Read Northwest Gbaya TƆ̧Ɔ̧ HU̧SA̧MƆ 17 Bible Online

TƆ̧Ɔ̧ HU̧SA̧MƆ 17 - Northwest Gbaya bible

TƆ̧Ɔ̧ HU̧SA̧MƆ 17

¹Nɛ́ mɔ'ɔ nɛ̀ ŋma betom mɛ yiwese mgbara wa mɔɔrɔ-ɗoŋ-yiitoo nɛ̀ kasi o be-ɗele mɔɔrɔ-ɗoŋ-yiitoo nɔ‘i ɗɔŋa pii ti ɓɛɛ tɔ̧ wen ha̧‘m'e: «Mɛ̀ tɛ́ ha̧‘m usi gɔna-kita zu gasa ko-de-dàlà nɛ̀ duk ká̧ gba-tɔp ha̧ mɛ.

²O wannu zaŋnu duka so in a̧ nɛ̀ dàlà, ɓɛɛ o bíí zaŋnu gbɛ dɔ̧ɔ̧-dàlà kɔ̧-a̧.»

³Nɛ́ mɔ'ɔ nɛ̀ betom'i baa'm nɛ̀ ŋgai ko Ɔmi si ŋga-gbárà mɛ̀, ɓɛɛ mi zɔk ŋma okoo nɛ̀ duk zu ŋma saɗi nɛ̀ gbɛ̧-a̧. Yɔramɔ-ɗaŋ-nin Sɔ̧ dama tɛ saɗi'i lɛŋ; saɗi'i a̧a̧ nɛ̀ zu mɔɔrɔ-ɗoŋ-yiitoo in zak ɓu.

⁴Kóò‘i pi̧i̧ so nɛ́ gba de gbɛ̧ laa in gbɛ̧ laa yúŋgú-yúŋgú; a̧ aa o kana-lɔr in o de ta nɛ̀ gɛnɛ-a ɔ ŋgaya ká bá nɛ̀ o kísí. A̧ kasi so nɛ́ be-ɗele-lɔr sɛn er-a nɛ̀ duna nɛ̀ o mɔɔ-nyɛr nɛ̀ duka nɛ́ o ndiŋ mɔɔ-dàlà kɔ̧-a̧.

⁵Ŋma yɔramɔ nɛ̀ zia gba̧a̧-a̧ ɔ ŋgaya duka so sɛn sɔnti-a'e: «Gasa Babilɔŋ yaa-gásì, nàà ko o ko-de-dàlà in o mɔɔ-nyɛr zaŋnu.»

⁶Ɓɛɛ mi zɔk tɔk-tɛ o sa̧a̧-bíí in ko o wi-de-sedaako ko Jesu nɛ̀ gbɛ kóò‘i hee dɔ̧ɔ̧ ga. Mi zɔka a̧ ɓɛɛ ɗɛɗ‘am gɔn.

⁷Ɓɛɛ betom mɛ yiwese tɔ̧ ha̧‘m: «Ɗɛɗɛ-mɛ gɔn wen ge? Mi tɛ tɔ̧ ndaa ɗukamɔ ko kóò‘i in ko saɗi nɛ̀ a̧a̧ nɛ̀ zu mɔɔrɔ-ɗoŋ-yiitoo in zak ɓu nɛ̀ tui kóò‘i ha̧ mɛ́.»

⁸«Saɗi nɛ̀ mɛ zɔka'i duka so, ɓɛɛ bó ɓɔna. A̧ tɛ daŋ nɛ̀ kɔ̧ ɗuka-fara wen yɔa-a, ɓɛɛ ɗɛɗɛ o bíí zaŋnu, nɛ̀ nin-wa yɔr so zaŋ kalata duka-kpasa ku̧u̧naŋ-a nɛ̀ Sɔ̧ dee nɛ̀ nù mɛ̀ na tɛ́ gɔn tɛ̀ zɔka saɗi'i nɛ̀ wa tɛ zɔk, wen a̧ duka so, a̧ bó ɓɔna, ɓɛɛ a̧ tɛ́ pii ɗoŋ woyo.

