Read Northwest Gbaya TƆ̧Ɔ̧ HU̧SA̧MƆ 18 Bible Online

TƆ̧Ɔ̧ HU̧SA̧MƆ 18 - Northwest Gbaya bible

TƆ̧Ɔ̧ HU̧SA̧MƆ 18

¹Ɓɛɛ mi zɔk ŋma betom mɛ́ yiwese woyo nɛ̀ zir nɛ̀ yiwese mɛ̀ tɛnɛ; a̧ a̧a̧ nɛ̀ ŋgai nyɛmna, ɓɛɛ gasamɔ kɔ̧-a̧ de ha̧ zaŋnu mɛ duk tɛ sa̧a̧mɔ.

²Nɛ́ mɔ'ɔ n'aa hiɗa mɔ nɛ̀ hee-ger tɔ̧ nɛnɛ‘e: «A̧ tika, a̧ tika kaɗi wó, Babilɔŋ yaa-gásì tika! Babilɔŋ kifa nɛ́ fara-duk ko o ɗaŋ-sɔ̧ kaɗi wó, a̧ duk nɛ́ fara-hu̧si ko o ɗaŋ ɔmi lɛŋ in fara-hu̧si ko o ndiŋ nɔ̧́í-nyɛr lɛŋ.

³Mɛ̀ nɛ́ à̧ á̧ dee so ha̧ o tugun bíí mɛ nɔ dɔ̧ɔ̧ zɔm dee dàlà kɔ̧-a̧‘i; o wannu zaŋnu dee so dàlà in a̧, ɓɛɛ o wi-ɗɔr-mɔ zaŋnu kifi wanmbɔi wen zu dɔka kpaamɔ kɔ̧-a̧ yak zale.»

⁴Ɓɛɛ mi zii ŋma tiger woyo nɛ̀ yiwese mɛ̀ tɛnɛ‘e: «Dukbíí kɔ‘m, ɛ̀nɛ̀ kúr tɛ̀ ye’ɛ, wen k’ɛ́nɛ́ tɛ̀ɛ́ ye zaŋ ɗaŋmɔ kɔ̧-a̧ in k’ɛ́nɛ́ tɛ̀ɛ́ zɔk bɔnɛ ŋgamɔ nɛ̀ duk wen-aa.

⁵O ɗaŋmɔ kɔ̧-a̧ kusa mɔi̧ daŋ hɔ yiwese mɛ̀, ɓɛɛ tɛ́ Sɔ̧ mbaŋ ɗoŋ o deemɔ nɛ̀ yuwar-a na kɔ̧-a̧.

⁶Ɛ̀nɛ̀ yóɓ‘a nɛ̀ kpɔk sede kɔ̧-a̧ woyo, ɓɛɛ ɛ̀nɛ̀ kífí er ha̧ a̧ war yiitoo tɛ́ mɔ n'aa dee so; ɛ̀nɛ̀ í̧sí̧ be-ɗele kɔ̧-a̧ nɛ̀ ŋga dɔ̧ɔ̧ tɛ mɔ n'aa dee so dun war yiitoo.

⁷Hee mɔ'ɔ n'aa duka so tɛ gasamɔ in tɛ demɔ ga, ɛ̀nɛ̀ dé kànà ha̧ a̧ mɛ zɔk bɔnɛ in ha̧ a̧ mɛ duk tɛ zima-fio mbɛt. Wen a̧ tɔ̧́ nɛ̀ kɔ̧ see-aa'e: ‹Mi nɛ́ ko-wan nɛ̀ duk zu damti, mi bó nɛ́ ko-gera na, mi beka zim fio na ndó-ndó-ndó.›

⁸Mɛ̀ nɛ́ wen zu mɔ‘i a̧ o ŋgamɔ nɛ̀ yɔra wen-aa tɛ tik zu a̧ kpɔk kale wese; mɛ̀ nɛ́ fio, zima-fio, kaɓa, ɓɛɛ wee dɔɔ a̧ a nù mbɛt, wen Gasa Wan Sɔ̧ nɛ̀ gɔna kita zu-a'i nɛ́ wan ŋgayamɔ.»

⁹O wannu zaŋnu nɛ̀ dee so dàlà in a̧, nyɔŋ nɛ̀ o demɔ kɔ̧-a̧ mbɛt'i tɛ hi̧i̧ kɔ̧a̧ ai nɛ̀ nú wen zu a̧, ŋgimbi nɛ̀ wa tɛ zɔk tura zi-wee bia-wee-aa.

¹⁰Kíí bɔnɛ kɔ̧-a̧ tɛ de wa, ɓɛɛ wa tɛ duk nɛ̀ nyɛi̧a-a ai nɛ̀ nú‘e: «Oee bɔnɛ wa! Oee bɔnɛ wa! Nɛ́ tɛ́ ŋgimbi kpɔk ɓɛɛ a'i gɔna nɛ̀ kita zu Babilɔŋ yaa-gásì, ye nɛ̀ a̧a̧ so nɛ̀ ŋgai’ɛ!»

¹¹Ɓɛɛ o wi-ɗɔr-mɔ zaŋnu tɛ hi̧i̧ kɔ̧a̧, zim nɛ̀ fio kɔ̧-a̧, wen ŋma bíí mɛ hi̧fi̧ o tui kɔ-wa bó ɓɔna.

