Read Northwest Gbaya 3 JEAN 1 Bible Online

3 JEAN 1 - Northwest Gbaya bible

3 JEAN 1

¹Nɛ́ mí, Kuti-wi, a̧ tom kalata’ɛ ha̧ de sɛm kɔ‘m Gaius n'am kɔ̧ɔ̧ nyɛmna wen zu kpasawen.

²De sɛm kɔ‘m, taamɔ kɔ‘m mɛ̀ nɛ́ wen ha̧ mɛ́ mɛ́ dùk nɛ̀ de-a in o mɔ kɔ-mɛ lɛŋ in ha̧ haya-tɛ mɛ dùk tɛ-mɛ mbɛt hee mɔ'ɔ nɛ̀ duk kɔ̧ see-mɛ ga.

³Mi kpaa desee nyɛmna ŋgimbi nɛ̀ o ŋma nya-ɛɛ tɛ̀ɛ́ we ɗoŋ duka-a kɔ-mɛ tɛ́ kpasawen h’ɛ́ɛ́, wen mɛ́ ndak nɛ ɗoŋ kpasawen.

⁴Ŋma mɔ nɛ̀ ha̧ desee ha̧‘m gan zia-a'e, o bem kɔ‘m ndak nɛ́ ɗoŋ kpasawen, bo na.

⁵De sɛm kɔ‘m, mɛ́ dé nɛ́ demɔ ɓɔnsɛnɛ, tɛ̀ zɔka o nya-mɛ nɛ̀ de-a, kóó wa nɛ́ o gɛnɛ mbɛt.

⁶O wi nɔ‘i wee ɗoŋ gbaka o bíí nɛ̀ mɛ́ gbak'i ha̧ zuduk bíí ko Krist, ɓɛɛ ɔ dee ha̧ mɛ́ mɛ́ kìì be mɔɔ-yuwar nɛ̀ nyɛma yí Sɔ̧ ha̧ wa, tɛ̀ naŋanɔ kɔ-wa'i,

⁷wen wa yee yuwar wen nin Krist, ɓɛɛ wa ba ŋma gbakamɔ er o gɔni-dùk na.

⁸Hegɔ ɛ̀ɛ̀ gbák o pɛrti wi nɔ‘i mɛ́ usi'e, ɛ́ɛ́ nɛ́ o gbama wi-de-tom-kpasawen in wa.

⁹Mi toma ŋma kalata ha̧ zuduk bíí ko Krist, ɓɛɛ Diotrɛf nɛ̀ kíí kɔ‘i mɛ́ duk nɛ́ gasawi kɔ̧ wen k’ɛ́ɛ́ na.

¹⁰Wen hegɔ, kà‘m nɛ́ nɛa mi tɛ tɔ̧ ndaa mɔ n'aa de h’ɛ́nɛ́. A̧ tɔ̧́ nɛ́ ɗaŋ wen, ɗaŋ nɛ̀ wen-tɛ yɛ dam fara lɛŋ. Zu i̧i̧, a̧ bɛ̧ɛ̧ kpɛka o nya-ɛɛ, dor nɛ̀ o wi nɛ̀ kɔ̧ɔ̧ mɛ́ kpɛk wa, ndak nɛ̀ wa mgbara zuduk bíí ko Krist yinɛ mbɛt.

¹¹De sɛm kɔ‘m, ká mɛ́ zɔk ɗoŋ ɗaŋmɔ na, ɓɛɛ mɛ̀ zɔ́k nɛ́ ɗoŋ demɔ. Wi nɛ̀ de demɔ, nɛ bíí ko Sɔ̧, ɓɛɛ wi nɛ̀ de ɗaŋmɔ tɛ́ zɔk Sɔ̧ na.

¹²Kó Demetrius, bíí lɛŋ tɔ̧́ nɛ́ de wen kɔ̧-a̧; kiitɛ kpasawen de nɛ de sedaako wen a̧. Ɛ́ɛ́ mbɛt de nɛ sedaako wen a̧, ɓɛɛ mɛ́ iŋa'e, sedaako k’ɛ́ɛ́ nɛ́ kpasawen.

¹³Mi a̧a̧ nɛ̀ dɔka mɔ mɛ́ yɔr ha̧ mɛ́, ɓɛɛ mi kɔ̧ mɛ́ yɔr nɛ̀ yí-mɔɔ-yɔr-mɔ na.

¹⁴Mi taa ɗoŋ-aa beka nyɛi̧ na, mi tɛ zɔk mɛ, ɓɛɛ ɛ́ɛ́ tɔ̧ɔ̧ nyɛrɛ in ŋmaa.

¹⁵Ga̧a̧mɔ a̧ dúk in mɛ̀ɛ́! O sɛm kɔ-mɛ fana mɛ́. Mɛ̀ fán o sɛm k’ɛ́ɛ́ kpɔk kpɔk, dam wa lɛŋ h’ɛ́ɛ́.