Read Northwest Gbaya TƆ̧Ɔ̧ HU̧SA̧MƆ 11 Bible Online

TƆ̧Ɔ̧ HU̧SA̧MƆ 11 - Northwest Gbaya bible

TƆ̧Ɔ̧ HU̧SA̧MƆ 11

¹Wa ha̧a̧ ŋma kan-toro-we-mɔ ha̧‘m ɓɛɛ wa tɔ̧ ha̧‘m'e: «Mɛ̀ kúr, mɛ̀ wé tua ko Sɔ̧, in fara-ɗafi-sɔ̧, ɓɛɛ mɛ̀ tɔ́r o wi nɛ̀ gasi Sɔ̧ fara'i mbɛt.

²Mɔ kpɔk, nɛ̀ war bee-gara nú tua ko Sɔ̧ nɛ̀ zan'i, ká mɛ́ we na wen wa ha̧a̧ fara'i ha̧ o wi nɛ̀ iŋ Sɔ̧ na, ha̧ wa mɛ i̧si̧ sa̧a̧ ye'i hegɔɔ hɔ tɛ́ fio-zɛ ɓu-naar-zua-yiitoo.

³Ɓɛɛ mi tɛ́ tom o wi-sedaako kɔ‘m yiitoo nɛ̀ tɛ pi̧ laa-bufu tɔ̧ nɛ̀ wen oi nú‘m tɛ̀ ɔɔ-zɛ booro-nɛ-gɔmŋmaa-yiitoo-nɛ-ɓu-mɔɔrɔ-ɗoŋ-kpɔk.»

⁴O wi-sedaako nɔ‘i nɛ́ o te-nɔ̧́ yiitoo in dek yiitoo nɛ̀ ya ti Gasa Wan zu nù'ɛ.

⁵Kà ŋma bíí kíí mɛ de ɗaŋmɔ in wa ɓɛɛ wee gɔma nɛ̀ kɔ̧ nú-wa dɔ wi’ɛi pi̧ nù. Nɛ̀ mbetɛ, kà ŋma bíí kíí mɛ de ɗaŋmɔ in wa, wi’ɛi tɛ́ fe kànà.

⁶Wa a̧a̧ nɛ̀ ŋgai mɛ kpe yiwese wen ká kórò tɛ́ɛ̀ hɔ ŋgimbi nɛ̀ wa biti tɔ̧ wen oi nú Sɔ̧. Wa a̧a̧ nɛ̀ ŋgai mɛ kifi yì nɛ̀ tɔk in mɛ pi̧ o ŋgamɔ nɛtɛ nɛtɛ zu nù hee wa kɔ̧ɔ̧ ga.

⁷Ɗoŋ nɛ̀ wa dee sedaako kaɗi, saɗi nɛ̀ tɛ daŋ nɛ̀ kɔ̧ ɗuka-fara‘i tɛ bi biro in wa, gan nɛ̀ zu wa, ɓɛɛ gbɛɛ wa mbɛt.

⁸Wɔr-wa tɛ ɓɔn bee-gara gasa ye sɛn mgbák bɛɗɛ-fara nɛ̀ wa mgboia so Gasa Wan kɔ-wa sɛnɛ. Wi aa nin ye'i nɛ̀ mɔɔ-do-mɔ‘e Sɔdɔm, koo Egiptɛ.

⁹O dukbíí, o zuduk bíí, o bíí nɛ̀ tɔ̧ nú nɛtɛ nɛtɛ, in o tugun bíí tɛ gar nɛnɛ mɛ zɔk wɔr-wa zaŋ zɛ taar nɛ̀ reeta, ɓɛɛ wa beka kpɛk ha'i mɛ gun o wi nɔ‘i na.

¹⁰O bíí zaŋnu tɛ de nyɛŋɛ wen mɔ nɛ̀ kpaa o wi-tɔ̧-wen oi nú Sɔ̧ nɔ‘i yiitoo'i, wa tɛ kpa desee, ha̧ nɛ̀ mɔ ha̧ o ŋmaa wen o wi-tɔ̧-wen oi nú Sɔ̧ yiitoo nɔ‘i sakala so o bíí zaŋnu nyɛmna.