¹²O tui nɔ‘i nɛ́ lɔr, bu-sede, o ta nɛ̀ gɛnɛ-a ɔ ŋgaya, o kísí, o yɛ́m-yɛ́m laa, o gbɛ̧ laa, o yɔɔ-laa, o gbɛ̧ laa yúŋgú-yúŋgú; o te-nyama, o mɔ nɛ̀‘i dee nɛ̀ nin-fɔrɔ, o te nɛ̀ gɛnɛ-a ɔ ŋgaya, o ndɛrɛ, o boi, in ŋga ta;

¹³o nyama-gi-kpoo, o nyama-a-tɛ, o nɔ̧́-nyama, in o fuu-nyama, o dɔ̧ɔ̧, o nɔ̧́, gba de fuu-alkamaari, o alkamaari, o ndai, o sami, o nyaŋa in o keekee, o bara ín o bara-biro.[12]

¹⁴O wi-ɗɔr-mɔ nɔ‘i tɔ̧ɔ̧ zu ye'i'e: «O mɔ nɛ̀ see-mɛ baa so'i pɛsa yak kaɗi; o mbɔi in o demɔ kɔ-mɛ lɛŋ yɔɔ er-mɛ kaɗi. Mɛ beka kpa wa woyo ɓɔna.»

¹⁵O wi-ɗɔr-mɔ n'aa dee so ha̧ wa mɛ kifi wanmbɔi tɛ ɗɔra mɔ‘i, tɛ yor nɛ̀ kíì nɛ̀ nyɛi̧a-a, kɛ̧i̧ nɛ̀ a̧ wen zu bɔnɛ kɔ̧-a̧. Wa tɛ hi̧i̧ kɔ̧a̧, zim nɛ̀ fio,

¹⁶ai nɛ̀ nú-wa'e: «Oee bɔnɛ wa! Oee bɔnɛ wa! Ye yaa-gásì nɛ̀ pi̧i̧ so yɛ́m-yɛ́m laa, in gbɛ̧ laa in gbɛ̧-a̧ yúŋgú-yúŋgú nɛ̀ aa lɔr tɛ̀, in o ta nɛ̀ gɛnɛ-a ɔ ŋgaya ká bá nɛ̀ o kísí,

¹⁷nɛ́ mɔ'ɔ nɛ̀ o dɔka kpaamɔ nɔ‘i ɗaŋa tɛ ŋgimbi kpɔk ɓɛɛ'ɛ!» Ɓɛɛ o wi-ba-kombon, o wi-daŋa-a, o wi-de-tom-aa in o bíí lɛŋ nɛ̀ tom-yì nɛ́ fara-kpa-mbɔi kɔ-wa yora nɛ̀ nyɛi̧a-a

¹⁸ai nɛ̀ nú tɛ zɔka zi-wee bia-wee-aa tɔ̧ nɛnɛ‘e: «Ŋma ye nɛ̀ hɔɔ ŋmaa in ye yaa-gásì'ɛ, nɛ́ ge ye ge?»

¹⁹Wa aa fuunu zu wa, hiɗi nɛ̀ mɔ, hí̧í̧ nɛ̀ kɔ̧a̧, zim nɛ̀ fio, ai nɛ̀ nú‘e: «Oee bɔnɛ wa! Oee bɔnɛ wa! Ye yaa-gásì nɛ̀ zɔm kpaamɔ kɔ̧-a̧ dee so ha̧ o wi nɛ̀ a̧a̧ nɛ̀ kombon zu gba-tɔp mɛ kifi wanmbɔi’ɛ, nɛ́ mɔ'ɔ n'aa ɗaŋa tɛ ŋgimbi kpɔk ɓɛɛ'ɛ!»

²⁰Yiwese, mɛ̀ dé nyɛŋɛ wen zu ɗaŋa-a ko ye’ɛ! Ɛ́nɛ́ o sa̧a̧-bíí, o betom ko Jesu in o wi-tɔ̧-wen oi nú Sɔ̧, ɛ̀nɛ̀ dé nyɛŋɛ mbɛt, wen tɛ̀ gɔna kita zu a̧, Sɔ̧ dee mɔ nɛ̀ yuwar-a in'nɛ̀ɛ́.

²¹Nɛ́ mɔ'ɔ nɛ̀ ŋma ŋga betom mɛ yiwese baa ŋma dita ta hee ta-hɔ̧n-mɔ ga pi̧ ɗɔɔ gba-tɔp ɓɛɛ tɔ̧‘e: «Nɛ́ hegɔ a̧ wa tɛ tui nɛ̀ Babilɔŋ yaa-gásì pi̧ nù, ɓɛɛ wi beka iŋ oi-aa ɓɔna.

²²Wi beka zii gima ko o wi-mbɛr-koloŋ in o wi-de-gima, o wi-dɔm-fol, in o wi-dɔm-mbia tɛ̀ kɔ-mɛ ɓɔna. Wi beka kpa ŋma wí-ìŋ-tòm[13] tɛ̀ kɔ-mɛ ɓɔna, wi beka zii giti ta-hɔ̧n-alkamaari tɛ̀ kɔ-mɛ ɓɔna mbɛt.

²³Wee-lamba beka nyɛk tɛ̀ kɔ-mɛ ɓɔna; wi beka zii ger o wi-ba-ŋmaa tɛ dee nyɛŋɛ tɛ̀ kɔ-mɛ ɓɔna mbɛt, wen o wi-ɗɔr-mɔ kɔ-mɛ duka so nɛ́ o gasawi zaŋnu, in wen nɛ̀ mɛ ɔra so o tugun bíí lɛŋ nɛ̀ o mɔɔ-kifi kɔ-mɛ.»

²⁴Bɔnɛ tika zu Babilɔŋ wen nɛ̀‘i kpaa tɔk-tɛ o wi-tɔ̧-wen oi nú Sɔ̧, tɔk-tɛ o sa̧a̧-bíí in ko o bíí nɛ̀ wa gbɛɛ zaŋnu lɛŋ sɛn tɛ̀ kɔ̧-a̧.