Read Northwest Gbaya O WI-GƆN-KITA 8 Bible Online

O WI-GƆN-KITA 8 - Northwest Gbaya bible

O WI-GƆN-KITA 8

¹O be Efraim tɔ̧ɔ̧ ha̧ Gedeɔŋ: «Nɛ́ ge yuwar deemɔ ge a̧ mɛ dee in yɛɛ sa nɛ ɛɛ ŋgimbi nɛ mɛ nɛɛ nɛnɛ mɛ bi o be Madiaŋ na’ɛ ge?» See-wa ɗaŋa zu mɔ‘i nyɛmna.

²Gedeɔŋ kifa nú ha̧ wa: «Mɔ n'am dea nyɛm ŋmaa in k’ɛ́nɛ́ n’ɛnɛ dea'i na. Be waya-nyak-dɔ̧ɔ̧ nɛ ɛnɛ o be Efraim ɓia gana zɔm dɔka-a nɛ zuduk kɔ‘m mɔi̧a.

³Bo nɛ Sɔ̧ foo o wanye Madiaŋ, Orɛb in Zɛb, a kɔ̧ er'nɛ́ na nde? Nɛ ge a̧‘m dee nyɛm ŋmaa in k’ɛ́nɛ́ ge?» Ŋgimbi n'aa tɔ̧ɔ̧ wen'i, see-wa nɛ ɗaŋa so in a̧ ga̧a̧.

⁴Gedeɔŋ hɔɔ nú Jurdɛn, ɓɛɛ a̧ ku yì in o wi-biro gɔmŋmaa-taar nɛ yaa so in a̧. Wa nɛɛ kànà siti nɛ oi wɔ in mbɔia-a.

⁵A̧ tɔ̧ɔ̧ ha̧ o wi Sukot: «Mi ai nú h’ɛ́nɛ́, ɛ̀nɛ̀ há̧ ŋma makala ha̧ o wi-biro kɔ‘m nɛ tɛ ɗoŋ-am'i wen wa mbɔia kaɗi; mi ndak nɛ Zɛba in Salmuna, o wannu Madiaŋ.»

⁶O wanye Sukot kifa nú: «Mɛ iŋa'e mɛ kpaa ŋgai zu Zɛba in Salmuna kaɗi, k’ɛ̀ɛ̀ há̧ nɛ̀ nyɔŋmɔ ha̧ o wi-biro kɔ-mɛ nde?»

⁷Gedeɔŋ kifa nú ha̧ wa: «Nɛ́ bòò hegɔ, GASA WAN be tɛ̀ɛ́ a Zɛba in Salmuna er-am kaɗi, mi tɛ gusi'nɛ́ nɛ tɛn-ga̧a̧ in naakɔɓa.»

⁸A̧ duka hi̧i̧ daŋ nɛnɛ si Pɛnuɛl, ɓɛɛ a̧ tɔ̧ kpɔk wen'i ha̧ o bíí fara'i. Wa kifa nú ha̧ a̧ hee mɔ'ɔ nɛ o wi Sukot kifa so ha̧ a̧ ga.

⁹A̧ tɔ̧ɔ̧ ha̧ o be Pɛnuɛl mbɛt'e, kà ŋma mɔ kpa wi na pii nɛnɛ, wi tɛ gbin ŋgárá kɔ-wa’ɛ a nù.

¹⁰Zɛba in Salmuna a̧a̧ so sɛn Kakɔr in o wi-biro kɔ-wa hee booro-ɓu-zua-mɔɔrɔ ga. O wi nɔ‘i nɛ́ oi o wi-biro nɛ ɓɔna so mgbara o be daŋa-wese; o wi-iŋ-bíí biro nɛ̀ gba-paa booro-gɔmŋmaa-nɛ-booro-ɓu-yiitoo kuma so kɔ‘i kaɗi.

