Read Northwest Gbaya TƆ̧Ɔ̧ HU̧SA̧MƆ 12 Bible Online

TƆ̧Ɔ̧ HU̧SA̧MƆ 12 - Northwest Gbaya bible

TƆ̧Ɔ̧ HU̧SA̧MƆ 12

¹Ŋma gasa mɔɔ-usi-mɔ gboo yiwese: nɛ́ ŋma okoo a̧ wese zika e see-a hee laa a̧ a̧ pi̧a ga; nyaŋa-zɛ a̧a̧ ɗɔɔ naŋ-a, ɓɛɛ o sɔra ɓu-zua-yiitoo mɔi̧ ŋmaa duk zu-a hee laasɔ̧i̧-wan ga.

²A̧ baa so nɛ́ zaŋ, ɓɛɛ a̧ duk gɔfi nɛ̀ mɔ wen zaŋ nyim so nɛ́ a̧ mɛ ko.

³Nɛ́ mɔ'ɔ nɛ̀ ŋma mɔɔ-usi-mɔ woyo gboo yiwese: mɔ‘i nɛ́ ŋma gasa ndiɓa nɛ̀ gbɛ̧-a̧ hee wee ga, zu-a mɔɔrɔ-ɗoŋ-yiitoo, o zak-a ɓu, ɓɛɛ laasɔ̧i̧-wan a̧a̧ see zu-wa mɔɔrɔ-ɗoŋ-yiitoo nɔ‘i dam lɛŋ.

⁴Dom-aa mbia o ŋma sɔra mgbara kɛ̧ɛ̧ sɔra mɛ yiwese tɛ́ fara taar a mbɔɗɔnu. Ndiɓa yora ti okoo nɛ̀ de mɛ ko'i, pɛm nɛ̀ bem’ɛi mɛ nyɔŋ ŋgimbi n'aa tɛ gbo tik nù.

⁵Nɛ́ mɔ'ɔ nɛ̀ kóò‘i koo bem nɛ̀ be-wiwii: mɛ̀ nɛ́ bem’ɛi a̧ tɛ dai o tugun bíí lɛŋ nɛ̀ dɔra-boi. Wa baa bem kɔ̧-a̧‘i yaknɛ sitɛ Sɔ̧ in ti damti kɔ̧-a̧ mɛ̀.

⁶War ko kóò‘i, a̧ yuu mɔ si ŋga-gbárà mɛ̀; mɛ̀ nɛ́ fara'i a̧ Sɔ̧ ɗafa nɛti mɛ dai a̧ sɛnɛ tɛ̀ ɔɔ-zɛ booro-nɛ-gɔmŋmaa-yiitoo-nɛ-ɓu-mɔɔrɔ-ɗoŋ-kpɔk.

⁷Nɛ́ mɔ'ɔ nɛ̀ ŋma biro tika yiwese mɛ̀. Mɛ̀ nɛ́ Michɛl in o betom mɛ yiwese a̧ bi biro in ndiɓa. Ɓɛɛ ndiɓa in o betom kɔ‘i mbɛt kifi er biro'i.

⁸Mɔ kpɔk, ndiɓa in o betom kɔ‘i gbin biro'i na, ɓɛɛ wa ndak wa sɛn yiwese mɛ̀ yinɛ.

⁹Hegɔ wa ndaka gasa ndiɓa'i, nɛ̀ duk nɛ́ gɔk ɓeemɛ nɛ̀‘i sa'e Wan-ɗaŋmɔ, kóó Satan, nɛ̀ duk nɛ́ wi-ɔr-bíí zaŋnu lɛŋ; wa ndaka a̧ pii zu nù zaŋnu’ɛ gu nɛ̀ o betom kɔ̧-a̧ lɛŋ.

¹⁰Ɓɛɛ mi zíí ŋma ŋga tiger sɛn yiwese mɛ̀ nɛ̀ tɔ̧a̧‘e: «Zɔ́k ŋgimbi wen yuwar-kpasa-a hɔa! Ŋgimbi ŋgayamɔ in wan ko Sɔ̧ k’ɛ́ɛ́ ká bá nɛ̀ ŋgai ko Krist kɔ̧-a̧ hɔa! Wa foo wi-ɓir-wen e nú o nya yɛ sɛn ti Sɔ̧ zɛ nɛ wese pi̧ nù kaɗi.

¹¹Ɓɛɛ wa gan ndiɓa in o betom kɔ‘i wen zu tɔk-tɛ Be-sami in wen nɛ̀ wa dee sedaako zu a̧, wa kii yuwar mɛ kpasi tɛ-wa na, ɓɛɛ wa kpɛka mɛ fe.

¹²Mɛ̀ nɛ́ wen hegɔ, yiwese in o mɔ nɛ̀ ya hi̧i̧ a̧ dé nyɛŋɛ! Mɔ kpɔk, oee bɔnɛ wen zaŋnu in gba-tɔp wa! Wen Wan-ɗaŋmɔ zira pii tɛ‘nɛ́ nɛ̀ nyimsea, wen a̧ iŋa'e oi ŋgimbi kɔ̧-a̧ tikiɗi ɓɛɛ.»

¹³Ŋgimbi nɛ̀ wa ira ndiɓa pii zu nù kaɗi, a̧ ndaka ɗoŋ okoo nɛ̀ koo be-wiwii'i.

¹⁴Nɛ́ mɔ'ɔ nɛ̀ wa kaia ɓaa gasa zua ha̧ kóò‘i wen ha̧ a̧ mɛ bu̧i̧ yaknɛ si ŋga-gbárà mɛ̀; nɛ́ fara'i a̧ wa ɗafa so mɛ dai a̧ sɛnɛ sɛn tɛ́ pɛ taar nɛ̀ reeta[9] nyɛi̧ nɛ̀ gɔk'i.

¹⁵Nɛ́ mɔ'ɔ nɛ̀ gɔk'i ɔ̧i̧a ŋma mɔ hee nana-yì ga si ɗoŋ kóò‘i mɛ ba a̧ yaknɛ.

¹⁶Ɓɛɛ nù gbak kóò‘i, wen nù ɓaa nú ɓɛɛ nana-yì nɛ̀ ndiɓa ɔ̧i̧a̧ fok si kɔ̧ a̧ lɛŋ.

¹⁷Zaŋ nyimsea ko ndiɓa zu kóò‘i, a̧ yaka mɛ ba biro dúk nɛ̀ o bezaŋ-aa gu nɛ̀ o bíí nɛ̀ kasi heembea ko Sɔ̧, mbo nɛ̀ zu tɛ kpasawen nɛ̀ Jesu baa zan.

¹⁸Ɓɛɛ ndiɓa'i yor zu gbutu gba-tɔp.