Read Northwest Gbaya O WI-GƆN-KITA 6 Bible Online

O WI-GƆN-KITA 6 - Northwest Gbaya bible

O WI-GƆN-KITA 6

¹O be Israɛl dee mɔ ɗaŋ yí GASA WAN woyo, ɓɛɛ GASA WAN a wa kɔ̧ er o be Madiaŋ tɛ pɛ mɔɔrɔ-ɗoŋ-yiitoo.

²O be Madiaŋ usa bɔnɛ ha̧ o be Israɛl nɛ ŋgaya-a. Nɛ́ wen zu o be Madiaŋ a̧ o be Israɛl ɗafa nɛ o gbina ŋgere, o di̧i̧ in o kusa fara mgbara o kaya mɛ hu̧si sɛnɛ.

³Ŋgimbi lɛŋ nɛ o be Israɛl gun nyɔnɔ kɔ‘i, ɓɛɛ o be Madiaŋ in o be Amalɛk gú nɛ̀ o bíí mɛ daŋa-wese daŋa mɛ tɛ̀ɛ́ bi wa.

⁴Kà wa tɛ́, ɓɛɛ wa baa gbagari katɛ o be Israɛl ɗaŋ nɛ nyɔnɔ kɔ-wa nɛnɛ hegɔ hɔ ká̧ Gaza; wa e ŋma nyɔnɔ, kóó o sami, kóó o ndai, kóó o tuifuu sɛn Israɛl na.

⁵Wa daŋ so in o gii mɔ-dai kɔ-wa, ká bá nɛ̀ tua-laa kɔ-wa tɛnɛ nɛ̀ gíí hee o gba-dɔya ga; wa dɔka so in o ŋgeloba kɔ-wa nyɛmna, ɓɛɛ wa yee tɛ nù ko o be Israɛl wen ɗaŋa a̧.

⁶Hegɔ o be Israɛl ziɓa, wen zu o be Madiaŋ, ɓɛɛ o be Israɛl ai nú sitɛ GASA WAN.

⁷Hee mɔ'ɔ nɛ o be Israɛl ai nɛ nú sitɛ GASA WAN wen zu o be Madiaŋ ga,

⁸GASA WAN toma ŋma wi-tɔ̧-wen oi nú Sɔ̧ ha̧ o be Israɛl; ɓɛɛ wi’ɛi tɔ̧ ha̧ wa: «Wen nɛ GASA WAN Sɔ̧ ko Israɛl tɔ̧ nɛ mɔ'ɔ: ‹Nɛ́ mi a̧ kaia'nɛ́ daŋnɛ nɛ Egiptɛ, gbo nɛ ɛnɛ kɔ̧ tua-bara.

⁹Mi gboo'nɛ́ er o be Egiptɛ in er o bíí lɛŋ nɛ de so bɔnɛ in'nɛ̀ɛ́; mi ndaka wa yinɛ ti'nɛ́, ɓɛɛ mi ha̧ nù kɔ-wa h’ɛ́nɛ́.

¹⁰Mi tɔ̧ɔ̧ h’ɛ́nɛ́‘e, mi nɛ GASA WAN Sɔ̧ k’ɛ́nɛ́, k’ɛ́nɛ́ yu kíí o sɔ̧ ko o be Amɔr n’ɛnɛ ɔ tɛ kɔ-wa'i na. Ɓɛɛ ɛ̀nɛ̀ zíí wen nú‘m na.› »

¹¹Betom ko GASA WAN hɔa, tɛ́ɛ̀ duk nù ti gasa te ko Ofra nɛ duka so nɛ ko Yoas be nú-gara ko Abiezɛr. Ŋgimbi'i, Gedeɔŋ bem ko Yoas gusi so nɛ alkamaari sɛn kɔ̧ tua-vati-dɔ̧ɔ̧ wen ká o be Madiaŋ tɛɛ zɔk a̧.

