Read Northwest Gbaya 2 JEAN 1 Bible Online

2 JEAN 1 - Northwest Gbaya bible

2 JEAN 1

¹Nɛ́ mí, Kuti-wi, a̧ tom kalata’ɛ ha̧ Okoo nɛ̀ Sɔ̧ hoka, in o bem kɔ̧-a̧ n'am kɔ̧ɔ̧ nyɛmna wen zu kpasawen. Bó nɛ́ mi ɛ̀n'am a̧ kɔ̧ɔ̧‘nɛ́ ɓɛɛ na, ɓɛɛ o bíí lɛŋ nɛ̀ iŋa kpasawen mbɛt.

²Ɛ́ɛ́ kɔ̧ɔ̧‘nɛ́ wen zu kpasawen nɛ̀ a̧a̧ tɛ̀ yɛ, nɛ̀ tɛ́ duk in yɛ̀ɛ́ kpoo nɛ kpoo.

³Sɔ̧ Dáà in Bem kɔ‘i Jesu Krist a̧ há̧ mɔ nɛ̀ ta-tɛ in ga̧a̧mɔ h’ɛ́ɛ́, ɓɛɛ a̧ a̧ dé kó h’ɛ́ɛ́ mbɛt sɛn tɛ́ kpasawen in kɔ̧ɔ̧mɔ.

⁴Mi kpaa gasa desee wen mi zɔka o ŋma bem kɔ-mɛ ndak nɛ́ ɗoŋ kpasawen nyɛm nɛ̀ ɗoŋ heembea n’ɛ̀ɛ́ kpaa tɛ̀ Dáà.

⁵Kinii, Kóò'ɛ, bó nɛ́ mbe heembea a̧‘m yɔr ha̧ mɛ na; ɓɛɛ mɛ̀ nɛ́ heembea n’ɛ̀ɛ́ kpaa só nɛ̀ ku̧u̧naŋ-a mɛ̀ tɛnɛ: ɛ̀ɛ̀ kɔ̧́ ŋmaa in o ŋmaa.

⁶Ɓɛɛ kɔ̧ɔ̧mɔ nɛ́ mɔ'ɔ: mɛ̀ nɛ́ wen h’ɛ́ɛ́ mɛ de mɔ nyɛm nɛ̀ ɗoŋ heembea ko Sɔ̧, ɓɛɛ heembea'i nɛ́ wan n’ɛ̀nɛ̀ zia nɛ̀ ku̧u̧naŋ-a mɛ̀ tɛnɛ, wen h’ɛ́nɛ́ mɛ́ ba nɛ́ yuwar'i.

⁷O wi-ɔr-wi pɛsa dam zaŋnu nɛ̀ dɔka-a, ɓɛɛ wa gbar kɔ̧ɔ̧ɗɔɔwen'e Jesu Krist tɛ̀ɛ́ tɛ́ mur-tɛ na. Wi-ɔr-wi a̧‘i, wi-we-zu nɛ̀ Krist nɛ́ mɔ‘i.

⁸Ɛ̀nɛ̀ zɔ́k tɛ‘nɛ́ wen ká mɔɔ-oi-tom k’ɛ́nɛ́[1] tɛ́ɛ̀ nyaŋ‘nɛ́, ɓɛɛ h’ɛ́nɛ́ mɛ́ kpa nɛ́ mɔɔ-oi-aa nɛ̀ dama-a.

⁹Kóó o ndé nɛ̀ yak zu usamɔ ko Krist, Sɔ̧ bó tɛ̀ wi’ɛi na, ɓɛɛ wi nɛ̀ duk ɓɔn tɛ̀ usamɔ‘i, wi’ɛi a̧a̧ nɛ̀ Dáà in Bem.

¹⁰Kà ŋma bíí tɛ́ tɛ‘nɛ́, n'aa bó nɛ̀ usamɔ'ɔ na, k’ɛ́nɛ́ zir a̧ tɛ̀ k’ɛ́nɛ́ na, k’ɛ́nɛ́ kpɛk a̧ na mbɛt.

¹¹Wi nɛ̀ kpɛka a̧, pi̧i̧ tɛ̀ tɛ̀ ɗaŋ tom kɔ̧-a̧‘i.

¹²Mi a̧a̧ nɛ̀ dɔka mɔ mɛ́ yɔr h’ɛ́nɛ́, ɓɛɛ mi kɔ̧́ mɛ́ yɔr zaŋ kalata nɛ̀ yí-mɔɔ-yɔr-mɔ na, wen mi kɔ̧ɔ̧ mɛ́ nɛ̀ɛ́ tɔ̧ wen in'nɛ̀ɛ́ nɛ̀ tɛ‘m, h’ɛ́ɛ́ mɛ kpa kpasa desee.

¹³O bem ko Boko-nya-mɛ nɛ̀ Sɔ̧ hoka'i fana mɛ́.