⁹Nɛ́ ŋgimbi kpaa iŋamɔ nɛ̀ iŋa-mgbara-mɔ usi; o zu saɗi mɔɔrɔ-ɗoŋ-yiitoo nɔ‘i usi nɛ́ o kaya mɔɔrɔ-ɗoŋ-yiitoo nɛ̀ kóò‘i duk sɛnɛ, ɓɛɛ usi nɛ́ o wannu mɔɔrɔ-ɗoŋ-yiitoo mbɛt.

¹⁰Mɔɔrɔ mgbara wa tika kaɗi, mɔɔrɔ-ɗoŋ-kpɔk-a ɔ nɛ́ wan, ɓɛɛ mɔɔrɔ-ɗoŋ-yiitoo-aa tɛ hɔ hɔ̧ɔ̧ na; ŋgimbi n'aa bé tɛ̀ɛ́ hɔ, a̧ tɛ́ duk tɛ́ wan zɛ tikiɗi ɓɛɛ.

¹¹Saɗi nɛ̀ duka so, ɓɛɛ nɛ̀ bó ɓɔna nɛ́ ŋma mɔɔrɔ-ɗoŋ-taar wannu; a̧ a̧a̧ mgbara wa mɔɔrɔ-ɗoŋ-yiitoo nɔ‘i, ɓɛɛ a̧ nɛ́ mɛ yɔ.

¹²«O zak ɓu nɛ̀ mɛ zɔka'i usi nɛ́ o wannu ɓu nɛ̀ tɛ́ ye tɛ́ wan hɔ̧ɔ̧ na; mɔ kpɔk, wa tɛ́ ɔ wan in saɗi'i tɛ́ ŋgimbi kpɔk.

¹³Wa lɛŋ, ee-zu-mɔ kɔ-wa kpɔk: nɛ́ ee ŋgayamɔ in ŋgai kɔ-wa, wen tom ko saɗi'i.

¹⁴Wa tɛ ba biro dúk nɛ̀ Be-sami ɓɛɛ Be-sami tɛ gan wa, wen a̧ nɛ́ Gasa Wan zu o gasa wan, in Wannu zu o wannu; o wi n'aa saa hok nɛ̀ wa in o wi-mbo-zu ha̧ a̧ tɛ gbin sɔŋkur biro'i mbɛt wen zu a̧.»

¹⁵Ɓɛɛ betom mɛ yiwese tɔ̧́ ha̧‘m: «O yì nɛ̀ mɛ zɔka fara nɛ̀ ko-de-dàlà duk sɛnɛ‘i nɛ́ o dukbíí, o gíí bíí, o tugun bíí in o bíí nɛ̀ tɔ̧ nú nɛtɛ nɛtɛ.

¹⁶Ɓɛɛ war ko zak ɓu nɛ̀ mɛ zɔka in saɗi, wa tɛ sɛn ko-de-dàlà‘i; ɓɛɛ wa tɛ de ha̧ a̧ mɛ duk ɛ̀nɛ́-a nɛ̀ mgbìí, wa tɛ nyɔŋ kpoo-tɛ-a, ɓɛɛ wa dɔɔ a̧ nɛ̀ wee.

¹⁷Wen nɛ́ Sɔ̧ a̧ ee taamɔ‘i kɔ̧ see-wa, wen ha̧ wa mɛ de mɔ n'aa ee so zu-a; mɛ̀ nɛ́ ee-nú kpɔk in o ŋmaa wen ha̧a̧ ŋgai-wan kɔ-wa ha̧ saɗi hɔ ŋgimbi nɛ̀ wen ko Sɔ̧ tɛ hɔ gba̧a̧.

¹⁸«Ɓɛɛ okoo nɛ̀ mɛ zɔka'i, nɛ́ gasa ye nɛ̀ ɔ wan zu o wannu zaŋnu.»