¹²Betom ko GASA WAN usa tɛ ha̧ a̧ ɓɛɛ tɔ̧: «GASA WAN a̧a̧ in mɛɛ, ŋgaŋa wi-biro!»

¹³Gedeɔŋ tɔ̧ɔ̧ ha̧ a̧: «Mi ai nú h’ɛ́nɛ́, nyaa, kà GASA WAN dúk so in yɛɛ, wen ge sa o mɔɔ nɔ'ɔ lɛŋ hɔɔ zu yɛ ge? O demɔ lɛŋ nɛ̀ o dáà k’ɛɛ wee so ɗoŋ-aa h’ɛ́ɛ́ tɔ̧ nɛnɛ‘e, bo nɛ́ nɛ̀ mbetɛ GASA WAN foo so ɛɛ gbonɛ nɛ̀ nú Egiptɛ na ndé'ɛ, a̧a̧ dee nde? Kinii GASA WAN ee yɛ duk kaɗi. A̧ ee yɛ kɔ̧ er o be Madiaŋ.»

¹⁴GASA WAN zika tɛ sitɛ a̧, ɓɛɛ tɔ̧ ha̧ a̧: «Mɛ̀ nɛ́ nɛ̀ ŋgai nɛ̀ mɛ a̧a̧ nɛnɛ‘i, ɓɛɛ mɛ̀ gbó o be Israɛl er o be Madiaŋ. Nɛ̀ mbetɛ nɛ́ mí a̧‘m tom mɛ.»

¹⁵Ɓɛɛ Gedeɔŋ kifi nú ha̧ a̧: «Nyaa, mi tɛ kpasi Israɛl hee ge? Sɛn nú Manase, nɛ́ nú-gara k’ɛɛ a̧ ziɓa gan o dɔka-a, ɓɛɛ geɗek obem sɛn nutua ko dáà kɔ‘m nɛ‘m.»

¹⁶GASA WAN kifa nú ha̧ a̧: «Mi tɛ yor ɗoŋ-mɛ, ɓɛɛ mɛ tɛ bi o be Madiaŋ lɛŋ a zu ŋmaa.»

¹⁷Gedeɔŋ tɔ̧ɔ̧ ha̧ a̧: «K’ɛ̀nɛ̀ nɛ́ kpaa desee zu'm, ɛ̀nɛ̀ dé ŋma mɔɔ-usi-mɔ ha̧‘m mɛ iŋ‘e, nɛ́ ɛnɛ'ɛ tɔ̧ wen in am.

¹⁸Mi ai nú h’ɛ́nɛ́, ká ɗoŋ‘nɛ́ nyɛi̧ nɛ fara’ɛ na, hɔ ŋgimbi n'am tɛ pii nɛ ɗoŋ pii tɛ‘nɛ́, ba nɛ ha̧a̧mɔ kɔ‘m tɛnɛ h’ɛ́nɛ́.» Ɓɛɛ GASA WAN tɔ̧: «Mɛ̀ nɛ́, mi tɛ duk kànà hɔ ŋgimbi nɛ mɛ tɛ pii ɗoŋ.»

¹⁹Gedeɔŋ nɛa, gbɛ be gbadua, ɓɛɛ ɗu fuu[5] dɔ nɛ brɛt nɛ hao bo sɛnɛ na; a̧ aa kpoo-aa sɛn kɔ̧ gɛsɛ, gbai yí-a a kɔ̧ yee, ɓɛɛ tui mɔɔ nɔ‘i lɛŋ piinɛ ɗoŋ a ti ɗɔɔ gasa te'i, ɓɛɛ wɛk ha̧ GASA WAN.

²⁰Betom ko Sɔ̧ tɔ̧ɔ̧ ha̧ a̧: «Mɛ̀ bá kpoo in brɛt nɛ hao bo sɛnɛ na e zu ta’ɛ, ɓɛɛ mɛ̀ gbáí yí-a a zu-a.» Gedeɔŋ dee hee mɔ‘i ga.

