Read Northwest Gbaya O WI-GƆN-KITA 21 Bible Online

O WI-GƆN-KITA 21 - Northwest Gbaya bible

O WI-GƆN-KITA 21

¹O be Israɛl kànà so mɔ sɛn Mispa'e, ŋma bíí kpɔk mgbara wi o be Israɛl beka ha̧ boko-bem kɔ‘i nɛ kóò ha̧ ŋma bezaŋ Bɛnjamin na.

²Dukbíí Israɛl tɛɛ pii Bɛtɛl, ɓɛɛ wa ya nù mɔ ga̧ ti GASA WAN. Wa aia nú ɓɛɛ wa hi̧i̧ kɔ̧a̧ nɛ dɔka-a.

³Wa tɔ̧a̧: «GASA WAN Sɔ̧ ko Israɛl, wen ge ŋma duk be Israɛl kpɔk bo ɓɔ na ge?»

⁴Nɛ mɔ sa̧a̧ kaɗi, o be Israɛl kura mɛ tutuyɛ sut, ɓɛɛ ɗoŋ nɛ wa mboo fara-ɗafi-sɔ̧ hi̧i̧, wa dɔɔ kpoo-sɔ̧, ɓɛɛ wa ɗafi sɔ̧-gaŋmɔ.

⁵O be Israɛl aka mɔ: «Mgbara o dɔka duk be Israɛl, ŋma duk nɛ nɛ́ so tɛ mɔi̧a-a ti GASA WAN na nɛ o?» Ŋma kanamɔ duka so'e, wi tɛ gbɛ wi nɛ beka daŋ nɛ si ti GASA WAN sɛn Mispa na.

⁶O be Israɛl zɔka o nya kɔ-wa bezaŋ Bɛnjamin nɛ ko, ɓɛɛ wa tɔ̧: «Ŋma zuduk k’ɛɛ yuu mgbara yɛ sɔsɔɔ.

⁷Nɛ́ ge ɛ̀ɛ̀ tɛ de ha̧ nɛ kóò ha̧ o wan nɛ ɓɔna n’ɛɛ baa ha̧ so nú nɛ nin GASA WAN'e, ɛɛ beka ha̧ so o boko-bem k’ɛɛ nɛ kóò ha̧ wa na’ɛ ge?»

⁸Wa aka mɔ: «Ŋma bíí mgbara o zuduk be Israɛl a̧a̧ sɛnɛ nɛ daŋ so pii ti GASA WAN sɛn Mispa na nde?» Wa zɔka'e ŋma bíí tɛ so nɛ Yabɛs nu Galad tɛ mɔi̧a-a na.

⁹O be Israɛl tɔra so ŋmaa, ɓɛɛ wa kpa so ŋma bíí Yabɛs sɛn nú Galad kpɔk mgbara wa na.

¹⁰Nɛ mɔ'ɔ nɛ o be Israɛl toma o ŋga wi-biro lɛŋ booro-ɓu-zua-yiitoo, ɓɛɛ ha̧ nú ha̧ wa: «Ɛ̀nɛ̀ nɛ́ɛ̀ gbɛ́ o bíí Yabɛs nu Galad, gu nɛ okoo, in o obem mbɛt nɛ gba-paa.

¹¹Mɔ n’ɛnɛ tɛ de nɛ mɔ'ɔ: ɛ̀nɛ̀ gbɛ́ o wiwii lɛŋ, in o okoo lɛŋ nɛ iŋa tɛ in wiwii kaɗi, ɓɛɛ o wan nɛ tɛ iŋ tɛ na, k’ɛ́nɛ́ fo wa na.» Mɔ nɛ wa nɛɛ de nɛ mɔ‘i.

¹²Wa nɛɛ kpa o be-zɔŋa nɛ tɛ iŋ tɛ in wiwii na sɛn nu Galad sɛn Yabɛs gɔmŋmaa-naar, ɓɛɛ wa kai wa si kɔ̧ gbagari Silo nɛ duk nú Kanaŋ.

¹³O be Israɛl pi̧i̧ tom ha̧ o bezaŋ Bɛnjamin nɛ ya sɛn ká̧ ta ko Rimɔŋ, wen ha̧ ga̧a̧mɔ mɛ duk mgbara wa.

