Read Northwest Gbaya TƆ̧Ɔ̧ HU̧SA̧MƆ 10 Bible Online

TƆ̧Ɔ̧ HU̧SA̧MƆ 10 - Northwest Gbaya bible

TƆ̧Ɔ̧ HU̧SA̧MƆ 10

¹Ɓɛɛ mi zɔk ŋma ŋgaya betom nɛ̀ zira nɛ̀ yiwese mɛ̀ tɛnɛ; a̧ pi̧i̧ nɛ́ tura-zan tɛ-a hee laa ga. Ɓutu yɔra sɔnti-a, saŋa-yí-a duk hee wese ga, ɓɛɛ o naŋ-a duk hee leɓe-wee ga.

²A̧ kasi nɛ́ ŋma geɗek kalata nɛ̀ duk nɛ̀ hu̧i̧a̧-a̧ er-a. A̧ ee naŋ-a mɛ wiiko zu gba-tɔp, ɓɛɛ naŋ-a mɛ gale duk zu nù.

³Nɛ́ mɔ'ɔ n'aa hiɗa mɔ nɛ̀ hee-ger hee dila a̧ mgbimgbi ga. Ŋgimbi n'aa hiɗa mɔ ɓɛɛ kórò mɔɔrɔ-ɗoŋ-yiitoo mbaŋ.

⁴Ɗoŋ nɛ̀ kórò mɔɔrɔ-ɗoŋ-yiitoo mbaŋa kaɗi, mi kɔ̧ɔ̧ so mɛ yɔr mɔ ɓɛɛ mi zii ŋma tiger nɛ̀ tɔ̧ɔ̧ ha̧‘m nɛ̀ yiwese'e: «Mɛ̀ kásí gba̧a̧-wen ko mbaŋa-kórò mɔɔrɔ-ɗoŋ-yiitoo'i é kɔ̧ see-mɛ, ɓɛɛ ká mɛ́ yɔr na.»

⁵Betom mɛ yiwese nɛ̀ ee so naŋ mɛ wiiko zu gba-tɔp, ɓɛɛ e mɛ gale zu nù n'am zɔka so'i, nyɛi̧a er mɛ wiiko si yiwese,

⁶ɓɛɛ kan mɔ nɛ̀ nin wan nɛ̀ duk kpoo nɛ kpoo, wan nɛ̀ dee yiwese gu nɛ̀ o mɔ lɛŋ nɛ̀ ya sɛnɛ, nɛ̀ dee nù in o mɔ lɛŋ nɛ̀ ya sɛnɛ in nɛ̀ dee gba-tɔp mbɛt in o mɔ nɛ̀ ya ɗɔɔ-aa, tɔ̧ nɛnɛ‘e, wi beka gɔn ŋgimbi ɓɔna.

⁷Mɔ kpɔk, ŋgimbi nɛ̀‘i tɛ zii nɛ̀ ku̧u̧naŋ dɔma-mbia ko mɔɔrɔ-ɗoŋ-yiitoo betom mɛ yiwese, ɗukamɔ ko Sɔ̧ tɛ hɔ gba̧a̧, nyɛm nɛ̀ ɗoŋ mɔ nɛ̀ Sɔ̧ tɔ̧ɔ̧ so ha̧ o wi-de-tom kɔ‘i, o wi-tɔ̧-wen oi nú Sɔ̧.

⁸Ɓɛɛ tiger wi nɛ̀ tɔ̧ɔ̧ so wen nɛ̀ yiwese'i tɔ̧ woyo ha̧‘m'e: «Mɛ̀ nɛ́ɛ̀ bá hu̧i̧a̧-kalata nɛ̀ duk er betom mɛ yiwese nɛ̀ ee naŋ mɛ wiiko zu gba-tɔp, ɓɛɛ mɛ gale duk zu nù‘i.»

⁹Mi ɗɔŋa si katɛ betom mɛ yiwese'i, ɓɛɛ mi ai nú ha̧ a̧ mɛ ha̧ be kalata'i ha̧‘m. Ɓɛɛ a̧ tɔ̧ ha̧‘m: «Mɛ̀ bá, mɛ̀ nyɔ́ŋ, a̧ tɛ ɔ nyɔ̧ɔ̧ kɔ̧ nú-mɛ hee gɔrɔ ga, ɓɛɛ a̧ paŋa kɔ̧ zaŋ-mɛ.»

¹⁰Mi baa be kalata er betom mɛ yiwese'i ɓɛɛ mi nyɔŋ; a̧ ɔɔ nyɔ̧ɔ̧ kɔ̧ nú‘m hee gɔrɔ ga, ɓɛɛ ŋgimbi n'am nyɔŋa a̧ kaɗi, o nyak-zaŋ-am kifa nɛ́ paŋmɔ.

¹¹Ɓɛɛ wa tɔ̧ ha̧‘m: «Mɛ̀ tɔ̧́ wen oi nú Sɔ̧ woyo ha̧ o dukbíí, o tugun bíí, in o bíí nɛ̀ tɔ̧ nú nɛtɛ nɛtɛ, in ha̧ o wannu nɛ̀ dɔka-a mbɛt.»