²¹Betom ko GASA WAN nyɛi̧a nú dɔra nɛ duka er'i fo nɛ kpoo in brɛt nɛ hao bo sɛnɛ na. Wee kura zu ta, ɓɛɛ dɔ kpoo in brɛt nɛ hao bo sɛnɛ na'i lɛŋ, ɓɛɛ betom ko GASA WAN yɔ ɓɛlɛm yí-a.

²²Ɓɛɛ nɛ́ hi̧i̧ a̧ Gedeɔŋ iŋa nɛnɛ‘e, nɛ́ betom ko GASA WAN, ɓɛɛ a̧ tɔ̧ nɛ kíì‘e: «Ho! GASA WAN Sɔ̧, mi zɔka betom k’ɛ́nɛ́ nɛ̀ yí‘m!»

²³GASA WAN tɔ̧ɔ̧ ha̧ a̧: «Ga̧a̧mɔ a̧ dúk in mɛɛ; ká mɛ de kíì na, mɛ beka fe na.»

²⁴Gedeɔŋ mboo fara-ɗafi-sɔ̧ sɛn fara'i ha̧ GASA WAN. A̧ aa nin fara'i'e: «GASA WAN nɛ́ ga̧a̧mɔ.» Hɔ sɔsɔɔ, fara-ɗafi-sɔ̧‘i a̧a̧ Ofra nɛ̀ duk nɛ́ ko o bíí nú-gara ko Abiezɛr.

²⁵Mɛ zɛ‘i, GASA WAN tɔ̧ɔ̧ ha̧ Gedeɔŋ: «Mɛ̀ bá de daŋa be ndai ko dáà kɔ-mɛ in ŋma ɓii-aa nɛ a̧a̧ nɛ pɛ mɔɔrɔ-ɗoŋ-yiitoo. Mɛ tɛ gbin fara-ɗafi-sɔ̧ Bal ko dáà kɔ-mɛ, ɓɛɛ mɛ tɛ gɔm te nɛ‘i gasi ká̧ a̧‘i pi̧ nù.

²⁶Mɛ tɛ mbo de fara-ɗafi-sɔ̧ ha̧ GASA WAN Sɔ̧ kɔ-mɛ zu kusa-fara‘i; mɛ tɛ ba ɓii ndai'i, ɓɛɛ mɛ dɔɔ nɛ kpoo-sɔ̧ zu gua te nɛ‘i gasi gasi nɛ mɛ tɛ gɔm pi̧ nù‘i.»

²⁷Gedeɔŋ kaia o bíí ɓu mgbara o wi-de-tom kɔ̧-a̧, ɓɛɛ a̧ de mɔ hee mɔ'ɔ nɛ GASA WAN tɔ̧ɔ̧ ha̧ a̧ ga. Ɓɛɛ hee mɔ'ɔ n'aa yuu so nɛ o bíí nutua ko dáà kɔ̧-a̧ in o wi saaye ga, a̧ ee dea-a nɛ wese duk, ɓɛɛ a̧ de dea-a mɛ zɛ.

²⁸O bíí kura mɛ tutuyɛ, ɓɛɛ wa zɔk'e fara-ɗafi-sɔ̧ Bal gbina; te nɛ‘i gasi gasi nɛ yora so ká̧ fara-ɗafi Bal'i mbɛt gbina, ɓɛɛ ká‘i dɔ̀ɔ̀ so kpoo-sɔ̧ nɛ be ndai zu mbe fara-ɗafi-sɔ̧.

²⁹Wa aka ŋmaa: «Nɛ́ o'o dee mɔ'ɔ o?» Wa aka mɔ kii nɛ mgbara-a, ɓɛɛ wa tɔ̧‘e nɛ́ Gedeɔŋ bem ko Yoas a̧ dee tom'i.

³⁰O wi saaye tɔ̧ɔ̧ ha̧ Yoas: «Mɛ̀ fó bem kɔ-mɛ gbonɛ ha̧ a̧ fe, wen n'aa gbina fara-ɗafi Bal, ɓɛɛ ka a̧ gɔm te nɛ‘i gasi gasi nɛ duk ká̧ a̧‘i mbɛt.»

