin gɔmŋmaa-mɔɔrɔ-ɗoŋ-kpɔk zika tɛ yu mɔ si ká̧ ta ko Rimɔŋ, ɓɛɛ wa ya hi̧i̧ de fio-zɛ naar.

⁴⁸O be Israɛl pia ɗoŋ tɛ o bezaŋ Bɛnjamin, ɓɛɛ gbɛ wa lɛŋ nɛ gba-paa nɛ tɛ o ye nɛnɛ, o bíí mbɛt, o mɔ-dai mbɛt, in o mɔ lɛŋ nɛ wa kpaa. Zu-a'i mbɛt, wa pi̧i̧ wee tɛ o ye kɔ-wa lɛŋ nɛ wa kpaa.