Read Northwest Gbaya TƆ̧Ɔ̧ HU̧SA̧MƆ 1 Bible Online

TƆ̧Ɔ̧ HU̧SA̧MƆ 1 - Northwest Gbaya bible

TƆ̧Ɔ̧ HU̧SA̧MƆ 1

¹Kalata’ɛ we nɛ́ ɗoŋ hu̧sa̧mɔ nɛ̀ Jesu Krist usa so. Nɛ́ Sɔ̧ a̧ hɔɔ zu sɛnɛ wen usa mɔ nɛ̀ tɛ́ hɔ ɗoŋ ŋgimbi tikiɗi ha̧ o wi-de-tom kɔ̧-a̧. Nɛ́ hegɔ sa Jesu tom betom kɔ‘i mɛ yiwese, mɛ́ usi mɔ‘i ha̧ Jean, wi-de-tom kɔ‘i.

²Jean wee ɗoŋ mɔ lɛŋ n'aa zɔka, ɓɛɛ tɔ̧‘e wen'i nɛ́ wen ko Sɔ̧, ɓɛɛ nɛ́ Jesu a̧ dee sedaako wen'i ha'i.

³Wi nɛ̀ tɔr kalata’ɛ ká bá nɛ̀ wi nɛ̀ zii tɔ̧ɔ̧-wen oi nú Sɔ̧'ɛ, ɓɛɛ kasa mɔ nɛ̀ a̧a̧ zaŋ-aa mbɛt ya nɛ̀ desee, wen ŋgimbi-a hɛɗa kaɗi!

⁴Nɛ́ mi Jean a̧ tom kalata ha̧ zuduk bíí ko Krist mɔɔrɔ-ɗoŋ-yiitoo sɛn Azii. Deemɔ nɛ̀ ta-tɛ ko Sɔ̧ in ga̧a̧mɔ a̧ dúk in'nɛ̀ɛ́ nɛ̀ war ko wi nɛ a̧a̧ sɛnɛ, nɛ̀ duka so, in nɛ̀ tɛ‘i mbɛt, nɛ̀ war ko ɔmi mɔɔrɔ-ɗoŋ-yiitoo nɛ̀ ya sɛn ti damti kɔ̧-a̧,

⁵in nɛ̀ war ko Jesu Krist kpasa wi-sedaako. A̧ nɛ́ kuti kaya-wi nɛ̀ kura ŋgɔn tɛ fio; nɛ́ a̧ a̧ ɔ wan zu o wannu zaŋnu’ɛ. A̧ kɔ̧ɔ̧ yɛ, ɓɛɛ a̧ gbo yɛ yinɛ tɛ̀ ɗaŋmɔ k’ɛ́ɛ́ nɛ̀ tɔk tɛ-a.

⁶A̧ dee h’ɛ́ɛ́ mɛ́ ya nɛ́ zuduk wi-ɗafi-sɔ̧ wen dee tom ha̧ Sɔ̧ Dáà kɔ̧-a̧; gasamɔ in ŋgayamɔ a̧ dúk nɛ́ kɔ̧-a̧ kpoo nɛ kpoo! Aamɛn.

⁷A̧i̧yoo, zɔ́k a̧ n'aa tɛ́ nɛ̀ mgbara o tura-zan mɛ‘i, ɓɛɛ yí bíí lɛŋ tɛ́ zɔk a̧, in o wi nɛ̀ toka so a̧ mbɛt. O zuduk bíí zaŋnu lɛŋ tɛ́ zim fio wen a̧; mɔ tɛ́ de hegɔ nɛ̀ mbetɛ! Aamɛn.

⁸«Mi nɛ́ Alfa in Omega;»[1] nɛ́ Gasa Wan Sɔ̧ nɛ̀ a̧a̧ nɛ̀ ŋgayamɔ lɛŋ, nɛ̀ a̧a̧ sɛnɛ, nɛ̀ duka so, in nɛ̀ tɛ‘i a̧ tɔ̧ wen’ɛ.

⁹Mi nɛ́ Jean nya'nɛ́; sɛn tɛ́ Jesu mi nɛ́ gbama wi-zɔk-bɔnɛ nɛ̀ a̧a̧ tɛ́ mɔɔ-wan in pɛma-mɔ nɛ̀ nɔɔ-ŋgiɗi in'nɛ̀ɛ́ mbɛt. Wa baa so'm pi̧ see-kisi Patmos wen zu wen ko Sɔ̧ in sedaako ko Jesu.