³¹Yoas kifa nú ha̧ o bíí lɛŋ nɛ ya katɛ a̧: «Nɛ́ ɛnɛ a̧ tɛ ye ɗoŋ Bal nde? Nɛ́ ɛnɛ a̧ tɛ tɛɛ gbak a̧ nde? Wi tɛ gbɛ wi nɛ ye ɗoŋ Bal nɛti sɛka mɔ sa̧a̧! Kà Bal nɛ́ bòò nɛ́ Sɔ̧, a̧ a̧ dé biro kɔ̧-a̧ nɛ tɛ-a wen nɛ̀ Gedeɔŋ ɗaŋa fara-ɗaf'aa.»

³²Nɛ́ wese'i a̧ wa gɔna nɛ nin Gedeɔŋ‘e ndé: «Yerub-Bal», nɛ́ wen nɛ tɔ̧, «Bal a̧ de biro zu a», wen wa ɗaŋa fara-ɗaf'aa.

³³O be Madiaŋ, o be Amalɛk in o be nù si war daŋa-wese lɛŋ mɔi̧a ŋmaa e nú kpɔk. Wa kuu Jurdɛn, ɓɛɛ wa ba gbagari sɛn kɔ̧ ɗɔŋgɔ Yizreɛl.

³⁴Ɔmi ko GASA WAN ha̧a̧ ŋgai ha̧ Gedeɔŋ; a̧ dɔma zak, sa nɛ o be nú-gara ko Abiezɛr mɛ nɛ ɗoŋ-aa.

³⁵A̧ toma o betom dam nú Manase lɛŋ, ɓɛɛ o be Manase nɛ ɗoŋ-aa mbɛt. A̧ toma o betom mbɛt sitɛ o duk ko o be Asɛr, o be Zabulɔŋ in o be Nɛftalii, ɓɛɛ wa we ti wa daŋnɛ.

³⁶Nɛ mɔ'ɔ nɛ Gedeɔŋ tɔ̧ɔ̧ ha̧ Sɔ̧: «K’ɛ̀nɛ̀ nɛ́ kɔ̧ɔ̧ mɛ kpasi Israɛl nɛ er-am hee mɔ'ɔ n’ɛnɛ tɔ̧a̧ ga,

³⁷mi tɛ tati zɔ̧-laa nɛ‘i dee nɛ buma sami zu fara-gusi-alkamaari. Kà dɔmbɔrɔ nɛ́ waia tɛ zɔ̧-laa'i e nù nɛ̀ oi kora-a, mi tɛ iŋ ndé, ɛnɛ tɛ kpasi Israɛl nɛ er-am hee mɔ'ɔ n’ɛnɛ tɔ̧ɔ̧ ga.»

³⁸Mɔ dee hegɔ. Nɛ̀ Gedeɔŋ kura mɛ tutuyɛ, a̧ ɓara zɔ̧-laa, ɓɛɛ yí dɔmbɔrɔ dun be yee.

³⁹Gedeɔŋ tɔ̧ɔ̧ ha̧ Sɔ̧: «K’ɛ́nɛ́ kpa ɗaŋsee zu'm tɛ wen n'am tɛ tɔ̧ war kpɔk woyo’ɛ na. Ɛ̀nɛ̀ há̧ war ha̧‘m mɛ de mbe weamɔ woyo nɛ zɔ̧-laa: zɔ̧-laa a̧ dúk kɔ‘i nɛ̀ kora-a, ɓɛɛ dɔmbɔrɔ a̧ ɓɔ nù lɛŋ!»

⁴⁰Sɔ̧ dee hegɔ mɛ zɛ‘i: nɛ́ zɔ̧-laa a̧ ɓɔna nɛ̀ kora-a, ɓɛɛ dɔmbɔrɔ ɓɔ nù lɛŋ.