¹⁴O bezaŋ Bɛnjamin pia ɗoŋ tɛ ŋgimbi'i, ɓɛɛ wa ha̧ o boko-bem nú Yabɛs nú Galad nɛ wa kaia so ha̧ o bezaŋ Bɛnjamin, ɓɛɛ o okoo nɔ‘i dam wa na.

¹⁵Ko dee o be Israɛl ha̧ o bezaŋ Bɛnjamin wen GASA WAN ɗaŋa ŋma zuduk yinɛ mgbara wa.

¹⁶O gasawi Israɛl tɔ̧a̧: «Ɛ́ɛ́ tɛ de hee ge kpa nɛ o kóò ha̧ o bezaŋ Bɛnjamin nɛ kpa kɔ‘i kóò na’ɛ ge? Ɛ́ɛ́ baa kum so o okoo er wa yinɛ kaɗi.»

¹⁷O gasawi Israɛl tɔ̧ɔ̧ woyo: «Ɛ́ɛ́ tɛ de hee ge, wen ká kpar bezaŋ Bɛnjamin tɛɛ kaɗi mgbara zuduk ko o be Israɛl ge?

¹⁸Ɛɛ nyɛm mɛ ha̧ o boko-bem k’ɛɛ ha̧ wa nɛ kóò na, wen o be Israɛl kana so mɔ‘e: ‹Fom a̧ bá wi nɛ tɛ ha̧ kóò ha̧ bezaŋ Bɛnjamin!› »

¹⁹Wa tɔ̧a̧ woyo: «Gbaŋa ko GASA WAN a̧a̧ sɛnɛ sɛn Silo tɛ pɛ lɛŋ.» Silo duk nɛ̀ war ká̧-zan-mɛ́-ŋgɔn ha̧ Bɛtɛl ká̧ yuwar nɛ daŋ nɛ Bɛtɛl nɛ war daŋa-wese sɛn Sikɛm, ká̧ Lebona nɛ war ká̧-zan-mɛ́-ɗɔɔ.

²⁰O gasawi nɔ‘i ha̧a̧ nú ha̧ o be ŋgai Bɛnjamin hee mɔ'ɔ ga: «Ɛ̀nɛ̀ hú̧sí sɛn kpɛɛfɔ-nyak-dɔ̧ɔ̧.

²¹K’ɛ̀nɛ̀ nɛ́ zɔka o be-zɔŋa Silo fara daŋa-a mɛ yɔ yɔyɛ in o ŋmaa, ɛ̀nɛ̀ gbó nɛ kpɛɛfɔ-nyak-dɔ̧ɔ̧ tik zu wa, o ndé kpɔk kpɔk, ɓɛɛ ɛnɛ sii nù ko Bɛnjamin.

²²Kà o dáà kɔ-wa, kóò o bu̧i̧-nya-wa nɛ tɛɛ mɛ kii nú‘nɛ́, ɛɛ tɛ kifi nú ha̧ wa, ɓɛɛ ɛɛ tɔ̧a̧: ‹Ɛ̀nɛ̀ dé demɔ in wa, wen wa kpa kóò tɛ ŋgimbi biro’ɛ na. Ɛ́nɛ́ mbɛt bó nɛ́ ɛ́nɛ́ tɛ̀ɛ́ ha̧ so kóò ha̧ wa na; k’ɛ̀nɛ̀ ha̧ so koo ha̧ wa, wen-aa tɛ tik nɛ zu'nɛ́.› »

²³O bezaŋ Bɛnjamin dee hee mɔ'ɔ nɛ wa tɔ̧ɔ̧ ha̧ wa ga, ɓɛɛ wa kai zɔŋa nɛ gboo mɛ yɔ yɔyɛ nɛ ŋgai, nyɛm nɛ wa; ɓɛɛ wa si ɗoŋ si tɛ nù kɔ-wa; wa ɗafa o ye kɔ-wa woyo, ɓɛɛ wa ɔ sɛnɛ.

²⁴Ŋgimbi'i, o be Israɛl kɛ̧ɛ̧ tɛ nɛ ŋmaa, kóó o nde sitɛ zuduk kɔ‘i in tɛ nú-gara kɔ‘i, ɓɛɛ wa si tɛ nù kɔ-wa.

²⁵Ŋgimbi'i mbɛt, ŋma wannu bo so sɛn Israɛl na, ɓɛɛ o ndé de so nɛ mɔ nɛ see kɔ̧a̧.