¹¹Gedeɔŋ daŋa kɔ‘i nɛ yuwar ko o wi-yar-ŋgɔn nɛ daŋa-wese ha̧ Nɔba in Yɔgbɔha, ɓɛɛ a̧ bi o wi-biro nɛ zii so kɔ‘i'e wi ya nɛ de-a hi̧i̧.

¹²Zɛba in Salmuna yuu mɔ yak; Gedeɔŋ ndaka ɗoŋ wa nɛɛ ba wa, ɓɛɛ a̧ yai o wi-biro kɔ-wa lɛŋ.

¹³Nɛ mɔ'ɔ nɛ Gedeɔŋ bem ko Yoas pia ɗoŋ nɛ fara-biro nɛ war tiger kaya Hɛrɛs.

¹⁴A̧ baa ŋma be-ŋgaiwi Sukot nɛ̀ ŋgai; a̧ nasa a̧ ɓɛɛ bem’ɛi yɔr nin o wanye Sukot in o gasawi ɓu-mɔɔrɔ-ɗoŋ-yiitoo-zua-mɔɔrɔ-ɗoŋ-yiitoo zaŋ kalata ha̧ a̧.

¹⁵Gedeɔŋ nɛɛ kpa o wi Sukot, ɓɛɛ a̧ tɔ̧ ha̧ wa: «Zɛba in Salmuna n’ɛnɛ baa tɔ̧ so nɛnɛ ha̧‘m'e, mi kaia wa kaɗi sa'i tɛ ha̧ nɛ̀ nyɔŋmɔ kɔ‘i ha̧ o wi-biro kɔ‘m nɛ mbɔia ndé wó‘i, bo a̧a̧ na?»

¹⁶A̧ kaia o gasawi saaye Sukot, ɓɛɛ a̧ gusi wa nɛ tɛn-ga̧a̧ in naakɔɓa.

¹⁷A̧ gbina ŋgárá Pɛnuɛl a nù, ɓɛɛ a̧ kum o bíí saaye lɛŋ.

¹⁸Nɛ mɔ'ɔ nɛ Gedeɔŋ aka Zɛba in Salmuna: «O wi n’ɛnɛ gbɛɛ so sɛn Tabɔr’ɛ duka so hee ge?» Wa kifa nú ha̧ Gedeɔŋ: «Wa hɔɔ ŋmaa in'nɛ̀ɛ́. Wa lɛŋ yaa so hee o bem ko wannu ga.»

¹⁹Gedeɔŋ tɔ̧ɔ̧ ha̧ wa: «O wi nɔ‘i yaa so nɛ nya'm, kpɔk kɔ̧ zaŋ. Nɛ̀ nin GASA WAN, k’ɛ̀nɛ̀ é so wa kpasa, bo nɛ mi tɛ̀ɛ́ gbɛ‘nɛ́ na.»

²⁰Ɓɛɛ a̧ tɔ̧ ha̧ Yɛtɛr kaya-bem kɔ̧-a̧: «Mɛ̀ kúr a̧ mɛ̀ gbɛ́ wa.» Bem’ɛi dak gba-paa kɔ‘i na, a̧ ɓɔna so nɛ́ be-ŋgaiwi, ɓɛɛ kíì de a̧ dee.

²¹Zɛba in Salmuna tɔ̧a̧: «Mɛ̀ kúr nɛ̀ tɛ-mɛ a̧ mɛ gbɛ yɛ, wen wiwii nɛ́ mɔ‘i; ŋgai nɛ́ mɔ‘i.» Gedeɔŋ kura, ɓɛɛ gbɛ Zɛba in Salmuna, ɓɛɛ a̧ kai o kànà nɛ yaa so ger o ŋgeloba kɔ-wa.

²²O be Israɛl tɔ̧ɔ̧ ha̧ Gedeɔŋ: «Mɛ̀ ɔ́ wan zu yɛ, mɛ, bem kɔ-mɛ in bezaŋ-mɛ mbɛt, wen nɛ̀ mɛ́ kpasa yɛ er o be Madiaŋ.»

