Read Northwest Gbaya TƆ̧Ɔ̧ HU̧SA̧MƆ 19 Bible Online

TƆ̧Ɔ̧ HU̧SA̧MƆ 19 - Northwest Gbaya bible

TƆ̧Ɔ̧ HU̧SA̧MƆ 19

¹Hɔ-ɗoŋ mɔ‘i, ɓɛɛ mi zíí ŋma mɔ hee tiger gba gíí bíí ga nɛ̀ tɔ̧ wen nɛ̀ yiwese mɛ̀ tɛnɛ‘e: «Aleluya! Yuwar-kpasa-a, gasamɔ in ŋgayamɔ nɛ́ ko Sɔ̧ k’ɛ́ɛ́.

²Wen gɔna-kita kɔ̧-a̧ nyɛma sɛnɛ in duk nɛ̀ yuwar-a mbɛt; a̧ gɔna kita zu gasa ko-de-dàlà nɛ̀ ɗaŋa so zaŋnu nɛ̀ mɔɔ-dàlà kɔ‘i. A̧ kifa er ha̧ kóò‘i wen zu tɔk-tɛ o wi-de-tom kɔ̧-a̧.»

³Ɓɛɛ wa gai mɔ woyo'e: «Aleluya! Zi-wee bia-wee-ye tɛ tur kpoo nɛ kpoo.»

⁴Nɛ́ mɔ'ɔ nɛ̀ o kuti-wi ɓu-yiitoo-zua-naar in o saɗi naar gbɛɛ zugur nù, gasi nɛ̀ Sɔ̧ nɛ̀ duk zu damti'i, ɓɛɛ tɔ̧‘e: «Aamɛn, Aleluya!»

⁵Ɓɛɛ ŋma tiger gbo nɛ̀ ti damti tɔ̧ nɛnɛ‘e: «Ɛ̀nɛ̀ zɔ́n Sɔ̧ k’ɛ́ɛ́, ɛ́nɛ́ o wi-de-tom kɔ̧-a̧ lɛŋ, in o wi nɛ̀ yu kíí a̧, o geɗek-wi gu nɛ̀ o gasawi mbɛt.»

⁶Ɓɛɛ mi zii ŋma mɔ hee tiger gba gíí bíí nɛ̀ de mɔ hee giti gba-tɔp, kóó hee zɔm dika-kórò ga mbɛt, nɛ tɔ̧a̧‘e: «Aleluya! Wen Gasa Wan Sɔ̧ k’ɛ́ɛ́ nɛ̀ a̧a̧ nɛ̀ ŋgayamɔ lɛŋ ɔɔ wan kaɗi.

⁷Ɛ̀ɛ̀ yá nɛ̀ desee, ɛ̀ɛ̀ dé nyɛŋɛ, ɛ̀ɛ̀ zɔ́n a̧, wen kinii nɛ́ ŋgimbi-baa-kóò ko Be-sami. Zɔ́k kóò kɔ̧-a̧ ɗafa tɛ̀,

⁸wa ha̧a̧ so yuwar ha̧ a̧ mɛ pi̧ yɛ́m-yɛ́m laa nɛ̀ tok tok nɛ̀ duk nɛ̀ sa̧a̧-a̧ mbɛt.» (Laa'i usi nɛ́ dee tom nɛ̀ yuwar-a ko o sa̧a̧-bíí.)

⁹Ɓɛɛ ŋma betom mɛ yiwese tɔ̧ ha̧‘m'e: «Mɛ̀ yɔ́r mɔ'ɔ: ‹O wi nɛ̀‘i saa tɛ́ gbaŋa-baa-kóò ko Be-sami ya nɛ̀ desee!› » Ɓɛɛ betom'i tɔ̧ ha̧‘m'e: «Wen'i nɛ́ mgbák wen ko Sɔ̧.»

¹⁰Ɓɛɛ mi gbɛ zugur nù ti a̧ mɛ gas'a, ɓɛɛ a̧ tɔ̧ ha̧‘m'e: «Ká mɛ́ gas'am na! Mi nɛ́ gbama wi-de-tom hee mɛ ga in o nya-mɛ nɛ̀ kasi sedaako ko Jesu. Nɛ́ Sɔ̧ a̧ mɛ̀ tɛ́ gasi, wen sedaako ko Jesu nɛ́ ŋgai nɛ̀ de ha'i mɛ tɔ̧ wen oi nú Sɔ̧.»