¹¹Ɓɛɛ ɗoŋ zɛ nɔ‘i taar nɛ̀ reeta'i, búk-duka-kpasa yuu nɛ̀ tɛ́ Sɔ̧ mɛ̀ tɛnɛ a tɛ-wa ɓɛɛ wa kpasi. Gasa kíì baa o wi nɛ̀ zɔka wa'i.

¹²Nɛ́ mɔ'ɔ nɛ̀ wa zia ŋma tiger nɛ́ tɔ̧ nɛ̀ yiwese mɛ̀ tɛnɛ ha̧ wa nɛ̀ hee-ger'e: «Ɛ̀nɛ̀ dáŋ pii hɛ̧ɛ̧.» Ɓɛɛ wa daŋ si yiwese zaŋ bu-zan nɛ̀ yí o wisɛn kɔ-wa.

¹³Tɛ̀ kpɔk ŋgimbi'i, nù naka nyɛmna, ɓɛɛ kpɔk mgbara kɛ̧a̧-nù ɓu'i gbin ɓɛɛ tir a nù, ɓɛɛ o bíí booro-mɔɔrɔ-ɗoŋ-yiitoo kum tɛ ŋgamɔ nɛ̀ dea'i. Kíì baa oi o wi nɛ̀ ɓɔna kpasa, ɓɛɛ wa gasi Sɔ̧ nɛ̀ duk yiwese.

¹⁴Yiitoo bɔnɛ yaka kɔ‘i kaɗi, mɔ kpɔk, dekpaa ɓɛɛ taar-a hɔa.

¹⁵Mɔɔrɔ-ɗoŋ-yiitoo betom mɛ́ yiwese dɔma mbia kɔ‘i, ɓɛɛ o ŋma ŋga tiger tɔ̧ wen nɛ̀ yiwese mɛ̀ tɛnɛ‘e: «Kinii mɔɔ-wan zaŋnu’ɛ nɛ́ ko Gasa Wan k’ɛ́ɛ́ in ko Krist kɔ̧-a̧; a̧ tɛ ɔ wan hegɔ kpoo nɛ kpoo.»

¹⁶Nɛ́ mɔ'ɔ nɛ̀ o kuti-wi ɓu-yiitoo-zua-naar nɛ̀ duk zu damti sɛn ti Gasa Wan, aia gbéyéŋ gu yí nù gasi nɛ̀ Sɔ̧,

¹⁷tɔ̧ nɛnɛ‘e: «Ɛ́ɛ́ de osoko h’ɛ́nɛ́, Gasa Wan Sɔ̧ nɛ̀ a̧a̧ nɛ̀ ŋgayamɔ lɛŋ, nɛ̀ a̧a̧ sɛnɛ in nɛ̀ duka so, wen ɛ́nɛ́ usa gasa ŋgayamɔ k’ɛ́nɛ́, ɓɛɛ ɛ́nɛ́ ɔ wan.

¹⁸O tugun bíí dee so nyimsea, ɓɛɛ kinii, ŋgimbi nyimsea k’ɛ́nɛ́ hɔɔ kaɗi, wen h’ɛ́nɛ́ mɛ gɔn kita zu o wi nɛ̀ fea só; nɛ́ ŋgimbi ha̧a̧ mɔɔ-oi-tom ha̧ o wi-de-tom k’ɛ́nɛ́ nɛ̀ tɔ̧ɔ̧ so wen oi nú‘nɛ́, ha̧ o sa̧a̧-bíí in o wi nɛ̀ yu kíí nin'nɛ́ in ha̧ o geɗek-wi in o gasawi mbɛt; nɛ́ ŋgimbi ɗaŋa o wi nɛ̀ ɗaŋ nù'ɛ!»

¹⁹Nɛ́ mɔ'ɔ nɛ̀ nú tua ko Sɔ̧ hu̧i̧a̧ sɛn yiwese mɛ, ɓɛɛ kuɓa nɔɔ-tɔk gbó yor sɛn kɔ̧ tua kɔ̧-a̧. Wi zia o pi̧i̧-kórò, o tiger bíí, in o mbaŋa-kórò, ká bá nɛ̀ naka-nù in ŋga ɓɔrɔ.