²³Gedeɔŋ kifa nú ha̧ wa: «Bo nɛ mi a̧ tɛ ɔ wan zu'nɛ́ na, bo nɛ bem kɔ‘m na mbɛt; nɛ́ GASA WAN a̧ tɛ ɔ wan zu'nɛ́.»

²⁴Gedeɔŋ tɔ̧ɔ̧ woyo: «Mi kɔ̧ɔ̧ mɛ ak ŋma mɔ er'nɛ́. Ɛ̀nɛ̀ ndɛ́m wele-oi-biro k’ɛ́nɛ́ kpɔk kpɔk ha̧‘m.» O wi nɛ wa bìì so'i nɛ o bezaŋ Ismaɛl nɛ a̧a̧ so nɛ o wele-lɔr.

²⁵Wa kifa nú ha̧ a̧: «Ii, ɛɛ tɛ ha̧ h’ɛ́nɛ́.» Wa tata ŋma gba laa mbɔɗɔnu, ɓɛɛ o ndé pi̧ ŋma wele mɔɔ-oi-biro kɔ‘i gɔn a̧.

²⁶Kilo wele-lɔr nɛ Gedeɔŋ kpaa so dee hee kilo ɓu-yiitoo ga, wi tɔr o kànà, o mɔɔ-zer in o gbɛ̧ laa nɛ o wannu Madiaŋ a so tɛ, in o kísí nɛ yaa so ger o ŋgeloba kɔ-wa na.

²⁷Gedeɔŋ duia ŋma sɔ̧ nɛ o mɔɔ nɔ‘i e ye kɔ‘i Ofra. Israɛl lɛŋ tɛ̀ɛ́ gbɛ zugur nù tí géé-sɔ̧‘i e kpasa Sɔ̧ dúk, ɓɛɛ mɔ‘i kífí dúk nɛ́ pɛ́r wen Gedeɔŋ in o bíí nutua kɔ̧-a̧.

²⁸Hegɔ o be Madiaŋ duka si ɗɔɔ, ɓɛɛ wa ba zu-wa nɛ ŋgɔn ti o be Israɛl na. Nù duka zaŋ ga̧a̧mɔ tɛ pɛ ɓu-naar nɛ̀ Gedeɔŋ ɓɔna nɛnɛ kpasa.

²⁹Yerubal bem ko Yoas sii ɗoŋ duk kɔ̧ tua kɔ‘i.

³⁰Gedeɔŋ koo bem ɓu-mɔɔrɔ-ɗoŋ-yiitoo, mgbák tɔk tɛ-a, wen a̧ a̧a̧ so nɛ̀ kóò nɛ dɔka-a.

³¹Ŋma kóò kɔ̧-a̧ nɛ duka so Sikɛm koo ŋma be wiwii ha̧ a̧ mbɛt, ɓɛɛ a̧ a nin-a'e Abimɛlɛk.

³²Gedeɔŋ bem ko Yoas fea ɗoŋ de sɔ́kì, ɓɛɛ wa gun a̧ kɔ̧ pɛsi ko Yoas dáà kɔ̧-a̧ saaye Ofra ko o bíí nú-gara ko Abiezɛr.

³³Ɗoŋ fio ko Gedeɔŋ, o be Israɛl sii ɗoŋ tɛ gasa o géé-sɔ̧ Bal woyo. Wa baa Bal-Berit hee sɔ̧ kɔ-wa ga.

³⁴Tɛ̀ o be Israɛl bìí ɗoŋ GASA WAN Sɔ̧ kɔ-wa nɛ gboo so wa er o wisɛn kɔ-wa lɛŋ nɛ yaa so zik wa.

³⁵Wa de ŋma géé be demɔ in o bíí nutua ko Yerubal-Gedeɔŋ oi o demɔ n'aa dee so in o be Israɛl na.