¹¹Yiwese hu̧i̧a̧ ɓɛɛ mi zɔk ŋma bu nyaŋa. Nin-wi nɛ̀ daŋ nyaŋa'i nɛ́ Wi-mbo-zu;[14] ŋma nin-a'e Mgbák-a.[15] A̧ gɔn kita in a̧ bi biro nɛ̀ yuwar-a.

¹²O gbaayí-a dúk hee nyɛka-leɓe-wee ga, o laasɔ̧i̧-wan a̧a̧ zu-a nɛ̀ dɔka-a, ɓɛɛ nin nɛ̀ yɔra tɛ-a nɛ́ a̧ kpɔk á̧ iŋa ɓɛɛ.

¹³A̧ pi̧i̧ nɛ́ gba-laa nɛ̀‘i pi̧i̧ ɗɔɔ tɔk, ɓɛɛ nin-a nɛ́ Wen ko Sɔ̧.

¹⁴O wi-biro mɛ yiwese pi̧i̧ yɛ́m-yɛ́m bu laa nɛ̀ ɔ sa̧a̧, ɓɛɛ daŋ bu nyaŋa nɛ́ nɛnɛ ɗoŋ-aa.

¹⁵Tɔ̧ɔ̧-nú gba-paa gbòó nɛ̀ kɔ̧ nú-a wen gana zu o tugun bíí; a̧ tɛ kai wa yaknɛ mɛ dai nɛ̀ dɔra-boi, ɓɛɛ a̧ tɛ i̧si̧ kpáná-dɔ̧ɔ̧ ŋga nyimsea ko Sɔ̧ nɛ̀ a̧a̧ nɛ̀ ŋgayamɔ lɛŋ gbai a nù.

¹⁶Ŋma nin yɔra tɛ gba-laa kɔ̧-a̧ in gɔn ku-a'e: «Wannu zu o wannu, in Gasa Wan zu o gasa wan.»

¹⁷Ɓɛɛ mi zɔk ŋma betom mɛ yiwese nɛ̀ yor sɛn tɛ wese; nɛ̀ mɔ'ɔ n'aa tɔ̧ɔ̧ wen nɛ hee-ger ha̧ o nɔ̧́í̧ nɛ̀ bu̧i̧ nɛ̀ yiwese mɛ̀‘e: «Ɛ̀nɛ̀ tɛ̀, ɛ̀nɛ̀ mɔ́í̧ ŋmaa tɛnɛ tɛ gasa gbaŋa ko Sɔ̧,

¹⁸wen nyɔŋa mur-tɛ o wannu, mur-tɛ o be-wan, mur-tɛ o ŋga-wi, mur-tɛ o nyaŋa in o wi-daŋa-a, mur-tɛ o bíí lɛŋ, o wi nɛ̀ bó nɛ́ bara na in o bara, o geɗek-wi in o gasawi mbɛt.»

¹⁹Ɓɛɛ mi zɔk saɗi, o wannu zaŋnu, in o wi-biro kɔ-wa nɛ̀ mɔi̧a ŋmaa mɛ bi wi-daŋ-nyaŋa'i in o wi-biro kɔ̧-a̧.

²⁰Nɛ́ mɔ'ɔ nɛ̀ wa baa saɗi in wi-tɔ̧-wen oi nú Sɔ̧ ndela, nɛ̀ dee so mɔɔ-kifi nɛ̀ gbaayí saɗi'i, ɓɛɛ ká ɔr o bíí nɛ̀ yɔramɔ ko saɗi'i duk so tɛ-wa, nɛ̀ ya so gasi nɛ̀ duia-mɔ kɔ̧-a̧‘i; wa kaia wa nɛ̀ kpasa yiitoo lɛŋ a kɔ̧ tɔp-wee-baraadu[16].

²¹Oi o bíí fee nú gba-paa nɛ̀ gbòó nɛ̀ kɔ̧ nú wi-daŋ-nyaŋa'i, ɓɛɛ zaŋ o nɔ̧́í̧ mɛ yiwese lɛŋ sur wen zu nyɔŋa mur-tɛ o wi nɔ‘i.