¹⁰Tɛ́ wese ko Gasa Wan, Sa̧a̧ Ɔmi baa'm, ɓɛɛ mi zíí ŋma ŋga tiger sɛn ɗoŋ am hee giti mbia ga,

¹¹nɛ̀ tɔ̧a̧‘e: «Mɛ̀ yɔ́r mɔ nɛ̀ mɛ̀ zɔk’ɛ sɛn zaŋ ŋma kalata, ɓɛɛ mɛ̀ tóm ha̧ o zuduk bíí ko Krist tɛ̀ o ye nɔ'ɔ: Efɛz, Smirn, Pɛrgam, Tiatir, Sardɛs, Filadɛlfii in Laodisee mbɛt.»

¹²Nɛ́ mɔ'ɔ n'am zika tɛ‘m wen zɔka bíí nɛ̀ tɔ̧ wen ha̧‘m'i, ɓɛɛ ŋgimbi n'am zika tɛ‘m, mi zɔka nɛ́ dek-e-wee mɔɔrɔ-ɗoŋ-yiitoo nɛ̀‘i dee nɛ̀ lɔr.

¹³Ŋma mɔ nɛ̀ hɔɔ ŋmaa in bíí yora mgbara o dek nɔ‘i; mɔ‘i pi̧i̧ nɛ́ ŋma zi̧a̧ laa, ɓɛɛ a̧ hɛr pɛsa kanda-lɔr sɛn ɔm-a.

¹⁴Mui̧-zu-a dúk nɛ̀ bu-a kpúŋ-kpúŋ hee buma-tɛ sami, kóó hee talum ga;[2] gbaayí-a nyɛk hee leɓe-wee ga.

¹⁵Naŋ-a dúk hee gba de ndɛrɛ nɛ̀‘i nɔi̧a tɛ wee-dɔra ha̧ mɛ sa̧ ga, ɓɛɛ tiger-a dik hee zɔm o som nana-yì ga.

¹⁶A̧ kasa sɔra mɔɔrɔ-ɗoŋ-yiitoo kɔ̧ er-a mɛ wiiko; gba-paa nɛ̀ nú-a yiitoo pɛ́ɗɛ́ŋ-pɛ́ɗɛ́ŋ gbòó nɛ̀ kɔ̧ nú-a, ɓɛɛ saŋa-yí-a tok hee kpɔra-wese ga.

¹⁷Zɔka a̧ n'am zɔka hegɔ, ɓɛɛ bele zar am pi̧ ká̧ naŋ-a hee fio ga. Nɛ́ mɔ'ɔ n'aa ee er-a mɛ wiiko zu'm ɓɛɛ tɔ̧: «Ká mɛ́ de kíì na, mi nɛ́ kuti-mɔ in sɔŋkur-mɔ!

¹⁸Mi nɛ́ wan nɛ̀ duk kpasa! Mi fee so, ɓɛɛ kinii mi tɛ duk kpasa kpoo nɛ kpoo; mi a̧a̧ nɛ̀ ŋgai zu fio in see zu fara ko o fio mbɛt.

¹⁹Mɛ̀ yɔ́r mɔ nɛ̀ mɛ́ zɔka’ɛ, mɔ nɛ̀ a̧a̧ sɛnɛ kinii in mɔ nɛ̀ tɛ́ hɔ nɛ̀ ɗoŋ mbɛt.

²⁰Gba̧a̧ ɗukamɔ nɛ̀ sɔra mɔɔrɔ-ɗoŋ-yiitoo nɛ̀ mɛ zɔka kɔ̧ er-am mɛ wiiko in dek-e-wee mɔɔrɔ-ɗoŋ-yiitoo nɛ‘i dee nɛ̀ lɔr usi'i nɛ́ mɔ'ɔ: o sɔra mɔɔrɔ-ɗoŋ-yiitoo nɛ́ o betom ko Sɔ̧ zu zuduk bíí ko Krist mɔɔrɔ-ɗoŋ-yiitoo, ɓɛɛ dek-e-wee mɔɔrɔ-ɗoŋ-yiitoo nɛ́ zuduk bíí ko Krist mɔɔrɔ-ɗoŋ-yiitoo mbɛt.»