Read Northwest Gbaya O WI-GƆN-KITA 7 Bible Online

O WI-GƆN-KITA 7 - Northwest Gbaya bible

O WI-GƆN-KITA 7

¹Gedeɔŋ nɛ‘i sa'e Yerub-Bal kura mɛ tutuyɛ sut in o bíí nɛ ya in a̧ lɛŋ, ɓɛɛ wa ba gbagari ká̧ zu-zer Harod, ɓɛɛ ká gbagari ko o be Madiaŋ duk kɔ‘i si war ká̧-zan-mɛ́-ŋgɔn ká̧ kaya Mɔre nɛ kɔ̧ ɗɔŋgɔ.

²GASA WAN tɔ̧ɔ̧ ha̧ Gedeɔŋ: «O bíí nɛ a̧a̧ in mɛɛ ɔ dɔka nyɛmna; mi nyɛm mɛ e o be Madiaŋ kɔ̧ er-wa na. O be Israɛl tɛ ŋmaŋ tɛ nɛ ɗoŋ-am tɔ̧ nɛnɛ‘e, nɛ́ er-wi a̧ kpasa wi.

³Hegɔ, mɛ̀ tɔ̧́ ha̧ o bíí‘e, wi nɛ kíì de a̧, nɛ̀ tɛ nak nak a̧ sí ɗoŋ tɛ kɔ‘i.» Ɓɛɛ Gedeɔŋ we wa. O bíí booro-ɓu-yiitoo-zua-yiitoo sii ɗoŋ, ɓɛɛ oi bíí ɓɔn booro-ɓu.

⁴GASA WAN tɔ̧ɔ̧ ha̧ Gedeɔŋ: «Wi nɔ'ɔ ɔ kànà dɔka. Mɛ̀ káí wa nɛnɛ si nú yì; mi tɛ we wa ha̧ mɛ sɛn hi̧i̧. Hegɔ bíí n'am tɛ tɔ̧‘e a̧ a̧ nɛ́ in mɛɛ, ɓɛɛ wi’ɛi nɛɛ in mɛɛ; wan n'am tɛ tɔ̧‘e ká a̧ nɛ in mɛɛ na, ɓɛɛ wi’ɛi beka nɛ na.»

⁵Gedeɔŋ kaia o bíí si nú yì, ɓɛɛ GASA WAN tɔ̧ ha̧ a̧: «Bíí lɛŋ nɛ tɛ ndal yì hee mɔ'ɔ nɛ toyo ndal nɛnɛ nɛ leɓe ga, mɛ̀ fó a̧ e nɛtɛ; mɛ̀ fó o wi nɛ tɛ gbɛ zugur nù nɔ nɛ yì e nɛtɛ mbɛt.»

⁶O wi nɛ gaia yì gai nɛ̀ er si kɔ̧ nú dee nɛ bíí gɔmŋmaa-taar. Oi dɔka bíí lɛŋ guu kɔ-wa nɛ́ nù nɔ́ nɛ̀ yi.

⁷GASA WAN tɔ̧ɔ̧ ha̧ Gedeɔŋ: «Nɛ́ o bíí gɔmŋmaa-taar nɛ̀ gaia kɔ-wa yì gai nɛ̀ er si kɔ̧ nú-wa'i a̧‘m tɛ kpasi nɛ̀ ɛ́nɛ́, e nɛ o be Madiaŋ kɔ̧ er'nɛ́. Oi dɔka bíí lɛŋ a̧ sí ɗoŋ tɛ kɔ‘i.»

⁸O bíí gɔmŋmaa-taar'i kaia nyɔŋmɔ in o zak-dɔm ko dukbíí, ɓɛɛ Gedeɔŋ fo o oi be Israɛl sinɛ kɔ̧ tua-laa kɔ-wa e nɛ́ o bii nɔ‘i gɔmŋmaa-taar'i. Gbagari ko o be Madiaŋ duka so nɛ̀ ɗɔɔ ko Gedeɔŋ sɛn kɔ̧ ɗɔŋgɔ.

⁹Mɛ zɛ‘i, GASA WAN tɔ̧ɔ̧ ha̧ Gedeɔŋ: «Mɛ̀ kúr, mɛ̀ zír si kɔ̧ gbagari ko o be Madiaŋ, mi aa wa kɔ̧ er-mɛ kaɗi.

¹⁰Kà kíì zira-a nɛ́ dee mɛ, mɛ̀ zír si kɔ̧ gbagari kɔ-wa in wi-de-tom kɔ-mɛ Pura.

¹¹Mɛ tɛ zii mɔ nɛ wa tɛ tɔ̧, gba̧a̧ tɛ-mɛ tɛ ŋgai, ɓɛɛ mɛ tɛ kur zu wa nɛ ŋgaya-a.» A̧ zira nɛnɛ in wi-de-tom kɔ̧-a̧ Pura hɔ fara nɛ o kuti wi-pɛm-mɔ ya sɛnɛ.

¹²O be Madiaŋ, o be Amalɛk gú nɛ̀ o bíí mɛ daŋa-wese gbisi nɛnɛ sɛn mbɔɗɔnu hee gíí gba-dɔya ga. O ŋgeloba kɔ-wa ɔ dɔka hee nyɛmɛ ká̧ zaŋ gba-tɔp ga; wi nyɛm so mɛ tɔr na.

¹³Ŋgimbi nɛ Gedeɔŋ hɔɔ ɗoŋ gbagari kɔ-wa, a̧ zia ŋma bíí fara wee ɗoŋ zu n'aa ɔa ha̧ sɛm kɔ̧-a̧ tɔ̧ nɛnɛ: «Ŋma gasa brɛt alkamaari zik nɛ̀ kɔ̧ gbagari ko o be Madiaŋ ɗaŋ nɛ tua-laa kpáŋgálá-kpáŋgálá yo nɛnɛ gbin.»

¹⁴Sɛm kɔ̧-a̧ kifa nú ha̧ a̧: «Mɔ‘i beka yak zu gba-paa ko Gedeɔŋ bem ko Yoas be Israɛl na. Sɔ̧ aa o be Madiaŋ in gbagari kɔ-wa lɛŋ kɔ̧ er-a.»

¹⁵Gedeɔŋ zia gba̧a̧ zu'i in wee ɗoŋ-aa, a̧ gbɛɛ zugur-aa nù de nɛ osoko ha̧ Sɔ̧, ɓɛɛ a̧ pii ɗoŋ pii kɔ̧ gbagari ko o be Israɛl. A̧ tɔ̧a̧: «Ɛ̀nɛ̀ kúr, wen GASA WAN ee gbagari ko o be Madiaŋ kɔ̧ er'nɛ́ kaɗi.»

¹⁶Gedeɔŋ kɛ̧ɛ̧ o wi-biro gɔmŋmaa-taar'i tɛ dùk-aa taar. A̧ ha̧a̧ zak in dak nɛ̀ wee-kan a̧a̧ kɔ̧ a̧ ha̧ wa.

¹⁷A̧ tɔ̧ɔ̧ ha̧ wa: «Ɛ́nɛ́ tɛ zɔk mɔ pii tɛ‘m, ɓɛɛ ɛ́nɛ́ tɛ de hee mɔ'ɔ n'am tɛ de ga. Ŋgimbi n'am tɛ hɔ ká̧ gbagari, nɛ́ mɔ n'am tɛ de ɛ̀nɛ̀ tɛ de mbɛt.

¹⁸Mi tɛ dɔm zak, mi in o wi nɛ ya katɛ‘m lɛŋ, ɓɛɛ ɛ̀nɛ̀ dɔ́m zak mbɛt zik nɛ gbagari lɛŋ gai nɛ mɔ‘e: ‹Wen GASA WAN in wen Gedeɔŋ!› »

¹⁹Gedeɔŋ in o wi-biro kɔ‘i gɔmŋmaa hɔɔ ká̧ gbagari ko o be Madiaŋ si ká̧ ɗuka zɛ; o wi-pɛm-mɔ kpaia so ŋmaa ɗoŋ-aa tɛ nyɛi̧ na. Wa dɔma zak, ɓɛɛ wa mbaŋ o dak nɛ̀ a̧a̧ so er-wa.

²⁰O duk-biro nɔ‘i taar'i aa nú tɛ dɔma zak gba nɛ o dak mbɛt; wa kasa wee nɛ̀ er-wa mɛ gale, er mɛ wiiko ɓɔn kɔ‘i tɛ kasa zak wen dɔma-a, ɓɛɛ wa a nú-wa tɛ gaia mɔ: «Gba-paa wen GASA WAN in wen Gedeɔŋ!»

²¹Ŋgimbi nɛ wa yor nɛ ŋgɔn ɗoŋ gbagari kóó o nde fara kɔ‘i, o bíí kɔ̧ gbagari aa naŋ tɛ maa yì hiɗi nɛ mɔ, yu nɛ mɔ yak.

²²Ŋgimbi nɛ o wi-biro ko Gedeɔŋ gɔmŋmaa-taar dɔm nɛ̀ zak'i, GASA WAN dee ha̧ o wisɛn kɔ-wa mɛ zik tɛ, gɔm nɛ ŋmaa nɛ gba-paa. Wa lɛŋ yuu mɔ yak hɔ sɛn Bɛt-Sita si war Sɛrɛra hɔ nɛnɛ ká̧ zaŋ Abɛl-Mɛhola sɛn ká̧ Tabat.

²³O be Israɛl mɔi̧a ŋmaa lɛŋ a zu o be Nɛftalii, Asɛr in Manase; wa lɛŋ mboɗa ŋmaa duk ɗoŋ o be Madiaŋ.

²⁴Gedeɔŋ pi̧i̧ tom[6] ha̧ o bíí mɛ mgbara kaya Efraim lɛŋ hee mɔ'ɔ ga: «Ɛ̀nɛ̀ zír ɓɛɛ ɛ̀nɛ̀ gɔ́n ti o be Madiaŋ; ɛ̀nɛ̀ kpé fara lɛŋ nɛ yì a̧a̧ sɛnɛ nɛti ha̧ o be Madiaŋ, hɔ sɛn Bɛt-Bara in nú Jurdɛn.»

²⁵Wa baa o wan Madiaŋ yiitoo: mɛ̀ nɛ́ Orɛb in Zɛb. Wa gbɛɛ Orɛb zu ta ko Orɛb, ɓɛɛ wa gbɛ Zɛb fara-vati-dɔ̧ɔ̧ ko Zɛb. Wa ndaka pata o be Madiaŋ yaknɛ, ɓɛɛ wa kai gɔɔ-zu Orɛb in Zɛb nɛnɛ ha̧ Gedeɔŋ nɛ kur Jurdɛn ɓi.